ព្រះវិហារ ៖ ខេត្តព្រះវិហារជាខេត្តមួយនៅតំបន់ដាច់ស្រយាលពីគេ ហើយផ្លូវក៏មានលក្ខណៈពិបាកក្នុងការធ្វើដំណើរបំផុត បើនិយាយពី១០ឆ្នាំមុន ប៉ុន្តែក្រោមការដឹកនាំរបស់សម្តេចតេជោ ក្នុងរយៈពេល១០ឆ្នាំចុងក្រោយនេះធ្វើឲ្យខេត្តមានផ្លូវខ្វាត់ខ្វែង ពិសេសផ្លូវនៅតាមបន្ទាត់ព្រះដែន ផ្លូវចូលមកទីរួមខេត្ត និងផ្លូវនៅក្នុងខេត្ត ជាដើម។
លោកសំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារ បានបញ្ជាក់ឲ្យដឹងកាលពីដើសប្តាហ៍នេះថា ទោះបីខេត្តព្រះវិហារជាខេត្តជាយដែនបានធ្វើសមាហរណកម្មក្រោយគេក៏ពិតមែនតែសម្ដេចតេជោហ៊ុនសែន បានផ្ដល់លទ្ធភាពទាំងបច្ចេកទេសនិងថវិកាដល់ក្រសួងសាធារណការនិងដឹកជញ្ជូន កងវិស្វកម្ម សម្តេចតេជោ ក្រសួងការពារជាតិនិងជំនួយរបស់ប្រទេសចិនមកកសាងប្រព័ន្ធផ្លូវថ្នល់ស្ពាន លូ ក្នុងជាច្រើនខ្សែធ្វើឱ្យខេត្តមានប្រព័ន្ធគមនាគមន៍ខ្វាត់ខ្វែង។
លោក សំ លាងទ្រីបានបន្តថា “កាលពី១០ឆ្នាំមុនខេត្តព្រះវិហារមិនមានផ្លូវស្អាតក្នុងការធ្វើដំណើរនោះទេ ។បើប្រជាពលរដ្ឋចង់ធ្វើដំណើរមកខេត្តព្រះវិហារ ដាច់ខាតត្រូវតែដេកតាមផ្លូវទើបមកដល់ ហើយប្រជាពលរដ្ឋបើមកព្រះវិហារហើយ គឺមិនចង់ទៅវិញទេ។ ការមិនចង់ទៅវិញនោះ មិនមែនដោយសារជាប់ចិត្តជាមួយនឹងខេត្តព្រះវិហារនោះទេ ពោលគឺធុញទ្រាន់នឹងការធ្វើដំណើរទៅមកតែម្តង ព្រោះផ្លូវតភ្ជាប់មកខេត្តមានការលំបាក មានភក់ ទឹកដក់និងដាច់ផ្លូវជាដើម”។
លោកបញ្ជាក់ថា ប៉ុន្តែក្នុងរយៈពេល១០ឆ្នាំចុងក្រោយនេះ រាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែនបានធ្វើឲ្យខេត្តព្រះវិហារមានការអភិវឌ្ឍរីកចម្រើនយ៉ាងឆាប់រហ័ស និងលែងជាខេត្តដាច់ស្រយាលទៀតហើយ ដោយនៅទូទាំងខេត្តមានផ្លូវខ្វាត់ខ្វែង ពិសេសផ្លូវនៅតាមបន្ទាត់ព្រះដែន ផ្លូវចូលមកទីរួមខេត្តនិងផ្លូវនៅក្នុងខេត្ត ។ ក្រៅពីនេះ នៅទីរួមខេត្តព្រះវិហារក៏បានរំលេចទៅដោយសួនច្បារ សួនកុមារ មានភ្លើងបំភ្លឺសាធារណៈ មានការដាំដើមឈើនៅតាមទីសាធារណៈនិងមានប្រព័ន្ធលូជាច្រើនខ្សែទៀតផងដែរ ។ ក្រៅពីសមិទ្ធផលទាំងនេះហើយ នៅក្នុងមន្ទីរក៏បានធ្វើការអភិវឌ្ឍយ៉ាងខ្លាំងផងដែរ ដោយស្ថាបនាឲ្យមានអគារថ្មីៗ សម្រាប់ឲ្យមន្ត្រីរាជការបម្រើការងារក្នុងការផ្តល់សេវាជូនប្រជាពលរដ្ឋបានស្រួលទៀតផង។
លោក សំ លាងទ្រី បានបន្តឲ្យដឹងទៀតថា សម្រាប់ខេត្តព្រះវិហារ ផ្លូវដែលក្រោមការគ្រប់គ្រងនិងមើលថែពីមន្ទីរសាធារណការ មានផ្លូវចាក់កៅស៊ូប្រមាណជិត៥០០គីឡូម៉ែត្រនិងផ្លូវក្រាលក្រួសក្រហមប្រមាណ៥០០គីឡូម៉ែត្រ សរុបទាំងអស់ប្រមាណ
១០០០គីឡូម៉ែត្រ ។
លោក សំ លាងទ្រី បានបញ្ជាក់ផងដែរថា ជាទិសដៅនៅក្នុងឆ្នាំ២០១៨នេះ ក្រសួងសាធារណការនិងដឹកជញ្ជូនបាន ដាក់ផែនការឲ្យមន្ទីរសាធារណការនិងដឹកជញ្ជូនខេត្តបើកការដ្ឋានជួសជុលផ្លូវជាតិលេខ៩៥ ការជួសជុល ការថែទាំផ្លូវជាប្រចាំ និងការដាក់ទិសដៅ ស្លាកសញ្ញាចរាចរនៅតាមផ្លូវ។ បន្តការអនុវត្តវិធានការកាត់ទ្រុងរថយន្តតខុសលក្ខណៈបច្ចេកទេស និងវិធានការលើការដឹកលើសទម្ងន់ជាដើម៕ ដោយ៖បញ្ញាស័ក្តិ