ខេត្តស្វាយរៀង ៖ លោក សរ វណ្ណា នាយកសាខាកាកបាទក្រហមកម្ពុជាខេត្តស្វាយរៀងនៅ ថ្ងៃទី ៦ ខែមិថុនា ឆ្នាំ ២០១៩ នេះធ្វើការផ្តាំផ្ញើដល់អ្នកស្ម័គ្រចិត្ត និង អ្នកគាំទ្រសហគមន៍សូមត្រឡប់ទៅត្រូវអនុវត្តជាមួយគម្រោង ដែលកំពុងធ្វើសកម្មភាពតាមភូមិគោលដៅ ដូចជាការអប់រំផ្សព្វផ្សាយ និងការជ្រើសរើសអ្នកទទួលផលត្រូវមានការវាយតម្លៃ និងប៉ាន់ប្រមាណឲ្យបានចំ និងឯកភាពជាមួយអាជ្ញាធរ និងនាក់ពាក់ពន្ធ័ក្នុងសហគមន៍ ហើយត្រូវបន្តដឹកនាំគ្រប់គ្រងថែរក្សាសមិទ្ធិផលដែលប្រជាជនយើងទទួលបានកន្លងមកដូចជា អណ្តូងទឹក បង្គន់អនាម័យ ធុងចម្រោះ ស៊ីទែនស្តុកទឹកភ្លៀងជាដើម ។ គម្រោងដែលទទួលថវិកា ពីមូលនិធិសប្បុរសធម៌កាឡេ តាមរយ:សហពន្ធ័អន្តរជាតិកាកបាទក្រហម អឌ្ឈចន្ទក្រហម គឺសំដៅធ្វើយ៉ាងណាដើម្បីកាត់បន្ថយអត្រាឈឺរបស់កុមារ និងស្ត្រីបង្ការទប់ស្កាត់ការឆ្លងរាតត្បាតនៃជម្ងឺផ្សេងៗក្នុងសហគមន៍ ដែលប្រឈមនឹងគ្រោះមហន្តរាយញឹកញាប់ ។
លោកប្រធានសាខាបានមានប្រសាសន៍ដូច្នេះក្នុងឱកាសដែលលោកបានអញ្ជើញជាអធិបតីនៅក្នុងកិច្ចប្រជុំពិភាក្សាទៅលើគម្រោងបង្កើននិរន្តរភាពការប្រើប្រាស់ទឹកស្អាត និងអនុវត្តអនាម័យ នៃសាខាកាកបាទក្រហមកម្ពុជាខេត្តស្វាយរៀង ក្រោមការឧបត្ថម្ភថវិកាពីមូលនិធិសប្បុរសធម៌កាទ្យេ តាមរយៈ តាមរយ:សហពន្ធ័អន្តរជាតិកាកបាទក្រហម អឌ្ឈចន្ទក្រហម បានប្រជុំប្រចាំឆមាសទី ១ ឆ្នាំ ២០១៩ រវាងអ្នកស្ម័គ្រចិត្ត និងអាជ្ញាធរមូលដ្ឋាន ស្តីពីការបូកសរុបលទ្ធផលការងារនិងលើកទិដៅអនុវត្តបន្ត។
ពិធីនេះបានប្រព្រឹត្តទៅនៅទីស្នាក់ការអនុសាខាកាកបាទក្រហមកម្ពុជាស្រុកចន្ទ្រា ព្រមទាំងមានការអញ្ជើញចូលរួមផងដែរពីសំណាក់លោក ឱម វុឌ្ឈរ៉ូ មន្ត្រីសម្របសម្រួលគម្រោងអនាម័យទឹកស្អាត ទីស្នាក់ការកណ្តាលកាកបាទក្រហមកម្ពុជា លោកស្រី សំ ថាវី ប្រធានស្តីទីគណៈកម្មាធិការអនុសាខាកាកបាទក្រហមកម្ពុជាស្រុកចន្ទ្រាព្រមទាំងមន្ត្រីសម្របសម្រួលគម្រោងថ្នាក់ខេត្ត ស្រុក និងអ្នកស្ម័គ្រចិត្ត ក្នុងឃុំគោលដៅទាំង ៣ ក្នុងស្រុកចន្ទ្រា គឺឃុំទួលស្តី ចន្ទ្រា និងឃុំសំរោង សរុបចំនួន ២៥ នាក់ ស្ត្រី ៥ នាក់ ។
លោក ឱម វុឌ្ឈរ៉ូ មន្ត្រីសម្របសម្រួលគម្រោងមានប្រសាសន៍ទាក់ទងទៅនឹងប្រភេទទឹកស្អាតបានមកពីប្រភពណាខ្លះ ការការពារប្រភពទឹកស្អាត វិធីធ្វើឲ្យទឹកស្អាត និងការទុកដាក់ទឹកផឹកឲ្យមានសុវត្ថិភាព ។
បន្ទាប់មកអង្គប្រជុំបានស្តាប់របាយការណ៍សង្ខេបរបស់ប្រធានក្រុមអ្នកស្ម័គ្រចិត្តតាមឃុំនិមួយៗ មតិចូលរួមផ្សេងៗ ផែនការអនុវត្តសម្រាប់ឆមាសបន្ទាប់ ព្រមទាំងពិភាក្សាទៅលើការស្វែងរកនូវបញ្ហាចំពោះមុខនៅតាមមូលដ្ឋានផ្ទាល់ខ្លួនពាក់ពន្ធ័ទៅនឹងប្រភពធនធានទឹក ស្វែងរកដំណោះស្រាយ និងរៀបចំផែនការ ដើម្បីឆ្លើយតបនាពេលអនាកត និងថាតើអាជ្ញាធរដែនដី អង្គការមិនមែនរដ្ឋាភិបាល អ្នកស្មគ្រ័ចិត្ត និងប្រជាជនក្នុងសហគមន៍ ទទួលខុសត្រូវអ្វីខ្លះលើបញ្ហា ការគ្រប់គ្រងធនធានទឹកចម្រុះ៕ ដោយ ៖ វ៉ៃកូ
