ស្ថានទូតចិននៅក្នុងសហរដ្ឋអាមេរិច បានសម្តែងការមិនពេញចិត្តយ៉ាងខ្លាំងនៅថ្ងៃអង្គារនេះ ចំពោះសេចក្តីក្តីប្រកាសរបស់អាមេរិចលើខួបគម្រប់ ៣០ឆ្នាំ នៃការបង្ក្រាបរបស់រដ្ឋាភិបាលចិនទៅលើក្រុមនិស្សិតរបស់ខ្លួននៅទីលាន Tiananmen។
នៅថ្ងៃនេះ កាលពី ៣០ឆ្នាំមុន រដ្ឋាភិបាលចិនបានធ្វើការសម្រេចចិត្តបង្ក្រាបទៅលើក្រុមនិស្សិតដែលដឹកនាំការតវ៉ា ដើម្បីឲ្យមានប្រជាធិបតេយ្យនៅក្នុងប្រទេសចិន។ រហូតមកដល់ពេលនេះ រដ្ឋាភិបាលចិនមិនដែលបានបញ្ចេញតួលេខ នៃចំនួនអ្នកស្លាប់ និងរបួស នៃការបង្ក្រាបរបស់ខ្លួនឡើយ ប៉ុន្តែមានការប៉ាន់ប្រមាណថា មាននិស្សិតរាប់ពាន់នាក់ រហូតដល់មុឺននាក់ បានស្លាប់នៅក្នុងការបង្ក្រាបយោធានោះ។
នៅថ្ងៃច័ន្ទម្សិលមិញ រដ្ឋមន្ត្រីការបរទេសអាមេរិច លោក Mike Pompeo បានស្នើឲ្យរដ្ឋភិបាលក្រុងប៉េកាំងធ្វើការប្រារព្ធខួបនៃការបង្ក្រាបនោះ ដោយធ្វើការដោះលែងអ្នកទោសទាំងអស់ ដែលបានតស៊ូប្រឆាំងនឹងការរំលោភសិទ្ធិមនុស្សនៅក្នុងប្រទេសចិន។
ទោះយ៉ាងណា ស្ថានទូតចិនបានចេញសេចក្តីប្រកាស ដោយបានបញ្ជាក់ថា ការថ្លែងរបស់រដ្ឋមន្ត្រីការបរទេសអាមេរិច Mike Pompeo ធ្វើឡើងដោយការលំអៀង និងក្រអឺតក្រទម និងបានជ្រៀតជ្រែងចូលក្នុងកិច្ចការផ្ទៃក្នុងរបស់ចិន។
ស្ថានទូតចិននិយាយថា “សិទ្ធិមនុស្សចិនគឺស្ថិតក្នុងពេលវេលាល្អបំផុតដែលមិនធ្លាប់មានពីមុនមក”។
សូមបញ្ជាក់ថា ជារៀងរាល់ឆ្នាំ មុនពេលខួបនៃការបង្ក្រាបរបស់រដ្ឋាភិបាលចិនចូលមក ទីក្រុងប៉េកាំងតែតែធ្វើការដាក់កំហិតទៅលើប្រជាជនខ្លួន ដោយមិនឲ្យមានការជួបជុំ ឬធ្វើខួបរំលឹកជាសាធារណៈនៅក្នុងប្រទេសចិនឡើយ។
រដ្ឋាភិបាលចិនធ្លាប់បានប្រកាសថា ការសម្រេចចិត្តបង្ក្រាបលើក្រុមនិស្សិតដែលដឹកនាំការតវ៉ានៅពេលនោះ គឺជាការសម្រេចចិត្តដ៏ត្រឹមត្រូវ៕
អត្ថបទប្រែសម្រួលដោយ៖ សុភ័ក្រ
ប្រភព៖ channelnewsasia