ខេត្តស្វាយរៀង ៖ ឈ្មួញទុច្ចរិតលួចនាំជ្រូករស់ពីប្រទេសវៀតណាមឆ្លងដែនចូលតាមច្រករបៀង មកស្រុកស្វាយជ្រំ ត្រូវក្រុមចល័ត នៃការិយាល័យផលិតកម្ម និងបសុព្យាលមន្ទីរកសិកម្មខេត្ត បង្ក្រាបបានចំនួន ២០ ក្បាល ។ ករណីបង្ក្រាបនេះកើតឡើងនៅវេលាម៉ោង៦និង៣០នាទីព្រឹកថ្ងៃទី៥ ខែមិថុនា ឆ្នាំ២០១៩ នៅត្រង់ចំណុចភូមិអង្គាសដី ឃុំតាសួស ស្រុកស្វាយជ្រំ។
បើតាមមន្ត្រីការិយាល័យផលិតកម្មនិងបសុព្យាបាលខេត្តបានឲ្យដឹងថា ក្រុមចលត្រត្រួតពិនិត្យទប់ស្កាត់ចរាចរណ៍សត្វខុសច្បាប់ របស់ការិយាលយ័ផលិតកម្មនិងបសុព្យាបាលខេត្តដឹកនាំដោយលោកប៉ែន ចាន់ធី ប្រធានការិយាល័យផលិតកម្ម និងបសុព្យាបាលខេត្តស្វាយរៀងបានល្បាតស្ទាក់ចាប់រថយន្តមួយគ្រឿងម៉ាកសាំយ៉ុង ពាក់ស្លាកលេខ កំពង់ចាម 2 A 4379 ដឹកជ្រូករស់ខុសច្បាប់ពីប្រទេសវៀតណាមចំនួន ២០ ក្បាល នៅត្រង់ចំណុចភូមិអង្គាសដី ឃុំតាសួស ស្រុកស្វាយជ្រំ ខេត្តស្វាយរៀង វត្ថុតាងនឹងសត្វបានរក្សាទុកនៅមន្ទីរកសិកម្មរុក្ខាប្រមាញ់និងនេសាទខេត្ត ដើម្បីអនុវត្តតាមនិតិវិធីនៃច្បាប់។
លោក ប៉ែន ចន្ធី ប្រធានការិយាល័យផលិតកម្មនិងបសុព្យាបាលខេត្តបានមានប្រសាសន៍អោយដឹងថា ក្រុមឈ្មួញបានលួចនាំជ្រូករស់ពីប្រទេសវៀតណាមចូលមកតាមច្រករបៀងភូមិក្រាំងលាវ ស្រុកកំពង់ត្របែក ខេត្តព្រៃវែង ក៏ប៉ុន្តែត្រូវក្រុមល្បាតនៃអគ្គនាយយកដ្ឋានសុខភាពសត្វនិងផលិតកម្មសត្វសហការជាមួយមន្ត្រីការិយាល័យផលិតកម្មនិងបសុព្យាបាលនៃមន្ទីរកសិកម្មខេត្តព្រៃវែងស្ទាក់ចាប់ទើបក្រុមឈ្មួញដឹកជ្រូកគេចចូលមករដ្ឋបាលស្រុកស្វាយជ្រំ ដែលមានព្រំប្រទល់ជាប់គ្នាទើបសមត្ថកិច្ចពេទ្យសត្វខេត្តស្វាយរៀងតាមបង្ក្រាបឈ្មួញក៏ព្យាមបើករថយន្តគេចរហូតមកដល់ចំណុចកើតហេតុខាងលើឈ្មួញបាននាំគ្នាលើកជ្រូកទម្លាក់នៅមុខផ្ទះប្រជាពលរដ្ឋដើម្បីបង្វែងដានខណៈកំពុងលើកជ្រូកទម្លាក់ពីលើរថយន្តបានជាង១០ក្បាល សមត្ថកិច្ចយើងទៅទាន់ក្រុមឈ្មួញ ក៏នាំគ្នារត់ចោលរថយន្តនិងទុកជ្រូកចោលនៅភូមិអង្គាសដីតែម្តង។
លោក ប៉ែន ចន្ធី បន្តទៀតថា ដោយឈ្មួញទុករថយន្តនិងជ្រូកចោលសមត្ថកិច្ចក៏លើកជ្រូកដាក់លើរថយន្តវិញនិងហៅជាងសោធ្វើសោ រួចយករថយន្ត និងជ្រូកមករក្សាទុក្ខនៅមន្ទីរកសិកម្មខេត្តនិងបូមឈាមជ្រូកទាំង២០ក្បាល យកទៅពិនិត្យនៅមន្ទីរពិសោធន៍រាជធានីភ្នំពេញបើរកឃើញថា មានជម្ងឺយើងនិងកំទេចចោលបើគ្មានជម្ងឺ ត្រូវធ្វើការផាកពិន័យតាមច្បាប់ពេទ្យសត្វរួចប្រគល់ឲ្យម្ចាស់វិញ។
ហើយការផាកពិន័យនេះគឺជាប្រាក់១៥លានរៀលលើកទី១ បើមិនរាងចាលពិន័យគុណនិងពីស្មើ៣០លានរៀល។ ចំពោះម្ចាស់ជ្រូកនេះគឺសង្ស័យជាម្ចាស់ជ្រូកដែលទើបតែចាប់ផាកពិន័យកាលពីខែឧសភាកន្លងទៅ ក៏ប៉ុន្តែអ្នកបើកបររថយន្តរត់គេចបាត់ប្តូរឲ្យអ្នកផ្សេងមកចូលខ្លួនដោះស្រាយ ហើយសារភាពថាពួកគេប្រមូលទិញតាមផ្ទះដែលមានអ្នករកស៊ីដឹកជ្រូកតាមម៉ូតូពីប្រទេសវៀតណាមមកលក់ឲ្យមិនដឹងថាដឹកចូលតាមច្រកណានោះទេ។
ហើយកាលពីសប្តាហ៍មុនមន្ត្រីជំនាញបានស្ទាក់ចាប់បានកូនជ្រូករស់ចំនួន ៥០ ក្បាល ដែលឈ្មួញលួចដឹកនាំចូលមកក្នុងស្រុកខ្មែរខុសច្បាប់យកទៅបូមឈាមពិនិត្យនៅមន្ទីរពិសោធន៍អគ្គនាយកដ្ឋានសុខភាពសត្វក្រសួងកសិកម្មតែគ្មានជម្ងឺទេ ហើយមកដល់ថ្ងៃទី៥ មិថុនានេះពុំទាន់ឃើញម្ចាស់ជ្រូកចូលមកដោះស្រាយនិងបង់ប្រាក់ផាកពិន័យទេ។
ចំណែកប្រជាពលរដ្ឋក្នុងខេត្តស្វាយរៀងលើកឡើងថា ជារឿយៗគេតែងតែឃើញមន្ត្រីជំនាញស្ទាក់ចាប់រថយន្តដឹកសត្វជ្រូករស់ដោយខុសច្បាប់នាំចូលមកពីប្រទេសជិតខាងចូលក្នុងភូមិសាស្ត្រទឹកដីខេត្តស្វាយរៀងហើយការចាប់ឃាត់រថយន្តដឹកសត្វជ្រូករស់ទាំងអស់នោះគ្រាន់តែបូមឈាមដើម្បីយកទៅពិនិត្យនៅមន្ទីរពិសោធន៍នៅរាជធានីភ្នំពេញហើយរកឃើញថាគ្មានជង្ងឺនោះគ្រាន់តែផាកពិន័យហើយអាចនាំសត្វជ្រូករស់ទាំងអស់ទៅកាប់សាច់វិញដដែលមិនឃើញមានឃាត់ខ្លួនថៅកែឬម្ចាស់នាំសត្វជ្រូកទាំងអស់ចូលតុលានោះទេ ទើបពួកឈ្មួញមិនរាងចាល។
ប្រភពខាងលើបានបន្តទៀតថា ៖ នាពេលថ្មីនេះមានកើតជង្ងឺប៉េសអាហ្វ្រិចដ៏កាចសាហាវ សូម្បីតែប្រទេសវៀតណាមផ្ទាល់សឹងតែលែងហានទទួលទានសាច់ជ្រូក ប៉ុន្តែស្រុកខ្មែរនៅតែមានឈ្មួញលួចដឹកតាមចិត្តដដែលបើចាប់បានបូមឈាមយកទៅពិសោធន៍ហើយគ្មានជម្ងឺធ្វើការផាកពិន័យជាការស្រេច គ្មានទោសទណ្ឌអ្វីទាំងអស់ ដូច្នេះហើយបានជាឈ្មួញទាំងអស់នៅហានលួចដឹកជ្រូកវៀតណាមចូលដដែល។
ប្រជាពលរដ្ឋនិងមន្ត្រីរាជការសូមអោយក្រសួងកសិកម្មរុក្ខាប្រមាញ់ និងនេសាទ មេត្តាបង្កើតឲ្យមានច្បាប់សម្រាប់ដាក់ទោសដល់ក្រុមឈ្មួញដែលលួចដឹកសត្វជ្រូករស់ខុសច្បាប់ទាំងអស់ដើម្បីឲ្យរាងចាល។ បើពុំដូច្នោះទេឈ្មួញនៅតែលួចនាំសត្វជ្រូកចូលមកកាប់សាច់លក់ធ្វើឲ្យព្រួយបារម្មណ៍ពីសុខភាពអ្នកបរិភោគខ្លាំងណាស់ ហើយបើទប់ស្កាត់មិនបានធ្លោយប៉ះចំជ្រូកមានជម្ងឺ តើអ្នកណាទទួលខុសត្រូវទាន៕ ដោយ ៖ វ៉ៃកូ