ខេត្តកំពត៖ លោក យី ថុល ជាប្រធានការិយាល័យគយ និងរដ្ឋាករព្រែកចាក នៅថ្ងៃទី៣ ខែមិថុនា ឆ្នាំ២០១៩នេះ បានដាក់ពាក្យបណ្តឹងទៅកាន់ព្រះរាជអាជ្ញាអមសាលាដំបូងខេត្តកំពត ដោយប្តឹងអ្នកយកព័ត៌មានប្រមាណជិត ១០នាក់ ដោយចោទថា បានជេរប្រមាថ និងជ្រៀតជ្រែកទៅក្នុងការបំពេញមុខងាររបស់លោក កាលពីពេលថ្មីៗនេះ។ មន្ត្រីគយរូបនេះ បានប្តឹងទាមទារសំណងពីក្រុមអ្នកយកព័ត៌មានទាំងនោះ ចំនួន ១០ម៉ឺនដុល្លារ។ ប៉ុន្តែលោកប្រធានក្លឹបអ្នកកាសែតឯករាជ្យនោះ បានព្រមានមន្ត្រីគយថា នឹងបញ្ចេញសំឡេងឯកសារមួយចំនួន ដើម្បីជាការឆ្លើយតបទៅនឹងបណ្ដឹង។
អ្នកយកព័ត៌មានទាំងនោះរួមមាន ៖ ទី១លោក ហ៊ុន សុខា ជាប្រធានសារពត៌មានក្លិបអ្នកកាសែតឯករាជ្យ និងជានាយកផ្សាយព័ត៌មានប្រជាជនកម្ពុជា (CPNTV) ។ ទី២លោក ចន យូដេត ជាសមាជិកនៃក្លិបអ្នកកាសែតឯករាជ្យ ។ ទី៣ លោក ស៊ាង ប៊ុនសុង ជាសមាជិកនៃក្លិបអ្នកកាសែតឯករាជ្យ ។ ទី៤លោក ទុំ ឆោម ជាសមាជិកនៃក្លឹបអ្នកកាសែតឯករាជ្យ ។ ទី៥ លោក ប៉ែន រ៉ា ជាសមាជិកនៃក្លិបអ្នកកាសែតឯករាជ្យ ។ ទី៦ លោក កែវ សុផាត ជាសមាជិកនៃក្លឹបអ្នកកាសែតឯករាជ្យ ។ ទី៧ លោក ជី ពេជ្រ ជាសមាជិកនៃក្លិបអ្នកកាសែតឯករាជ្យ ។ ទី៨លោក អ៊ុត ប៊ុនធឿន ជាសមាជិកនៃក្លិបអ្នកកាសែតឯករាជ្យ ។ ទី៩មិនស្គាល់ឈ្មោះ។
បើតាមពាក្យបណ្តឹងនេះ លោក យី ថុល បានចោទប្រកាន់ទៅលើអ្នកយកព័ត៌មានទាំងនោះ ពីបទជេរប្រមាថចំពោះអ្នករាជការសាធារណៈ, បទប៉ះពាល់ដល់ សិទ្ធិខាងរូបភាព នៃបុគ្គល និងបទជ្រៀតជ្រែកដោយខុសច្បាប់ ទៅក្នុងការបំពេញមុខងារសាធារណៈ។ មន្ត្រីគយរូបនេះ បានទាមទារសំណងពីក្រុមអ្នកយកព័ត៌មានទាំងនោះចំនួន ១០ម៉ឺនដុល្លារ។ ក្នុងពាក្យបណ្តឹងបានបញ្ជាក់ថា ក្រុមអ្នកសារព័ត៌មានខាងលើ បានចូលមកលួចថតជាវីដេអូ ពាសពេញបរិវេណទីតាំងត្រួតពិនិត្យទំនិញ ដែនសមត្ថកិច្ចគយនិងរដ្ឋាករព្រែកចាក ដោយបានថត និងចូលឆែកឆេរទំនិញ ដែលស្តុកទុកនៅក្នុងទីលានត្រួតពិនិត្យទំនិញ ដែនសមត្ថកិច្ចគយ ។
លោក ហ៊ុន សុខា ជាប្រធានក្លិបអ្នកកាសែតឯករាជ្យ និងជានាយកផ្សាយព័ត៌មានប្រជាជនកម្ពុជា (CPNTV) បានថ្លែងប្រាប់កាសែកក្នុងស្រុកថា ការប្តឹងជាសិទ្ធិរបស់គេ យើងមានតែរង់ចាំដីកាឲ្យចូលទៅបំភ្លឺតែប៉ុណ្ណោះ ហើយយើងនឹងត្រៀមឯកសារទាំងអស់ ដើម្បីដាក់ចូលទៅតុលាការ ពីព្រោះក្រោយពីមានបញ្ហា ពួកគាត់ បានហៅចូលទៅក្នុងការិយាល័យ ដើម្បីសម្រុះសម្រួល ហើយភាគីទាំងសងខាងយល់ថា មានការយល់ច្រឡំ មានកំហុសទាំងអស់គ្នា ដូច្នេះក៏សុំចាប់ដៃគ្នារាប់អានគ្នា បញ្ឈប់ជម្លោះ ហើយពួកគាត់ក៏បានហៅអ្នកសារព័ត៌មាន ទៅហូបបាយរួមគ្នានៅវៀតណាម តែដោយសារមានរវល់ ក៏បានបែកគ្នា មិនបានហូបបាយរួមទេ។ ការប្តឹងរបស់គាត់ គឺជារឿងល្អមួយ សម្រាប់យើងបង្ហាញសង្គម ឲ្យបានឃើញច្បាស់ថា តើវាំងននខ្មៅរបស់មន្ត្រីគយ ឬរបស់មន្ត្រីពុករលួយមានអីខ្លះ ដែលកុហកសម្តេច។ ដូចខ្ញុំបាននិយាយប្រាប់បងចឹង ទឹកស៊ីអ៊ីវម៉ាកស៊ូប៊ី ដែលផលិតនៅសង្កាត់ទួលទំពូង ខណ្ឌចំការមន រាជធានីភ្នំពេញ បែរជាដឹកមកពីវៀតណាម តើយើងខ្មាសគេអត់ ហើយបើមានបញ្ហា ដែលបង្ហាញទេ ។ ប្រធានក្លឹបអ្នកកាសែតឯករាជ្យរូបនោះ ក៏បាននិយាយក្នុងបំណងគំរាមទៅមន្ត្រីនោះវិញថា បើគាត់ប្តឹងយើងបញ្ចេញឲ្យអស់នូវសំឡេងដែលគាត់ណាត់ខ្ញុំជួប នូវសំឡេងដែលគាត់សុំឲ្យខ្ញុំទម្លាក់ព័ត៌មាន នូវអ្វីដែលគាត់ចរចាតាមរយៈអ្នកសារព័ត៌មាន ដែលឲ្យលុយខ្ញុំ ខ្ញុំអត់យកទេ ខ្ញុំប្រាប់ថា រឿងម្ហូបអាហារនេះមួយ សូកខ្ញុំមួយលានដុល្លារ ក៏ខ្ញុំមិនយកដែរ ពីព្រោះអានេះបំផ្លាញប្រជាពលរដ្ឋ ។
សូមបញ្ជាក់ថា កាលពីថ្ងៃទី២៨ ខែឧសភា ឆ្នាំ២០១៩ ស្ថិតនៅបរិវេណប៉ុស្ដិ៍គយព្រែកចាក ព្រំប្រទល់កម្ពុជា-វៀតណាម ក្នុងខេត្តកំពត មានករណីទំនាស់មួយបានកើតឡើង ស្ទើរតែងផ្ទុះហិង្សាធ្ងន់ធ្ងរទៅហើយ រវាងអ្នកយកព័ត៌មានមួយក្រុមប្រមាណជាង ១០នាក់ និងមន្ដ្រីគយប្រចាំនៅប៉ុស្ដិ៍នោះតែម្ដង ពាក់ព័ន្ធទៅនឹងការយកព័ត៌មានពីការដឹកទំនិញឆ្លងកាត់ ៕ ដោយ៖កូឡាប