ភ្នំពេញ ៖ គណៈកម្មាធិការគោលនយោបាយសេដ្ឋកិច្ច និង ហិរញ្ញវត្ថុ (គ.ស.ហ) ដឹកនាំដោយលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធាន គ.ស.ហ មានរៀបចំកិច្ចប្រជុំអន្តរក្រសួង ដើម្បីពិនិត្យ និង ពិភាក្សាលើរបៀបវារៈសំខាន់ៗចំនួនពីរ ៖ “សេចក្តីព្រាងយុទ្ធសាស្ត្រជាតិស្តីពីបរិយាប័ន្នហិរញ្ញវត្ថុ ឆ្នាំ ២០១៩-២០២៥” និង “សេចក្តីព្រាងច្បាប់ស្តីពីរបបសន្តិសុខសង្គម” ដោយមានការអញ្ជើញចូលរួមពីឯកឧត្តម លោកជំទាវ និងថ្នាក់ដឹកនាំ ជាន់ខ្ពស់ក្រសួង-ស្ថាប័នពាក់ព័ន្ធរបស់រាជរដ្ឋាភិបាល, នាព្រឹកថ្ងៃទី ០៤ ខែ មិថុនា ឆ្នាំ ២០១៩, នៅទីស្ដីការក្រសួងសេដ្ឋកិច្ច និងហិរញ្ញវត្ថុ ។
“សេចក្តីព្រាងយុទ្ធសាស្ត្រជាតិស្ដីពីបរិយាប័ន្នហិរញ្ញវត្ថុឆ្នាំ 2019 – 2025” និង “សេចក្តីព្រាងច្បាប់ស្ដីពីរបបសន្តិសុខសង្គម ” គឺឯកសារមានសារៈសំខាន់របស់រាជរដ្ឋាភិបាលលើការងារតែទម្រង់ដែលមានភាពប្រទាក់ក្រឡាគ្នាគាំទ្រដល់គោលនយោបាយម៉ាក្រូសេដ្ឋកិច្ច និងកំណើនសេដ្ឋកិច្ចប្រកបដោយចីរភាពដើម្បីឈានទៅសម្រេចឱ្យបាននូវចក្ខុវិស័យឆ្នាំ 2030 ក្នុងការប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់ នឹងធានាបានការអនុវត្តប្រកបដោយជោគជ័យនូវកម្មវិធីនយោបាយយុទ្ធសាស្ត្រចតុកោណដំណាក់កាលទី 4 ក៏ដូចជាយុទ្ធសាស្ត្រនានាដើម្បីជំរុញអភិវឌ្ឍសង្គម-សេដ្ឋកិច្ចកម្ពុជា ។
សេចក្តីព្រាងយុទ្ធសាស្ត្រជាតិស្ដីពីបរិយាប័ន្នហិរញ្ញវត្ថុឆ្នាំ 2019 – 2025 ៖ សេចក្តីព្រាងយុទ្ធសាស្ត្រផ្ដោតការយកចិត្តទុកដាក់លើការលើកកម្ពស់បរិយាប័ន្នហិរញ្ញវត្ថុនៅកម្ពុជា ដែលជាឧបករណ៍ទ្រទ្រង់ដល់ការអភិវឌ្ឍន៍ប្រកបដោយប្រសិទ្ធភាព “យុទ្ធសាស្ត្រអភិវឌ្ឍហិរញ្ញវត្ថុឆ្នាំ 2016- 2025″។ ក្នុងគោលដៅជំរុញលើកកម្ពស់ជីវភាពរស់នៅរបស់ប្រជាពលរដ្ឋតាមរយៈបរិយាប័ន្នហិរញ្ញវត្ថុ សេចក្តីព្រាងយុទ្ធសាស្ត្រ បាទបង្ហាញពីគោលនយោបាយចក្ខុវិស័យនិងទិសដៅក្នុងការជំរុញបរិយាប័ន្នហិរញ្ញវត្ថុ បង្កើនលទ្ធភាពទទួលបានសេវាហិរញ្ញវត្ថុផ្លូវការដែលមានគុណភាព កាត់បន្ថយអត្រាស្ត្រីដែលមិនទាន់ទទួលបានសេវាហិរញ្ញវត្ថុ និងពង្រឹងការប្រើប្រាស់សេវាហិរញ្ញវត្ថុផ្លូវការ ដើម្បីធ្វើឲ្យប្រសើរឡើងនូវសុខមាលភាពគ្រួសារក៏ដូចជាគាំទ្រដល់កំណើនសេដ្ឋកិច្ច។
សេចក្តីព្រាងគ្រួសារក៏បានរំលេចចេញជាសកម្មភាពអាទិភាពដូចជា លើកទឹកចិត្តឲ្យមានការសន្សំនៅតាមគ្រឹះស្ថានហិរញ្ញវត្ថុផ្លូវការ ជំរុញនូវនវានុវត្តន៍ផលិតផលឥណទានសម្រាប់សហគ្រាសធុនតូចបំផុត តូចនិងមធ្យមពង្រីកសមត្ថភាពប្រព័ន្ធទូទាត់ ពង្រីការផ្ដល់សេវាធានារ៉ាប់រងឲ្យបានទូលំទូលាយ ពង្រីកសមត្ថភាពនិយ័តករវិស័យហិរញ្ញវត្ថុនិងលើកកម្ពស់សិទ្ធិអតិថិជន បង្កើនតម្លៃភាពក្នុងវិស័យហិរញ្ញវត្ថុ។ យុទ្ធសាស្ត្រនិងផ្ដល់ផលប្រយោជន៍ ដល់ប្រជាពលរដ្ឋដែលពុំទាន់មានលទ្ធភាពទទួលបានសេវាហិរញ្ញវត្ថុផ្លូវការ ក៏ដូចជាសហគ្រាសធុនតូចបំផុតតូចនិងមធ្យមនៅឱកាសបង្កើតធុរកិច្ចបង្កើតលទ្ធភាពវិនិយោគនឹងទទួលបានសេវាប្រឹក្សាសេវាហិរញ្ញវត្ថុធាតុដើម។
ច្បាប់ស្ដីពីរបបសន្តិសុខសង្គម ៖ មានគោលបំណងបង្កើតឱ្យមានរបបសន្តិសុខសង្គមនៃព្រះរាជាណាចក្រកម្ពុជាក្នុងគោលដៅធានាឲ្យមានសមធម៌និងសាមគ្គីធម៌សង្គមក៏ដូចជាលើកកម្ពស់សុខុមាលភាពនិងជីវភាពរបស់ប្រជាពលរដ្ឋ។ ច្បាប់នេះមានគោលដៅកំណត់អំពីគោការណ៍ទូទៅ បែបបទយន្តការអនុវត្តន៍និងប្រព័ន្ធគ្រប់គ្រងរបបសន្តិសុខសង្គមដែលរួមមាន ផ្នែកប្រាក់សោធនផ្នែកថែទាំសុខភាពផ្នែកហានិភ័យការងារនិងផ្នែកនីកម្មសភាពការងារ។ ច្បាប់នេះមានវិសាលភាពអនុវត្តចំពោះបុគ្គលដែលស្ថិតនៅក្នុងវិស័យសាធារណៈ បុគ្គលទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារដោយរួមបញ្ចូលបុគ្គលិកធ្វើការតាមផ្លូវអាកាស និងនាវាសមុទ្រព្រមទាំងអ្នកបម្រើតាមផ្ទះនិងបុគ្គលស្វ័យនិយោជន៍។
ក្នុងកិច្ចប្រជុំនោះលោកឧបនាយករដ្ឋមន្ត្រីអូនព័ន្ធមុនីរ័ត្នបានវាយតម្លៃអំពីសារៈសំខាន់នៃយុត្តិសាស្ត្រនិងច្បាប់ទាំងពីរនេះព្រមទាំងបានពិភាក្សាស៊ីជម្រៅបន្ថែមទៀតលើខ្លឹមសារតាមផ្នែកនីមួយៗ ដើម្បីជាធាតុចូលបន្ថែមទៀតសម្រាប់ក្រុមការងារបន្តធ្វើការកែលម្អ។ លោកបណ្ឌិតសភាចារ្យដែលជាប្រធានអង្គប្រជុំបានថ្លែងវាយតម្លៃខ្ពស់ដល់ក្រុមការងារដែលបានខិតខំ សហការរៀបចំឯកសារដ៏មានសារៈសំខាន់ទាំងពីរនិងបានណែនាំឲ្យក្រុមការងាររៀបចំឯកសារទាំងពីរ និងក្រុមការងារអន្តរក្រសួងបន្តផ្ដល់កិច្ចសហការ និងធ្វើការផ្ទាល់ជាមួយអ្នកពាក់ព័ន្ធកែសម្រួលចំណុចដែលនៅខ្វះខាត ដើម្បីឱ្យឯកសារនេះកាន់តែមានលក្ខណៈពេញលេញអនុវត្តនិងគ្រប់ជ្រុងជ្រោយ៕ ដោយ ៖ កូឡាប