សម្តេចនាយករដ្ឋមន្ត្រី ហ៊ុន សែន បានអំពាវនាវឲ្យពលរដ្ឋទូទាំងប្រទេស ចូលរួមពិសានំបញ្ចុកនៅថ្ងៃទី៩ ខែមិថុនា។ សម្តេចនាយករដ្ឋមន្ត្រី ក៏ប្រាប់ឲ្យពលរដ្ឋប្រុងប្រយ័ត្ន ដោយខ្លាចពុលនំបញ្ចុក ព្រោះកន្លងមកធ្លាប់មានករណីនេះកើតឡើង។
ក្នុងពិធីចែកសញ្ញាបត្រដល់និស្សិតនៃសាកលវិទ្យាល័យពុទ្ធិសាស្ត្រ នាព្រឹកថ្ងៃទី៦ មិថុនានេះ ប្រមុខរដ្ឋាភិបាល បង្គាប់ឲ្យក្រសួងសុខាភិបាល តាមដាននិងយកចិត្តទុកពីរឿងនេះ។ ប្រមុខរដ្ឋាភិបាល ថ្លែងដូច្នេះថា សង្ឃឹមថា នឹងគ្មានរឿងអ្វីកើតឡើងទៅចុះ។ ហើយបើបានធ្វើនំបញ្ចុកខ្លួនឯងនៅតាមភូមិ តាមវត្ត គឺល្អតែម្តង។
សម្តេចតេជោ ហ៊ុន សែន បានថ្លែងថា យុទ្ធនាការហូបនំបញ្ចុកសាមគ្គី និងឯកភាពជាតិ បានធ្វើឱ្យនំបញ្ចុក ដែលជាផលិតផលខ្មែរនេះត្រូវប៉ាន់ ហើយអាចនឹងមានការផលិតនំបញ្ចុករហូតដល់ រាប់ពាន់តោនក៏ថាបាន។ ទោះជាយ៉ាងនេះក្តី សម្តេចបានមើលឃើញថា អតីតប្រឆាំង ក៏បានឆ្លៀតឱកាសកេងចំណេញ ដោយវិភាគថា យុទ្ធនាការដូចគ្នានេះជំរុញឱ្យភាគីទាំងពីរ ឈានទៅការចរចានយោបាយ។
សម្តេចតេជោ ហ៊ុន សែន បានបញ្ជាក់ថា សុំកុំយកបញ្ហាដែលខ្ញុំនិយាយនេះ ធ្វើជាការវិភាគអ្វីផ្សេង ក្រៅពីរឿងស៊ីនំបញ្ចុក ព្រោះអ្នកខ្លះគិតថា វាជាជំហានទៅដល់ការចរចានយោបាយស្អីៗ សុំកុំភាន់ច្រឡំ ខ្ញុំនិយាយតែរឿងនំបញ្ចុកសុទ្ធសាធ និងសាមគ្គីភាព ឯកភាពជាតិ តាមរយៈការទទួលទាននំបញ្ចុកថ្ងៃ៩ មិថុនានេះ តែម្តង។
កាលពីថ្ងៃទី០៣ ខែមិថុនា ឆ្នាំ២០១៩ បន្ទាប់ពីសម្តេចតេជោ ហ៊ុន សែន ប្រកាសឱ្យសមាជិកគណបក្សប្រជាជនកម្ពុជា បើកយុទ្ធនាការហូបនំបញ្ចុកទូទាំងប្រទេស លោក អេង ឆៃអ៊ាង បានបង្ហោះរូបលោក សម រង្ស៉ី ជាមួយនឹងសម្តេចតេជោ ហ៊ុន សែន ហើយបង្ហាញអំពីបំណងចង់ឱ្យមេដឹកនាំទាំងពីរ អង្គុយទទួលទាននំបញ្ចុកជាមួយគ្នា។
លោកបានបង្ហោះនៅលើ Facebook យ៉ាងដូច្នេះថា៖ «ប្រសិនបើ លោក ហ៊ុន សែន និងលោក សម រង្សុី អង្គុយទទួលទាននំបញ្ចុកជាមួយគ្នា នោះទិវានំបញ្ចុកនឹងក្លាយជា ទិវាផ្សះផ្សា និងបង្រួបបង្រួមជាតិ ។ អ្នកនយោបាយ គ្មានសត្រូវ ឬមិត្ត នឹងគ្នា មួយជីវិតឡើយ!»។
ចំណែក លោក សម រង្ស៉ី ក៏បានអំពាវនាវឱ្យសមាជិកខ្លួនទទួលទាននំបញ្ចុកជុំគ្នាដោយរីករាយ នៅថ្ងៃអាទិត្យខាងមុខនេះផងដែរ។
លោកបានបញ្ជាក់ថា៖ «ថ្ងៃអាទិត្យ ទី០៩ មិថុនា ខាងមុខនេះ សូមបងប្អូនជនរួមជាតិ និងកូនក្មួយទាំងអស់ នៅប្រទេសកម្ពុជា ជួបជុំគ្នាពិសារនំបញ្ចុកជាមួយគ្នា យ៉ាងសប្បាយរីករាយទាំងអស់គ្នា ដោយគ្មានការភ័យខ្លាចអ្វីឡើយ។ សូមបងប្អូននិងកូនក្មួយ អញ្ជើញអ្នកជិតខាងមកទទួលទាននំបញ្ចុកនេះ ជាមួយយើងផង ហើយបើគេអញ្ជើញយើងទៅហូបជាមួយគេ សូមអញ្ជើញទៅដោយចិត្តរីករាយ ក្នុងស្មារតីភាតរភាព ពីព្រោះយើងទាំងអស់គ្នា ជាមហាគ្រួសារខ្មែរតែមួយ»។
ដោយមើលឃើញអំពីការប្រើប្រាស់យុទ្ធនាការហូបនំបញ្ចុក ក្នុងគោលដៅទុច្ចរិតបែបនេះ សម្ដេចតេជោ ហ៊ុន សែន បានបង្វែរព្រឹត្តិការណ៍ហូបនំបញ្ចុកទៅជារឿងល្អឡើងវិញ ក្នុងគោលដៅសាមគ្គី និងឯកភាពជាតិ។ សម្តេចបានលើកឡើងថា ការហូរនំបញ្ចុកមិនអាចក្លាយទៅជាការបំបែកបំបាក់ជាតិបានទេ ហើយសម្ដេចក៏បានណែនាំដល់សមាជិក សមាជិកា គណបក្សប្រជាជនកម្ពុជាទាំងអស់ រួមគ្នារៀបចំកម្មវិធីហូបនំបញ្ចុក នៅថ្ងៃទី០៩ ខែមិថុនា ឆ្នាំ២០១៩ ខាងមុខនេះ៕ ដោយ ៖ កូឡាប