ខេត្តព្រះសីហនុ ៖ លោកឧកញ៉ា គុយ ណាត ជាប្រធានក្រុមហ៊ុនអចលនទ្រព្យសំណង់ផ្ទះល្វែង ប្រចាំខេត្តព្រះសីហនុ មានប្រសាសន៍ថា ដើម្បីចូលរួមចំណែកលើការងារអភិវឌ្ឍមូលដ្ឋាននេះ ជាពិសេសដើម្បីចូលរួមចំណែកជាមួយថ្នាក់ដឹកនាំរដ្ឋបាលខេត្តព្រះសីហនុ ក៏ដូចជាជួយសំរួលដល់ការធ្វើដំណើរ របស់ប្រជាពលរដ្ឋក្នុងមូលដ្ឋានក្រុងព្រះសីហនុ មានផ្លូវធ្វើដំណើរឆ្លងកាត់មានភាពងាយស្រួល។ លោកឧកញ៉ា គុយ ណាត បានបញ្ជាក់ថា នៅព្រឹកថ្ងៃទី៦ ខែមិថុនា ឆ្នាំ២០១៩នេះ លោកបានបើកការដ្ឋានសាងសង់ផ្លូវបេតុងមួយខ្សែទៀត ដោយតភ្ជាប់ពីផ្លូវលេខ៨១០ ក្នងសង្កាត់លេខ៤ មានប្រវែង ២០០ម៉ែត្រ គុណ ៦ម៉ែត្រ កំរាស់ ០,១៨ម៉ែត្រ និងមានដាក់លូសងខាងផ្លូវ រួមទាំងមានបំពាក់អំពូលភ្លេីងសូឡាជូនផងដែរ។
លោកឧកញ៉ាបន្តថា គម្រោងស្ថាបនាផ្លូវបេតុង ខាងលើនេះ នឹងចំណាយអស់ទឹកប្រាក់ប្រមាណ ៧ម៉ឺនដុល្លារសហរដ្ឋអាមេរិក។
សូមបញ្ជាក់ថា លោកឧកញ៉ា គុយ ណាត ត្រូវបានមហាជនភាគច្រើន រស់នៅខេត្តព្រះសីហនុ សង្កេតឃេីញថា បានចូលរួមចំណែកដល់ការងារអភិវឌ្ឍមូលដ្ឋានខេត្តព្រះសីហនុ ជាច្រើនសន្ធឹក លេីការកសាងហេដ្ឋារចនាសម្ព័ន្ធនានា ក្នុងក្រុងព្រះសីហនុ។ ជាពិសេសជាងនេះ ក៏មានប្រជាពលរដ្ឋ មន្ត្រីរាជការ អាជីវករ និងក្រុមយុវជនមួយចំនួន បានហៅពេញៗមាត់ថា ជា”ឧកញ៉ាចិត្តធម៌”។
ជាបន្តបន្ទាប់កន្លងមកនេះ លោកឧកញ៉ា គុយ ណាត ក៏ធ្លាប់បានចំណាយថវិកាផ្ទាល់ខ្លួនអស់រាប់លានដុល្លារសហរដ្ឋអាមេរិក ក្នុងការងារជួយស្ថាបនាផ្លូវបេតុងជាច្រើនខ្សែ នៅមូលដ្ឋានខេត្តព្រះសីហនុ៕ ដោយ ៖ ដែន សីមា
