ខេត្តស្វាយរៀង ៖ មានករណីចោរលួចម៉ូតូរបស់ប្រជាពលរដ្ឋដោយដាក់ថ្នាំបំពុលសត្វឆ្កែងាប់ ៣ ក្បាល រួចចូលគាស់យកម៉ូតូបានសម្រេចនិងយកទៅដោយសុវត្ថិភាពកាលនៅយប់ថ្ងៃទី៤ ខែមិថុនា ឆ្នាំ២០១៩ ស្ថិតនៅភូមិវាល ឃុំគគីរសោម ស្រុកស្វាយទាប ខេត្តស្វាយរៀង។
តាមប្រភពព័ត៌មានពីម្ចាស់ផ្ទះដែលជាជនរងគ្រោះខាងលើបានឱ្យដឹហថា ៖ រូបគាត់មានឈ្មោះ ងិន បុលគ្រី ភេទប្រុស អាយុ ៣៣ឆ្នាំ នៅវេលាព្រលប់ៗថ្ងៃ៤ ខែមិថុនា ឆ្នាំ២០១៩ រូបគាត់និងប្រពន្ធ ព្រមទាំងបងប្អូនបានអង្គុយជួបជុំនិយាយគ្នាលេងនៅខាងក្រោមផ្ទះ រហូតដល់ម៉ោងជិត ៩និង០០ នាទីយប់ ទើបពួកគាត់បានឡើងទៅសម្រាកដេកលើផ្ទះអស់។
ប្រភពដដែលបានបន្តទៀតថា ៖ លុះដល់វេលាម៉ោងប្រហែល ២និង០០នាទី រំលងអាធ្រាតឈានចូលថ្ងៃទី៥ ខែមិថុនា ឆ្នាំ២០១៩រូបគាត់បានចុះមកក្រោមផ្ទះ ដើម្បីបត់ជើងនិងមើលឃ្លាំងដាក់របស់របរ ស្រាប់តែពេលនោះគាត់ក្រឡេកឃើញទ្វារបន្ទប់ក្រោមផ្ទះរបើក ពេលនោះគាត់បានបើកទ្វារចូលទៅក្នុងបន្ទប់ក៏មានការបាត់ម៉តូ ឌ្រីមសង់ស៊េរីឆ្នាំ ២០១៨ មួយគ្រឿង។
ប្រភពខាងលើបន្តទៀតថា៖ ផ្ទះរបស់គាត់មានរបងត្រឹមត្រូវ ចំណែកបន្ទប់ចាក់សោរសុទ្ធតែសោរសូឡិច រីឯម៉ូតូមិនត្រឹមតែចាក់សោរកទេ គឺចាក់ទាំងសោរជន្ទល់ម៉ូតូថែមទៀត ប៉ុន្តែចោរនៅតែលួចបានដោយសុវត្ថិភាព។
ហើយក្រៅពីផ្ទះរងគ្រោះបាត់ម៉ូតូខាងលើនេះ គឺមានផ្ទះប្រជាពលរដ្ឋនៅក្បែរផ្ទះជនរងគ្រោះក៏មានការបំពុលសត្វឆ្កែងាប់ចំនួន ៣ក្បាលថែមទៀតផងដែរ ដោយប៉ុនប៉ងលួចទៀត ប៉ុន្តែមិនបានសម្រេច។
ពាក់ព័ន្ធករណីខាងលើក្រុមអ្នកសារព័ត៌មានយើងមិនអាចសុំការបំភ្លឺពីលោកមេប៉ុស្តិ៍រដ្ឋបាលឃុំគគីរសោមបាននោះទេ ដោយទូរស័ព្ទមិនចូលមិនលើក។
ប្រពលរដ្ឋរងគ្រោះខាងលើស្នើរសុំអោយសមត្ថកិច្ចតាមរកមុខសញ្ញាក្រុមចោរលួចគាស់ផ្ទះខាងលើនេះផង ដើម្បីយកផ្តន្ទាទោសតាមផ្លូវច្បាប់៕ ដោយ ៖ វ៉ៃកូ
