ខេត្តព្រះសីហនុ ៖ សមត្ថកិច្ចនគរបាលខេត្តព្រះសីហនុ បានបង្ហាញមុខជនសង្ស័យ ក្នុងអំពើឃាតកម្មរំលោភសម្លាប់ក្មេងប្រុសស្រីពីរនាក់បងប្អូនបង្កើត រស់នៅភូមិគគី ឃុំបិតត្រាំង ស្រុកព្រៃនប់ ដែលជនល្មើសបានប្រព្រឹត្តិកាលពីល្ងាចថ្ងៃទី២៩ ខែឧសភា ឆ្នាំ២០១៩ ។
លោក ជួន ណារិន្ទ ស្នងការនគរបាលខេត្តព្រះសីហនុ បានថ្លែងនៅក្នុងសន្និសីទសារព័ត៌មានខ្លីកាលពីរសៀលថ្ងៃទី០៣ ខែមិថុនា ឆ្នាំ២០១៩ ដើម្បីបង្ហាញមុខជនដៃដល់សម្លាប់ក្មេងប្រុសស្រីទាំងពីរនាក់ នាបរិវេណស្នងការដ្ឋាននគរបាលខេត្តព្រះសីហនុ។ លោកឧត្តមសេនីយ៍ទោ ជួន ណារិន្ទ បញ្ជាក់ថា ជនសង្ស័យត្រូវបានរូបលោកសួរនាំផ្ទាល់ និងត្រៀមកសាងសំណុំរឿងបញ្ជូនទៅកាន់សាលាដំបូងខេត្តព្រះសីហនុ ដើម្បីផ្ដន្ទាទោសតាមនីតិវិធីច្បាប់។
នៅក្នុងសន្និសីទកាសែត លោក ជួន ណារិន្ទ បានដកស្រង់ចម្លើយសារភាព របស់ជនដៃដល់ខាងលើ មកបញ្ជាក់ថា សកម្មភាពល្មើស របស់ជនសង្ស័យខាងលើនេះ វាមិនមែនជាបទល្មើសលើកទី១នោះទេ ពោលគឺជនសង្ស័យរូបនេះ ធ្លាប់បានប្រព្រឹត្តបទល្មើសបែបនេះ នាពេលកន្លងទៅ ហើយក៏ធ្លាប់ជាប់ពន្ធនាគារថែមទៀតផង។
លោកស្នងការ ឲ្យដឹងបន្តថា នៅក្នុងអំឡុងឆ្នាំ២០០១-២០០២ ជនល្មើសរូបនេះ ក៏ធ្លាប់បានចាប់រំលោភគេ នៅស្រុកកំណើតរបស់ខ្លួនដែរ ប៉ុន្ដែមិនបានសម្រេច ហើយក្រោយមក ក៏បានរត់គេចខ្លួនចេញពីស្រុកកំណើត ទៅធ្វើការងារជាកម្មករសំណង់ នៅម្តុំព្រែកលាប រាជធានីភ្នំពេញ។ បន្តបន្ទាប់ក្រោយមកជននេះ ក៏បានធ្វើសកម្មភាពលួចខ្សែភ្លើងរបស់គេ រហូតឈានដល់ម្ចាស់ប្តឹងចាប់ដាក់ពន្ធនាគារ។
លោក ជួន ណារិន្ទ បន្តថា ៖ ក្រោយមកទៀត ពេលជននេះ រួចទោសចេញពីពន្ធនាគារ ជនល្មើសរូបនេះ ក៏បានចេញទៅខេត្តពោធិ៍សាត់ ហើយក៏បានជួបប្រពន្ធរាល់ថ្ងៃនេះ ដែលជាស្ដ្រីមេម៉ាយមានកូន៥នាក់។ បន្តបន្ទាប់មក ពួកគេទាំងពីរនាក់ ក៏បានចេញដំណើរមកធ្វើសំណង់ នៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ មុននឹងបន្ដធ្វើដំណើរទៅរស់នៅក្រុងបាវិត ខេត្តស្វាយរៀង កាលពីដើមឆ្នាំ២០១៨។
លោក ជួន ណារិន្ទ ឲ្យដឹងដូច្នេះ រួចបញ្ជាក់ថា ពេលទៅរស់នៅធ្វើការងារនៅក្រុងបាវិត ជនម្នាក់នេះ ក៏បានចាប់រំលោភយុវតីម្នាក់ អាយុខ្ទង់ចន្លោះពី ១៤-១៥ឆ្នាំ មួយករណីទៀត រួចក៏រត់គេចខ្លួនជាមួយប្រពន្ធ ទៅធ្វើការងារជាកម្មករសំណង់ នៅកន្លែងកើតហេតុ ស្ថិតក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។
ងាកមកបទល្មើសចុងក្រោយនេះ លោក ជួន ណារិន្ទ បន្តថា មុនពេលកើតហេតុជនដៃដល់ខាងលើនេះ បានអង្គុយផឹកស្រាស នៅផ្ទះរបស់ខ្លួនអស់កន្លះលីត្រ រួចក៏ប្រើឲ្យប្រពន្ធរបស់ខ្លួន ជាស្ដ្រីមេម៉ាយកូន ៥នាក់ ទៅទិញពងទាកូន សម្រាប់ក្លែមស្រាស។ ហើយថា ដោយសារតែប្រពន្ធរបស់ខ្លួន ទៅទិញពងទាកូន អូសបន្លាយពេលយូរពេក ជនសង្ស័យរូបនេះ ក៏បានបន្ដផឹកស្រាស រហូតអស់មួយលីត្រកន្លះ រួចក៏ដើរទៅតាមប្រពន្ធតាមក្រោយ។ នាឱកាសនោះ ជនល្មើសរូបនេះ ក៏បានឃើញក្មេងស្រីរងគ្រោះ កំពុងនៅក្នុងផ្ទះ ជាប់ផ្លូវធ្វើដំណើរ របស់ខ្លួន ហើយស្ងាត់មិនឃើញឪពុកម្តាយនៅជាមួយ ក៏បានចូលទៅចាប់រំលោភទាំងកម្រោល ហើយក៏បានប្រើហិង្សាវាយសម្លាប់បំបិទមាត់។ ភ្លាមៗនោះ កុមារាជាប្អូន បានឃើញដូច្នេះ ក៏ស្រែចយំ ទើបជនសង្ស័យ បានទះកំផ្លៀង ៥-៦ដៃ ហើយទាត់ផ្ទប់ជញ្ជាំងស្លាប់មួយរំពេច។ ហើយក្រោយមក ជនល្មើសរូបនេះ ក៏បាននាំប្រពន្ធគេចខ្លួនទៅកាន់ស្រុកកំណើត នៅឯស្រុកមេសាង ខេត្តព្រៃវែង ជាទីកន្លែងត្រូវសមត្ថកិច្ចចាប់ខ្លួន។
សូមបញ្ជាក់ថា ជនដៃដល់រំលោភសម្លាប់ខាងលើនេះមានឈ្មោះ មាង វិចិត្រ ត្រូវបានបញ្ជូនទៅស្នងការដ្ឋាននគរបាលខេត្តព្រះសីហនុ ដែលជាម្ចាស់ករណី កាលពីយប់ថ្ងៃទី០២ ខែមិថុនា ឆ្នាំ២០១៩ ដើម្បីសាកសួរ និងឈានទៅកសាងសំណុំរឿងបញ្ជូនទៅកាន់សាលាដំបូងខេត្តព្រះសីហនុ ដើម្បីបន្តនីតិវិធីផ្ដន្ទាទោសតាមច្បាប់។
ជនល្មើសរូបនេះ ត្រូវបានកម្លាំងនគរបាល ចាប់ខ្លួននៅរសៀលថ្ងៃទី០២ ខែមិថុនា ឆ្នាំ២០១៩ នៅស្រុកមេសាង ខេត្តព្រៃវែង។
សមត្ថកិច្ចបញ្ជាក់ថា អំពើឃាតកម្មខាងលើនេះ បានកើតឡើងកាលពីថ្ងៃទី២៩ ខែឧសភា ឆ្នាំ២០១៩។ ចំណែកកុមារារងគ្រោះមានឈ្មោះ ផា សុខលី អាយុ២ឆ្នាំកន្លះ និងកុមារីជាបងមានឈ្មោះ ផា ស្រីល័ក្ខ មានអាយុជិត១០ឆ្នាំ៕ ដែន សីមា