ភ្នំពេញ ៖ លោក ម៉ៅ ស៊ីណា ចៅក្រមជំនុំជម្រះ នៃសាលាដំបួងរាជធានីភ្នំពេញ នៅព្រឹកថ្ងៃទី៤ ខែមិថុនា ឆ្នាំ២០១៩ បានបើកសវនាការកាត់ទោសជនជាប់ចោទឈ្មោះ យិន ហេង ហៅ ចំប៉ីខ្មៅ ពាក់ព័ន្ធសំណុំរឿងញុះញង់ឲ្យមានការរើសអើង។ បន្ទាប់ពីសាកសួរដេញដោលអស់ជាច្រើនម៉ោង តុលាការបានសម្រេចលើកពេលប្រកាសសាលក្រមសំណុំរឿងនេះ នៅថ្ងៃទី២០ ខែមិថុនា ឆ្នាំ២០១៩។
នៅចំពោះមុខតុលាការ ជនជាប់ចោទឈ្មោះ យិន ហេង ហៅ ចំប៉ីខ្មៅ បានទទួលស្គាល់កំហុស និងបានសុំទោស ប្រជាពលរដ្ឋខ្មែរ ចំពោះការប្រើប្រាស់ពាក្យមិនសមរម្យនាពេលកន្លងមក។
គួររម្លឹកថា សមត្ថកិច្ចបានឃាត់ខ្លួនជនជាប់ចោទ ឈ្មោះ យិន ហេង (ហៅ ចំប៉ីខ្មៅ) នៅក្នុងខណ្ឌដូនពេញ កាលពីយប់ថ្ងៃទី៥ ខែកុម្ភៈ ឆ្នាំ២០១៩ ក្រោយពីជនជាប់ចោទរូបនេះបង្ហោះវីដេអូ ជេរប្រមាថពូជសាសន៍ខ្មែរ ព្រោះតែខឹងយុវជនមួយក្រុម ជិះម៉ូតូទៅខោកក្បាល។
បន្ទាប់ពីសមត្ថកិច្ចបញ្ជូនទៅតុលាការ ជនជាប់ចោទឈ្មោះ យិន ហេង ហៅ ចំប៉ីខ្មៅ ត្រូវតុលាការសម្រេចឃុំខ្លួនកាលពីថ្ងៃទី៦ ខែកុម្ភៈ ឆ្នាំ២០១៩ ក្រោមបទចោទ ញុះញង់ឲ្យមានការរើសអើង យោងតាមមាត្រា ៤៩៦ នៃក្រមព្រហ្មទណ្ឌ៕ ដោយ ៖ កូឡាប
