ភ្នំពេញ ៖ អភិបាលរាជធានីភ្នំពេញនិងជាប្រធានគណៈកម្មាធិការសាខាកាកបាទក្រហមរាជធានីភ្នំពេញលោកឃួងស្រេងបានជំរុញអោយមន្ត្រីសាខាកាកបាទក្រហមរាជធានីភ្នំពេញទាំងអស់រួមចិត្តរួមថ្លើមគ្នាក្នុងការជួយជនរងគ្រោះនិងជនងាយរងគ្រោះនៅភ្នំពេញអោយបានកាន់តែប្រសើរឡើងទៅតាមការដឹកនាំរបស់សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា។
លោកឃួងស្រេងបានជំរុញបែបនេះកាលពីរសៀលថ្ងៃទី៥ មិថុនា ក្នុងឱកាសដែលលោកអញ្ជើញសំណេះសំណាលជាមួយមន្ត្រីនៃសាខាកាកបាទក្រហមរាជធានីភ្នំពេញថ្នាក់ដឹកនាំនិងមន្ត្រីបុគ្គលិកសាខាទាំងអស់នៅទីស្នាក់ការសាខាកាកបាទក្រហមរាជធានីភ្នំពេញ។
នៅក្នុងឧិកាសសំណេះសំណាលនោះលោក ឃួង ស្រេង ប្រធានគណកម្មាធិការសាខាកាកបាទក្រហមរាជធានីបានលើកឡើងថាកាកបាទក្រហមកម្ពុជាក្រោមការដឹកនាំរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាតែងតែផ្តល់ជូននិងយកអំណោយមនុស្សធម៌ចែកជូនដល់អ្នករងគ្រោះដោយមិនប្រកាន់រើសអើងនៅទូទាំងប្រទេស។
លោកប្រធានគណៈកម្មាធិការសាខា ក៏បានថ្លែងនូវការកោតសរសេីរចំពោះមន្ត្រីបុគ្គលិកសាខាទាំងអស់ដែលបានខិតខំបំពេញការងារនារយៈពេលកន្លងមកព្រមទាំងបានផ្តល់អនុសាសន៍ជំរុញតម្រង់ទិសដល់មន្ត្រីប្រតិបត្តិសាខាបន្តខិតខំប្រឹងប្រែងបំពេញភារកិច្ចរបស់ខ្លួនប្រកបដោយការទទួលខុសត្រូវខ្ពស់ត្រូវមានសាមគ្គីភាពឯកភាពក្នុងស្មារតីក្រុមដើម្បីធ្វេីឲ្យសាខាកាកបាទក្រហមកម្ពុជារាជធានីភ្នំពេញកាន់តែមានសមត្ថភាពនិងលទ្ធភាពគ្រប់គ្រាន់ដែលសក្តិសមជាជំនួយការឲ្យអាជ្ញាធរសាធារណៈលើវិស័យមនុស្សធម៌ក្នុងការឆ្លើយតបទៅនឹងតម្រូវការជាក់ស្តែង នៃប្រតិបត្តិការជួយប្រជាពលរដ្ឋរងគ្រោះ និងងាយរងគ្រោះបំផុតនៅក្នុងរាជធានីភ្នំពេញ៕ ដោយ៖កូឡាប