សៀមរាប៖ លោករដ្ឋមន្ត្រី វង សូត បានលើកឡើងថា ពាក់ព័ន្ធនឹងផ្នែកសង្គមកិច្ច រាជរដ្ឋាភិបាល បានអនុម័ត និងប្រកាសដាក់ឲ្យប្រើប្រាស់ ក្របខ័ណ្ឌ គោលនយោបាយជាតិគាំពារសង្គម ២០១៧-២០៣០ ដែលជាឯកសារគោលសំខាន់ៗ សម្រាប់ក្រសួង ស្ថាប័ន យកទៅអនុវត្ត ក្នុងនោះសម្រាប់ឆ្នាំ២០១៧នេះ យុទ្ធសាស្ត្រ៣យ៉ាង កម្មវិធីអាទិភាព ៨ចំណុច ត្រូវបានជំរុញ អនុវត្តប្រកបដោយលទ្ធផលផ្លែផ្កា។
សន្និបាតបូកសរុបលទ្ធផលការងារឆ្នាំ២០១៧ និងទិសដៅអនុវត្តបន្តរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា។
ថ្ងៃពុធ ១០កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ២៧ ខែធ្នូ ឆ្នាំ ២០១៧ នៅសណ្ឋាគារ តារារង្សី ខេត្តសៀមរាប លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា។
បើតាមការប្រសាសន៍របស់លោករដ្ឋមន្ត្រី វង សូត សម្រាប់ឆ្នាំ២០១៧នេះ យុទ្ធសាស្ត្រ៣យ៉ាង កម្មវិធីអាទិភាព ៨ចំណុច ត្រូវបានជំរុញ អនុវត្តប្រកបដោយលទ្ធផលផ្លែផ្ការួមមាន៖ ១៖ សេវាសុខុមាលភាពសង្គម សម្រាប់ជនក្រីក្រ និងងាយរងគ្រោះ កុមារ មនុស្សចាស់ មន្ត្រីរាជការស៊ីវិល និងអតីតយុទ្ធជន ។ ២៖ សេវាសុខុមាលភាពកុមារ បានបន្តរីកចម្រើនឥតឈប់ឈរ។ ៣៖ សេវាសុខុមាលភាពជនពិការ ត្រូវបានទទួលការយកចិត្តទុកដាក់ ។ ៤៖ សេវាសុខុមាលភាពមនុស្សចាស់ ត្រូវបានយកចិត្តទុកដាក់ ។ ៥៖ របបសន្តិសុខសង្គមសម្រាប់មន្ត្រីរាជការស៊ីវិល បានដំណើរការយ៉ាងសកម្ម ។ ៦៖ វិស័យអតីតយុទ្ធជន ត្រូវបានរាជរដ្ឋាភិបាលយកចិត្តទុកដាក់ ។ ៧៖ ក្រសួងបានលើកទឹកចិត្ត និងបង្កើនកិច្ចសហប្រតិបត្តិការជាមួយអង្គការមិនមែនរដ្ឋាភិបាលជាតិ និងអន្តរជាតិ និង៨៖ ពង្រឹងអភិបាលកិច្ចតាមរយៈ ការជ្រើសរើសមន្ត្រីក្របខណ្ឌថ្មី។
លោករដ្ឋមន្ដ្រីក្រសួងសង្គមកិច្ច អតីតយុទ្ធនិងយុវនីតិសម្បទា បានស្នើដល់មន្ត្រី និងអ្នកពាក់ព័ន្ធទាំងអស់ ត្រូវពង្រឹងសេវាសុខុមាលភាពសង្គម បន្តអនុវត្តន៍កម្មវិធីអប់រំ ពង្រឹងកម្មវិធីដោះ ស្រាយបញ្ហាជនអនាថា បន្តអនុវត្តន៍យុទ្ធសាស្ត្របញ្ជ្រាបយេនឌ័រ យកចិត្តទុកដាក់ផ្តល់សេវា សង្គមកិច្ច ជំរុញការងារប្រយុទ្ធប្រឆាំង អំពើជួញដូរមនុស្ស យកចិត្តទុកដាក់ដោះស្រាយបញ្ហា របស់កុមារកំព្រា និងកុមារពិការ ត្រូវពង្រឹង និងពង្រីកសេវាសុខុមាលភាពជនពិការ មនុស្សចាស់ ចាស់ជរាក្រីក្រគ្មានទីពឹង បន្តអនុវត្តន៍របបសន្តិសុខសង្គមសម្រាប់មន្ត្រីរាជការស៊ីវិលជាដើម។
លោករដ្ឋមន្ត្រី បានបន្ដថា ក្រៅពីភាពជោគជ័យទាំងនេះ នៅមានបញ្ហប្រឈមមួយចំនួន ដែលទាមទារឱ្យរួមគ្នាបន្តខិតខំរិះរកដំណោះស្រាយ ដូចជា ការប្រែប្រួលអាកាសធាតុ ការផ្ទុះចេញនូវជំងឺប្លែកៗ បញ្ហាចំណាកស្រុកដោយប្រថុយប្រថាន របស់ប្រជាជន បញ្ហាជនអានាថា ការជួយញដូរមនុស្ស ជួយញដូរពលកម្ម ការកេងប្រវ័ញ្ច ផ្លូវភេទ ការប្រើប្រាស់គ្រឿងញៀន និងបម្រែសម្រួលផ្នែកប្រជាសាស្ត្រជាដើម។ លោករដ្ឋមន្ដ្រីបានបន្ថែមថា សម្រាប់ទិសដៅបន្ត ភាគីពាក់ព័ន្ធត្រូវធ្វើការសិក្សាស្រាវជ្រាវប្រព័ន្ធ សន្តិសុខសង្គមទូលំទូលាយសម្រាប់ប្រជាជនកម្ពុជា អភិវឌ្ឍន៍សមត្ថភាពស្ថាប័ន និងពង្រឹងភាពជា ដៃគូអភិឌ្ឍន៍៕ ដោយ៖កូឡាប
