ភ្នំពេញ ៖ លោក សាយ សំអាល់ រដ្ឋមន្ត្រីក្រសួងបរិស្ថាន បានពិភាក្សាការងារ ជាមួយលោក Kun Kilee ប្រធានសមាគមន៍សំណង់ និងវិស្វកម្មកូរ៉េ ដើម្បីបង្កើនកិច្ចសហប្រតិបត្តិការ រវាងសាធារណរដ្ឋកូរ៉េ និងព្រះរាជាណាចក្រកម្ពុជា លើផ្នែកវិស្វកម្ម និងសំណង់ ក៏ដូចជាចូលរួម ក្នុងការអភិវឌ្ឍហេដ្ឋារចនាសម្ព័ន្ធ ទូរគមនាគមន៍ កំពង់ផែ ផ្លូវរថភ្លើង និងព្រលានយន្តហោះផងដែរ នៅទីស្តីការក្រសួងបរិស្ថាន នៅច័ន្ទ ១កើត ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣ ខែមិថុនា ឆ្នាំ២០១៩។
នាឱកាសនោះ លោក Kun Kilee បានចាប់អារម្មណ៍ លើការពង្រឹងកិច្ចសហប្រតិបត្តិការ លើការគ្រប់គ្រងបរិស្ថាន នៅកម្ពុជា ជាពិសេសគម្រោងវិនិយោគ លើហេដ្ឋារចនាសម្ព័ន្ធ និងវិស័យទូរគមនាគមន៍ នៅក្នុងខេត្តព្រះសីហនុ។
ជាមួយគ្នានេះ លោករដ្ឋមន្ត្រី សាយ សំអាល់ បានលើកឡើងថា ខេត្តព្រះសីហនុ គឺជាខេត្តមួយដែលមានសក្តានុពល ផ្នែកសេដ្ឋកិច្ច និងទេសចរណ៍យ៉ាងសំខាន់ របស់កម្ពុជា ហើយ ខេត្តនេះកំពុងមាន ការអភិវឌ្ឍលើគ្រប់វិស័យ។ ទន្ទឹមនឹងនេះ លោករដ្ឋមន្ត្រី បានមានប្រសាសន៍ថា ប្រទេសកម្ពុជា កំពុងមានសុខសន្តិភាព ស្ថេរភាពនយោបាយ និងកំណើនសេដ្ឋកិច្ចជាប្រចាំ ក្នុងនោះមាន បណ្តាប្រទេសផ្សេងៗជាច្រើន បានចូលរួមវិនិយោគ ហើយក្នុងនោះ ក៏បានគាំទ្រក្នុងការបង្កើន កិច្ចសហប្រតិបត្តិការនានា ក្នុងការចូលរួម និងជំរុញការអភិវឌ្ឍ នៅប្រទេសកម្ពុជា ជាពិសេសការលើកកម្ពស់ វិស័យបរិស្ថាន ៕ ដោយ៖កូឡាប
