ប្រធានាធិបតីរុស្សី វ្លាដឺមៀ ពូទីន កាលពីថ្ងៃពុធម្សិលមិញនេះ បានរៀបចំឯកសារដាក់ជូនមន្ត្រីបោះឆ្នោត ដើម្បីចូលរួមប្រកួតប្រជែងក្នុងការបោះឆ្នោតថ្មីទៀតឆ្នាំក្រោយនេះ។ នេះបើតាមការចេញផ្សាយរបស់សារព៌តមានសិង្ហបុរី Channel News Asia នៅថ្ងៃព្រហស្បតិ៍នេះ។
ការរៀបចំឯកសាររបស់លោក ធ្វើឡើងតែមួយថ្ងៃប៉ុណ្ណោះក្រោយពេលអ្នកនយោបាយ អ្នកសិល្បៈ និងអ្នកកីឡាច្រើនជាង ៦០០នាក់បានគាំទ្រពីបំណងរបស់លោកក្នុងការចូលរួមប្រកួតប្រជែង។
បុរសខ្លាំង វ័យ ៦៥រូបនេះ ដែលនឹងត្រូវជួបគូប្រជែងបក្សប្រឆាំងតួចតាចប៉ុណ្ណោះក្នុងការបោះឆ្នោត នឹងឡើងកាន់តំណែងជាប្រធានាធិបតីរហូតដល់ឆ្នាំ ២០២៤ ដែលធ្វើឲ្យគាត់ក្លាយជាមេដឹកនាំរុស្សីដែលកាន់តំណែងយូរបំផុត បន្ទាប់ពីលោក Joseph Stalin ដែលជាមេដឹកនាំផ្តាច់ការ។
សូមរំលឹកផងដែរថា កាលពីដើមសប្តាហ៏នេះ ថ្នាក់ដឹកនាំបោះឆ្នោត បានហាមប្រាមមេដឹកនាំបក្សប្រឆាំងដ៏ធំក្នុងប្រទេស ឈ្មោះ Alexei Navalny មិនឲ្យចូលរួមប្រកួតប្រជែងក្នុងការបោះឆ្នោតជាមួយនឹងលោកពូទីនទេ ដោយចោទលោកពីបទកឹបកេងលុយរដ្ឋ ប៉ុន្តែលោកបញ្ជាក់ថាវាគឺជារឿងនយោបាយ។
លោក Alexei Navalny ត្រូវបានគេមើលឃើញថា ជាមេដឹកនាំបក្សប្រឆាំងដែលអាចមានឱកាសយកឈ្នះលោកពូទីន បានស្នើឲ្យមេដឹកនាំបក្សដទៃកុំឲ្យចូលរួមការបោះឆ្នោត៕ សុភ័ក្ត្រ