លោកប្រាយុទ្ធ ចាន់អូចា ត្រូវបានបោះឆ្នោតឲ្យក្លាយជានាយករដ្ឋមន្ត្រីថ្មីរបស់ថៃ កាលពីថ្ងៃពុថម្សិលមិញនេះ ទោះមិនបានឈ្នះការបោះឆ្នោតភាគច្រើនកាលពីខែមីនាកន្លងទៅនេះ។ នេះបើតាមការចុះផ្សាយរបស់ BBC នៅថ្ងៃរសៀលនេះ។
អតីតឧត្តមសេនីយ៍ចូលនិវត្តន៍ថៃរូបនេះ បានក្លាយជានាយករដ្ឋមន្ត្រីបណ្តោះអាសន្ន ចាប់តាំងពីលោកបានដឹកនាំរដ្ឋប្រហារយោធាទម្លាប់អ្នកស្រី យីង ឡាក់ កាលពី ៥ឆ្នាំមុន។
ទោះមិនបានឈ្នះការបោះឆ្នោតក៏ដោយ ក៏គេមើលឃើញមុនថា លោក ប្រាយុទ្ធនឹងនៅតែបន្តធ្វើជានាយករដ្ឋមន្ត្រីដដែល ខណៈដែលក្នុងព្រឹទ្ធសភាត្រូវបានក្តោបក្តាប់ស្ទើរទាំងស្រុងដោយរបបយោធា។
សូមបញ្ជាក់ថា ក្នុងការបោះឆ្នោតកាលពីខែមីនាកន្លងទៅនេះ មិនមានគណបក្សនយោបាយណាមួយឈ្នះបានសំឡេងភាគច្រើនទេ។
គណបក្សភឿថៃ ដែលគាំទ្រដោយអតីតនាយករដ្ឋមន្ត្រីថៃ ថាក់ស៊ីន បានឈ្នះកៅអីច្រើនជាងគេនៅក្នុងរដ្ឋសភា ប៉ុន្តែព្រឹទ្ធសភាទាំងមូលត្រូវបានតែងតាំងដោយរដ្ឋាភិបាលយោធា ដូច្នេះបើតាមសម្លេងបោះឆ្នោត ដោយរដ្ឋសភា និងព្រឹទ្ធសភា គេមើលឃើញថា លោកប្រយុទ្ធត្រូវបានជាប់ឆ្នោតជានាយករដ្ឋមន្ត្រី ទោះមិនបានឈ្នះកៅអីភាគច្រើន ក្នុងរដ្ឋសភាក៏ដោយ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC