ភ្នំពេញ៖ កម្ពុជាបានបញ្ជូនពលការិនីចំនួន ១៤នាក់ ទៅបម្រើការងារជាជំនួយការមេផ្ទះ នៅតំបន់រដ្ឋបាលពិសេសហុងកុង។ ពលការិនីទាំង១៤នាក់ ត្រូវចេញដំណើរពីអាកាសយានដ្ឋានអន្តរជាតិភ្នំពេញ នារសៀលថ្ងៃទី២៧ ខែធ្នូ ឆ្នាំ២០១៧ ជាមួយការអមដំណើរពីមន្ត្រីរាជការ នៃក្រសួងការងារ។
បើតាមលោក ងុយ រិទ្ធ អគ្គនាយករង នៃអគ្គនាយកដ្ឋានការងារ នៃក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា ការបញ្ជូនពលការិនីទៅបម្រើការងារជាជំនួយការមេផ្ទះ នៅតំបន់រដ្ឋបាលពិសេសហុងកុង ស្ថិតក្នុងជំហានដំបូង បន្ទាប់ពីចុះអនុស្សរណៈបញ្ជូន និងទទួលពលករកម្ពុជាទៅបម្រើការងារជាជំនួយការមេផ្ទះ នៅតំបន់រដ្ឋបាលពិសេសហុងកុង ឲ្យបាន១ពាន់នាក់ នៅឆ្នាំ២០១៨ កាលពីពេលកន្លងទៅរួចមក ភាគី។
លោក ងុយ រិទ្ធ អគ្គនាយករង នៃអគ្គនាយកដ្ឋានការងារ នៃក្រសួងការងារ និងបណ្តុះបណ្តាលវិជ្ជាជីវៈ បានបន្តថា មុនការចេញដំណើរនេះ ពលការិនីកម្ពុជាទាំងអស់ បានទទួលការបណ្ដុះបណ្ដាលពីជំនាញការងារ ផ្នែកជំនួយការមេផ្ទះ ភាសា និងរបៀបរបបមួយចំនួន រយៈពេល៣ខែ ដើម្បីតម្រង់ទិសបណ្ដើរៗពីជីវភាពរស់នៅ នៅតំបន់រដ្ឋបាលពិសេសហុងកុងនោះ។ អាណត្តិការងារជំនួយការមេផ្ទះនៅហុងកុង មានរយៈពេល២ឆ្នាំ ប៉ុន្តែដល់ពេលបញ្ចប់អាណត្តិការងារ បើសិនមានការព្រមព្រៀងពីនិយោជកទៀត ពលការិនីអាចបន្តអាណត្តិការងារទៀតបាន។ ប្រាក់ឈ្នួលអប្បបរមាដែលទទួលបានចាប់ពី ៥៧០ដុល្លារឡើងទៅ រួមទាំងអត្ថប្រយោជន៍មួយចំនួនទៀត ដូចជា លក្ខខណ្ឌការងារ និងការធានារ៉ាប់រងផ្សេងៗល្អប្រសើរ ទាំងផ្នែកសុខភាព ការឈប់សម្រាក និងការការពារសិទ្ធិប្រយោជន៍ ពោលដូចទៅនឹងកម្មករ-កម្មការិនីហុងកុង និងពលករ-ពលការិនីជនជាតិដទៃផងដែរ។ កម្ពុជាបញ្ជូនពលការិនីជាបន្តបន្ទាប់ទៀត ដោយអាស្រ័យលើការជ្រើសរើសការបណ្ដុះបណ្ដាល និងតម្រូវការជាក់ស្ដែងរបស់និយោជកនៅហុងកុង។ បើតាមការគ្រោងទុកនៅឆ្នាំ២០១៨ កម្ពុជាបានព្រមព្រៀងជាមួយហុងកុង បញ្ជូនពលការិនីកម្ពុជាទៅហុងកុង ឲ្យបាន១ពាន់នាក់តាមតម្រូវការទីផ្សារការងារនៅហុងកុងមានច្រើនជាងនេះ ប៉ុន្តែកម្ពុជាមិនអាចផ្ដល់កម្លាំងពលកម្មទៅបានច្រើនជាងនេះទេ ព្រោះត្រូវការចំណាយពេលវេលា ក្នុងការជ្រើសរើស បណ្ដុះបណ្ដាលទៅតាមស្ដង់ដារ និងការងារពាក់ព័ន្ធនានា។
សូមជម្រាបថា លោក Law Chi Kwong រដ្ឋលេខាធិការនៃការិយាល័យទទួលបន្ទុកវិស័យការងារ និងសុខុមាលភាពហុងកុង ធ្លាប់បានបញ្ជាក់ថា នៅតំបន់រដ្ឋបាលពិសេសហុងកុង ពលការិនីកម្ពុជានឹងទទួលបានសិទ្ធិ និងលក្ខខណ្ឌការងារដូចទៅនឹងពលករជនជាតិហុងកុងដែរ ដូចជា ការឈប់សម្រាកមួយថ្ងៃក្នុងមួយសប្ដាហ៍ ឈប់សម្រាកដោយទទួលបានប្រាក់ឈ្នួលចំនួន ៧ថ្ងៃទៅ១៤ថ្ងៃ ក្នុងមួយឆ្នាំ ការគាំពារពេលមានផ្ទៃពោះ (ការឈប់សម្រាកលំហែមាតុភាព) ចំនួន១០សប្ដាហ៍ ការធានាររ៉ាប់រងពេលមានជំងឺ និងបន្ថែមប្រាក់លើកទឹកចិត្តសម្រាប់ពលករដែលបម្រើការងារយូរឆ្នាំ៕ ដោយ៖បញ្ញាស័ក្តិ
