ភ្នំពេញ ៖ សមត្ថកិច្ចនគរបាលកំពុងតែតាមស្រាវជ្រាវ និងស្វែងរកបុគ្គលម្នាក់ក្លែងបន្លំជានគរបាលពាក់ព័ន្ធការបោកប្រាស់ ឬយកលុយរត់ការចូលក្របខ័ណ្ឌនគរបាល ដើម្បីធ្វើការឃាត់ខ្លួន និងសាកសួរ បន្ត ។
អ្នកនាំពាក្យអគ្គស្នងការដ្ឋាននគរបាលជាតិ កាលពីថ្ងៃទី៥ មិថុនា សេចក្តីបំភ្លឺរបស់បានលើកឡើងថា “អែកតាមការស្រាវជ្រាវ និង ត្រួតពិនិត្យរួចមកបុគ្គលឈ្មោះ ឆាយ ឆដា ដែលប្រើឯកសណ្ឋាននគរបាល និងត្រូវបានបណ្តាញសង្គមចុះផ្សាយថា ពាក់ព័ន្ធការបោក ប្រាស់ឬយកលុយ ដើម្បីរត់ការចូលក្របខ័ណ្ឌនគរបាលនោះ មិនស្ថិតក្នុងក្របខ័ណ្ឌនគរបាលជាតិនោះទេ ។ បុគ្គលនេះគឺជាមនុស្សក្លែងបន្លំជានគរបាល ។ បច្ចុប្បន្ន សមត្ថកិច្ចកំពុងតែតាមស្រាវជ្រាវ និងស្វែងរកបុគ្គលនេះដើម្បីធ្វើការឃាត់ខ្លួន និងសាកសួរបន្ត “។
នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ បានបញ្ជាឲ្យស្នងការរាជធានី-ខេត្តទាំងអស់ ត្រូវស្រាវជ្រាវជាបន្ទាន់ និងចាប់ខ្លួនបុរសម្នាក់ ដែលបានធ្វើសកម្មភាពដើរបោកប្រាក់ប្រជាពលរដ្ឋ ដើម្បីរត់ការចូលក្របខ័ណ្ឌមន្ដ្រីនគរបាលជាតិ ដោយមិនបាច់ឆ្លងកាត់ការប្រឡងជ្រើសរើសនោះឡើយ។
ក្រោយទទួលបានព័ត៌មាននេះ នាយកដ្ឋានបុគ្គលិក នៃអគ្គស្នងការដ្ឋាននគរបាលជាតិ ក៏បានស្រាវជ្រាវដូចគ្នាផងដែរ ទៅលើបុគ្គលរូបនោះ ដែលមានរូបថតពាក់ឯកសណ្ឋានគរបាលជាតិដែរនោះ គឺមិនមានឈ្មោះក្នុងក្របខ័ណ្ឌមន្ដ្រីនគរបាលជាតិនោះទេ។
មន្ដ្រីនគរបាលជាតិ នៅព្រឹកថ្ងៃទី០៦ ខែមិថុនា ឆ្នាំ២០១៩នេះបានឲ្យដឹងថា «នាយឧត្តមសេនីយ៍ អគ្គស្នងការ បានដាក់បទបញ្ជាឲ្យស្នងការរាជធានី-ខេត្ត ដែលបង្ហោះតាមបណ្ដាញសង្គមថា រើសក្របខ័ណ្ឌចូលប៉ូលីសយកលុយ។ ឥឡូវខាងបុគ្គលិកត្រួតពិនិត្យទៅឈ្មោះនេះ មិនមានក្នុងក្របខ័ណ្ឌប៉ូលីសនោះទេ ដូច្នេះគ្រប់ស្នងការទាំងអស់ត្រូវស្រាវជ្រាវរក ហើយឃាត់ខ្លួនជាបន្ទាន់»។
យ៉ាងណាក៏ដោយ បុគ្គលដែលនាយឧត្តមសេនីយ៍ នេត សាវឿន បញ្ជាឲ្យស្រាវជ្រាវ និងចាប់ខ្លួនជាបន្ទាន់នោះ ត្រូវបានអ្នកប្រើប្រាស់បណ្ដាញសង្គមទម្លាយថា មានឈ្មោះ ឆាយ ឆដា និងប្រើប្រាស់គណនី Facebook ឈ្មោះ Chhay Chorda ប៉ុន្ដែគេមិនបានបញ្ជាក់ថា បុគ្គលរូបនេះមានទីលំនៅនៅកន្លែងណានោះទេ៕ ដោយ៖កូឡាប
