ប្រធានាធិបតីអាមេរិច ដូណាល់ ត្រាំបានបញ្ជាក់សារជាថ្មីនូវបំណងរបស់លោក ក្នុងការកំណត់យកពន្ធលើទំនិញនាំចូលពីប្រទេសមិចស៊ិចកូ ដើម្បីដាក់សម្ពាធទៅដល់ប្រទេសនោះ ឲ្យចាត់វិធានការក្នុងការបញ្ឍប់ជនអន្តោប្រវេន៍របស់ខ្លួនហូរចូលក្នុងទឹកដីអាមេរិច។
លោកថ្លែងនៅថ្ងៃអង្គារម្សិលមិញថា លោកទំនងជាធ្វើការយកពន្ធនៅសប្តាហ៍ក្រោយ។ នៅពេលជាមួយគ្នានេះដែរ លោកបានលើកឡើងថា ប្រទេសមិចស៊ិចកូបានចាប់វិធានការមួយចំនួន រួចរាល់ហើយដើម្បីទប់ស្កាត់លំហូរជនជាតិរបស់ខ្លួន។
“ពួកយើងនឹងឃើញប្រសិនជាពួកគេធ្វើអ្វី។ ប៉ុន្តែខ្ញុំគិតថា ការកំណត់យកពន្ធទំនងនៅតែបន្ត ហើយពួកយើងប្រហែលជានឹងត្រូវពិភាក្សាក្នុងកំឡុងពេលមានការយកពន្ធ ហើយពួកគេនឹងត្រូវបង់ពន្ធ”។ នេះជាអ្វីដែលលោកត្រាំបានថ្លែងបញ្ជាក់ ក្នុងកំពុងពេលធ្វើសន្និសិទនៅទីក្រុងឡុង ជាមួយនឹងនាយករដ្ឋមន្ត្រីអង់គ្លេស Theresa May។
លោកបន្ថែមថា “មិចស៊ិចកូមិនគួរអនុញ្ញាតិឲ្យប្រជាជនខ្លួនរាប់លាននាក់ព្យាយាម និងចូលក្នុងទឹករបស់ពួកយើងនោះទេ។ ពួកគេត្រូវតែបញ្ឍប់វាឲ្យបានលឿន ហើយខ្ញុំគិតថា ពួកគេនឹងធ្វើវា ប៉ុន្តែប្រសិនជាពួកគេគ្មានវិធានការទេ ពួកយើងនឹងយកពន្ធលើពួកគេ។ ខ្ញុំគិតថា មិចស៊ិចកូនឹងចាត់វិធានការ និងធ្វើអ្វីដែលត្រូវធ្វើ”។
សូមបញ្ជាក់ថា បញ្ហាជនអន្តោប្រវេសន៍ហូរចូលអាមេរិចគឺជារឿងកង្វល់ ដែលលោកដូណាល់ ត្រាំ បានយកធ្វើជាគោលនយោបាយក្នុងកំឡុងយុទ្ធនាការបោះឆ្នោតរបស់លោក កាលពីឆ្នាំ ២០១៦កន្លងទៅ។ ក្រោយពេលជាប់ឆ្នោតជាប្រធានាធិបតី លោកបានប្រកាសការអនុវត្តតាមការសន្យារបស់លោក ដោយឲ្យមានការសាងសង់ជញ្ជាំងព្រំដែនដែលគំរោងព្រំដែនរបស់លោក ត្រូវការចំណាយទឹកប្រាក់រាប់ពានលានដុល្លា ប៉ុន្តែគំរោងនោះហាក់ដំណើរការទៅមុខមិនល្អសោះ ដោយសារតែបក្សប្រជាធិបតេយ្យដែលជាអ្នកគ្រប់គ្រងសភា បានជំទាស់៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN