អតីតនាយករដ្ឋមន្ត្រីថៃ លោក Abhisit Vejjajiva នៅថ្ងៃពុធនេះបានប្រកាសលាលែងពីសមាជិករដ្ឋសភា។ ការលាលែងនេះធ្វើឡើងមុនពេលមានការបោះឆ្នោតជ្រើសរើសនាយករដ្ឋមន្ត្រីថ្មីថៃ។
លោក Abhisit Vejjajiva ដែលជាអតីតប្រធានបក្សប្រជាធិបតេយ្យ បាននិយាយថា រូបលោកត្រូវតែគោរពតាមពាក្យសន្យា។
លោកបានធ្វើការសុំទោសទៅដល់ប្រជាជនទាំងអស់ដែលបានបោះឆ្នោតជូនបក្សលោក និងបេក្ខជនទាំងអស់នៅក្នុងការបោះឆ្នោតកាលពីពេលកន្លងទៅនេះ ដែលធ្វើឲ្យលោកបរាជ័យក្នុងយកការសន្យារបស់លោកទៅអនុវត្ត។
លោកថ្លែងថា គាត់បានព្យាយាមអស់ពីលទ្ធភាពហើយ ប៉ុន្តែបក្សប្រជាធិបតេយ្យ បានសម្រេចចិត្តនៅថ្ងៃអង្គារម្សិលមិញនេះ ដើម្បីចូលរួមជាមួយនឹងបក្ស Palang Pracharath គណបក្សដែលគាំទ្រដោយរបបយោធា។
សូមបញ្ជាក់ថា រដ្ឋាសភា និងព្រឹទ្ធសភាថៃ កំពុងបន្តកិច្ចការប្រជុំនៅថ្ងៃពុធនេះ ដែលសមាជិកសភាចំនួន ៥០០នាក់ និង សមាជិកព្រឹទ្ធសភាចំនួន ២៥០នាក់នឹងធ្វើការបោះឆ្នោតជ្រើសតាំងនាយករដ្ឋមន្ត្រីថ្មី៕
អត្ថបទប្រែសម្រួលដោយ៖ សុភ័ក្រ
ប្រភព៖ CGTN