នៅព្រឹកថ្ងៃទី៦ ខែមិថុនា រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានទទួលជួបជាមួយប្រតិភូអឺរ៉ុប ដែលដឹកនាំដោយអគ្គលេខាធិការរងនៃមន្ទីរការបរទេសសហភាពអឺរ៉ុប លោក Jean-Christophe Balliard ដើម្បីពិភាក្សាលើទំនាក់ទំនងការទូតមួយចំនួន ក្នុងនោះក៏មានការពិភាក្សាពីប្រព័ន្ធអនុគ្រោះពន្ធរបស់អឺរ៉ុប EBA ផងដែរ។
ប្រមុខការទូតកម្ពុជា ប្រាប់ប្រតិភូអឺរ៉ុបថា ប្រទេសកម្ពុជានឹងធ្វើអ្វីគ្រប់យ៉ាងដើម្បីរក្សាប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» (EBA) ហើយលោកក៏ស្នើដល់ប្រតិភូនេះ ឲ្យមើលឃើញពីការពិតជាក់ស្ដែងដែលកម្ពុជាធ្វើបានខ្លះផង។
អ្នកនាំពាក្យក្រសួងការបរទេសកម្ពុជា លោក កេត សោផាន់ ថ្លែងក្នុងសន្និសីទកាសែតបន្ទាប់ពីកិច្ចប្រជុំនេះថា ប្រមុខការទូតកម្ពុជានៅតែរក្សាជំហរធ្វើការជាមួយអឺរ៉ុបដើម្បីរក្សាប្រព័ន្ធអនុគ្រោះពន្ធនេះ តែបានបញ្ជាក់ថា កម្ពុជាមិនអាចយកអធិបតេយ្យទៅប្ដូរនោះទេ ខណៈស្នើឲ្យប្រតិភូរំលេចឲ្យឃើញពីការវិវត្តរបស់កម្ពុជាខ្លះផងក្នុងរបាយការណ៍ទស្សនកិច្ចរបស់ខ្លួន។
លោក កេត សោផាន់ ថ្លែងថា៖ «យើងកត់សម្គាល់ឃើញថា អ្វីដែលជារបាយការណ៍របស់គាត់មិនបានឆ្លុះបញ្ចាំងពីរដ្ឋាភិបាល ជាពិសេសដូចដែលយើងឆ្លើយតបទៅ EU វិញ ដែលមានកម្រាស់ ៨៣ទំព័រហ្នឹង ឃើញថា គាត់មិនបានឆ្លុះបញ្ចាំងអ្វីពីវឌ្ឍនភាពរបស់កម្ពុជានោះទេ។ អ៊ីចឹង គ្រប់ពេលដែលរដ្ឋាភិបាល ជាពិសេសនៅពេលដែលប្រមុខការទូតយើងជួប EU ហ្នឹង គឺតែងតែស្នើសុំឲ្យរំលេចពីអ្វីដែលជាការពិតជាក់ស្ដែងរបស់កម្ពុជាខ្លះផង»។
ប្រតិភូសហភាពអឺរ៉ុបបានធ្វើដំណើរទស្សនកិច្ចរបស់ខ្លួនកាលពីថ្ងៃទី៣ មិថុនា ក្នុងគោលបំណងស្វែងរកការពិតមួយ បន្ទាប់ពីប្រទេសនេះបានចាប់ផ្ដើមដំណើរការ ដែលនឹងឈានទៅដកហូតប្រព័ន្ធអនុគ្រោះពន្ធពីប្រទេសកម្ពុជា បន្ទាប់ពីរកឃើញថា រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន ពុំបានស្ដារស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជាឡើងវិញនោះ។
ប្រព័ន្ធអនុគ្រោះពន្ធ EBA ត្រូវបានផ្ដល់មកកម្ពុជាជាមួយលក្ខខណ្ឌនៃការគោរពសិទ្ធិមនុស្ស និងប្រជាធិបតេយ្យ ហើយតាមរយៈប្រព័ន្ធអនុគ្រោះពន្ធនេះ កម្ពុជានាំចូលទំនិញគ្រប់យ៉ាងចូលទៅទីផ្សារសហភាពអឺរ៉ុបដោយរួចផុតពីកាតព្វកិច្ចបង់ពន្ធគយ ដែលមានតម្លៃជិត ៧០០លានដុល្លារក្នុងមួយឆ្នាំ។
បើយោងតាមលោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានបញ្ជាក់ប្រាប់អ្នកសារព័ត៌មានថា៖ «ការពិភាក្សានេះជារួម ទាំងលោក Jean-Christophe Belliard និងឧបនាយករដ្ឋមន្ត្រី បានឯកភាពគ្នាលើគោលការណ៍ធំ គឺភាគីទាំងពីរនឹងបន្តកិច្ចសន្ទនា ដើម្បីរកដំណោះស្រាយនៅក្នុងការរក្សា EBA ជូនកម្ពុជាបន្តទៀត។ ការបន្តកិច្ចខិតខំប្រឹងប្រែងកិច្ចសន្ទនារួមគ្នានេះ គឺនៅក្នុងស្មារតីគោរពគ្នាទៅវិញទៅមក»។
បើតាមអ្នកនាំពាក្យ ឧបនាយករដ្ឋមន្ត្រី ប្រាក់ សុខុន ក៏បានឆ្លៀតរំលឹកដែរថា រាជរដ្ឋាភិបាលកម្ពុជាបាន ធ្វើតាមអ្វីដែល ជាសេចក្តីថ្លែងការណ៍របស់ខ្លួន កាលពីដើមខែធ្នូ ឆ្នាំ២០១៨ ហើយក៏បានជម្រាបជូនទៅភ្ញៀវអំពីវឌ្ឍនភាពជាច្រើន ដែលរាជរដ្ឋាភិបាលប្តេជ្ញាថានឹងធ្វើ ដូចជា ពង្រឹងលទ្ធិប្រជាធិបតេយ្យ សិទ្ធិសេរីភាពការងារ និងដោះស្រាយបញ្ហាដីធ្លីជាដើម។ ជាមួយគ្នានេះ ប្រមុខការទូតកម្ពុជា បានស្នើសុំឱ្យសហភាពអឺរ៉ុប កត់សម្គាល់ពីវឌ្ឍនភាព ដែលកម្ពុជាសម្រេចបានទាំងនោះ។
លោកបន្តថា «អ៉ីចឹងឧបនាយករដ្ឋមន្ត្រី បានជម្រាបជូនអ្វីដែលជាវឌ្ឍនភាព ហើយសុំឱ្យតំណាងរបស់អឺរ៉ុប ត្រូវកត់សម្គាល់ឃើញពីវឌ្ឍនភាពរបស់រាជរដ្ឋាភិបាល សម្រេចបាននោះ»។
កាលពីខែកុម្ភៈ ឆ្នាំ២០១៩ កន្លងទៅ សហភាពអឺរ៉ុប បានប្រកាសចាប់ផ្តើមដំណើរការនីតិវិធី ដែលអាចនាំឱ្យមានការផ្អាកជាបណ្តោះអាសន្ន នូវប្រព័ន្ធអនុគ្រោះពន្ធនេះ។ ប្រព័ន្ធ EBA អាចនឹងលុបចោល ប្រសិនបើរកឃើញថាប្រទេសទទួលផលនេះ មិនគោរពសិទិ្ធមនុស្ស និងសិទ្ធិការងារសំខាន់ៗ។ នេះបើយោងតាមសេចក្តីជូនដំណឹង របស់គណៈកម្មការអឺរ៉ុប ចេញផ្សាយនៅថ្ងៃទី១១ ខែកុម្ភៈ ឆ្នាំ២០១៩ ៕ ដោយ ៖ កូឡាប
