(ភ្នំពេញ) ៖ ប្រមុខរាជរដ្ឋាភិបាលអនុក្រឹត្យស្ដីពីការចុះបញ្ជីផ្ដល់ប័ណ្ណសម្គាល់យានជំនិះនិងបំពាក់ស្លាកលេខសម្គាល់យានជំនិះ។ ចាប់ពីពេលនេះតទៅ អ្នកដែលចង់ប្ដូររថយន្ដថ្មី អាចមានសិទ្ធិស្នើសុំរក្សាផ្លាកលេខសម្គាល់យានជំនិះរបស់ខ្លួនបានហើយ។ នេះបើតាមអនុក្រឹត្យ ស្តីពីការចុះបញ្ជីផ្តល់បណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ ចុះហត្ថលេខាដោយសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា នៅថ្ងៃទី៣ ខែមិថុនា ឆ្នាំ២០១៩នេះ។
អនុក្រឹត្យនេះមានគោលបំណងកំណត់បទប្បញ្ញត្តិពាក់ព័ន្ធនឹងការចុះបញ្ជីផ្ដល់ប័ណ្ណសម្គាល់យានជំនិះនិងបំពាក់ស្លាកលេខសម្គាល់យានជំនិះនៅក្នុងព្រះរាជាណាចក្រកម្ពុជា។ អនុក្រឹត្យនេះមានគោលដៅធានាឲ្យបានរឹងមាំនូវសន្តិសុខសណ្តាប់ធ្នាប់សុវត្ថិភាពសង្គមនិងផ្ដល់ភាពងាយស្រួលលើការងារគ្រប់គ្រងយានជំនិះគ្រប់ប្រភេទនៅក្នុងព្រះរាជាណាចក្រកម្ពុជា។ ធានាឲ្យការផ្ដល់សេវាកម្មចុះបញ្ជីផ្ដល់ប័ណ្ណសម្គាល់យានជំនិះនិងបំពាក់ស្លាកលេខសម្គាល់យានជំនិះបានឆាប់រហ័សមានតម្លាភាពមានប្រសិទ្ធភាពនិងធ្វើឲ្យមានភាពងាយស្រួលជូនប្រជាពលរដ្ឋ។ កំណត់និងផ្ដល់កម្មសិទ្ធិស្របច្បាប់ជូនម្ចាស់យានជំនិះ ។ រួមចំណែកប្រមូលប្រាក់ពន្ធអាករនិងកម្រៃផ្សេងៗតាមបទប្បញ្ញត្តិជាធរមាននិងទប់ស្កាត់នូវអំពើរត់គេចពន្ធនិងការក្លែងបន្លំផ្សេងៗឲ្យមានប្រសិទ្ធភាព។ បែងចែកច្បាស់លាស់នូវប្រភេទស្លាកលេខយានជំនិះនិងក្រុមម្ចាស់កម្មសិទ្ធិយានជំនិះ។
យោងតាមមាត្រា 21 ក្នុងអនុក្រឹត្យនេះ គឺបានសម្គាល់យានជំនិះត្រូវផ្ដល់ក្នុងករណីយានជំនិះតែបានផ្ទេរកម្មសិទ្ធិឬយានជំនិះត្រូវបានប្ដូរពណ៌ប្ដូរម៉ាស៊ីនឬម្ចាស់កម្មសិទ្ធិប្ដូរអាសយដ្ឋានស្នាក់នៅអចិន្ត្រៃយ៍។ ស្លាកលេខសម្គាល់យានជំនិះត្រូវប្ដូរក្នុងករណីយានជំនិះនេះត្រូវផ្ទេរកម្មសិទ្ធិរវាងរាជធានីនិងខេត្ត ឬរវាងខេត្តនិងខេត្ត។ ក្នុងករណីផ្ទេរកម្មសិទ្ធិយានយន្តនេះគឺម្ចាស់កម្មសិទ្ធិយានជំនិះដើមមានសិទ្ធិស្នើសុំរក្សាលើលេខចុះបញ្ជីយាន្តជំនិះជិះសម្រាប់ការចុះបញ្ជីយានជំនិះថ្មីរបស់ខ្លួន។ ក្នុងករណីនេះម្ចាស់កម្មសិទ្ធិយានជំនិះដើមត្រូវយកលេខយានជំនិះដែលរក្សាទុកនោះមកសុំចុះបញ្ជីនៅទីតាំង ផ្ដល់សេវាសាធារណៈដែលកំណត់ដោយក្រសួងសាធារណការនិងដឹកជញ្ជូនទើបអាចធ្វើចរាចរណ៍បាន។ ម្ចាស់កម្មសិទ្ធិយានជំនិះថ្មីមានសិទ្ធិជ្រើសរើសលេខចុះបញ្ជីយានជំនិះថ្មីបាន។ បែបបទនិងនីតិវិធីនៃការផ្ទេរកម្មសិទ្ធិនេះត្រូវកំណត់ដោយប្រកាសអន្តរក្រសួងរវាងរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុនិងរដ្ឋមន្ត្រីក្រសួងសាធារណការនិងដឹកជញ្ជូន។
យោងតាមមាត្រា២២ ក្នុងអនុក្រឹត្យបានបញ្ជាក់ថា «ម្ចាស់កម្មសិទ្ធិយានជំនិះ មានសិទ្ធិស្នើសុំរក្សាលេខចុះបញ្ជីយានជំនិះ ដែលកំពុងប្រើប្រាស់ សម្រាប់ចុះបញ្ជីលើយានជំនិះថ្មីរបស់ខ្លួនបាន ស្របតាមបែបបទ និងនីតិវិធីនៃការចុះបញ្ជីយានជំនិះ ការផ្តល់ផ្លាកលេខសម្គាល់ យានជំនិះ និងការលុបចេញពីបញ្ជីយានជំនិះ និងត្រូវបង់កម្រៃសេវាសាធារណៈ ដែលកំណត់ដោយប្រកាសអន្តរក្រសួង រវាងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងសាធារណការ និងដឹកជញ្ជូន»។
លើសពីនេះ នៅក្នុងអនុក្រឹត្យថ្មីនេះ ក៏បានបញ្ជាក់ពីការអនុញ្ញាតឱ្យម្ចាស់យានជំនិះ អាចធ្វើផ្លាកលេខពិសេស ទៅតាមការចង់បានរបស់ខ្លួនផងដែរ។ ផ្លាកលេខពិសេសនេះ គឺម្ចាស់យានយន្តអាចកំណត់អក្សរ ឬលេខទៅតាមអ្វីដែលខ្លួនចង់បាន ហើយក៏អាចយកផ្លាកលេខនេះ ទុកប្រើប្រាស់ពេញមួយជីវិតផងដែរ។
នៅក្នុងអនុក្រឹត្យនេះបានបញ្ជាក់ថា ផ្លាកលេខយានយន្តពិសេសនេះ ត្រូវសរសេរអក្សរខ្មែរបញ្ជាក់ថា «កម្ពុជា» ពីខាងលើ ហើយផ្នែកកណ្តាលជាលេខចុះបញ្ជីមានលេខឬ/និងអក្សរឡាតាំងមិនលើសពី៨ខ្ទង់ និងផ្នែកខាងក្រោមសរសេរអក្សរឡាតាំង «CAMBODIA» នៅពីក្រោមបន្ទាប់ផ្តេក។
យោងតាមមាត្រា២៨ បានបញ្ជាក់ថា ម្ចាស់ហាងលក់យានយន្តត្រូវដាក់ពាក្យសុំលិខិតអនុញ្ញាតបំពេញបែបបទចុះបញ្ជីយានជំនិះនៅអគ្គនាយកដ្ឋានដឹកជញ្ជូនផ្លូវគោកដើម្បីផ្ដល់ប័ណ្ណសម្គាល់យានជំនិះនិងស្លាកលេខសម្គាល់យានជំនិះតាមប្រព័ន្ធស្វ័យប្រវត្តិកម្មនៅហាងលក់យាន្តយន្ត។ ម្ចាស់ហាងលក់យានយន្តមានសិទ្ធិចាប់តំណាងស្របច្បាប់ដោយធ្វើលិខិតផ្ទេរសិទ្ធិស្នើសុំលិខិតអនុញ្ញាត។ បែបបទនិងនីតិវិធីស្នើសុំលិខិតអនុញ្ញាតបំពេញបែបបទចុះបញ្ជីយានជំនិះត្រូវកំណត់ដោយប្រកាសស្ដីពីបែបបទនិងនីតិវិធីនៃការចុះបញ្ជីយានជំនិះការផ្ដល់ស្លាកលេខសម្គាល់យានជំនិះនិងការលុបចេញពីបញ្ជីយានជំនិះ។
យោងតាមមាត្រា ២៩ បានបញ្ជាក់ថា គ្រប់ម្ចាស់ហាងលក់យានយន្តគ្រប់ប្រភេទមានកាតព្វកិច្ចបំពេញបែបបទចុះបញ្ជីយានជំនិះសុំប័ណ្ណសម្គាល់យានជំនិះនិងសុំស្លាកលេខសម្គាល់យានជំនិះឱ្យបានចប់សព្វគ្រប់មុននឹងប្រគល់យានជំនិះឲ្យអ្នកទិញ។
មាត្រា ៣០ បានបញ្ជាក់ថា ម្ចាស់ហាងលក់យានយន្តត្រូវទទួលខុសត្រូវចំពោះមុខច្បាប់ជាធរមានលើរាល់បាតុភាពទាំងឡាយណាដែលខុសច្បាប់ទាក់ទងនឹងការលក់យានជំនិះដូចជាគ្មានបង្កាន់ដៃពន្ធបង្កាន់ដៃពន្ធមិនត្រឹមត្រូវយានជំនិះចោលកម្មយានជំនិះជាប់លេខតួលេខម៉ាស៊ីនកែលេខកុងទ័រ៕ ដោយ៖កូឡាប