ភ្នំពេញ៖ ទឹកទន្លេមេគង្គបានឡើង បានជន់លិចស្ពានប្រដឹសឫស្សីកោះប៉ែន ប៉ុន្តែម្ចាស់ស្ពានឬស្សីមួយមួយនេះបានសម្រេច រុះរើចេញដោយមិនចំណាយថវិកាសង់ឡើងវិញទៀតទេ។
ដោយឡែកខាងមន្ត្រីធនធានទឹកផ្តល់ដំបូន្មានដល់ម្ចាស់វិនិយោគស្ពាននៅឆ្នាំក្រោយៗ គួរសង់កម្ពស់ស្ពានឲ្យបានខ្ពស់ជាងនេះ ដើម្បីដំណើរការអាជីវកម្មបានរយ:ពេលយូរ និងគេចផុតពីរបបទឹកទន្លេបម្រែបម្រួលធម្មតានេះ ។
លោក ប៊ុន ដារ៉ា ម្ចាស់ស្ពានឬស្សីកោះប៉ែន បានឲ្យដឹងនៅថ្ងៃទី ៦ មិថុនា ២០១៩នេះថា បានសម្រេចឲ្យខាងក្រុមជាងរុះរើយកដើមឬស្សីជាគ្រោងស្ពាន ដើម្បីយកទៅកែច្នៃជាសំណង់ផ្សេងៗ។ កុំទុកឲ្យដាច់រសាត់ចោលតាមទឹកឥតប្រយោជន៍ និងបង្កឲ្យប៉ះពាល់ដល់បរិស្ថានទៀតផង។
ម្ចាស់ស្ពានឬស្សី បានឲ្យដឹងទៀតថា ដោយយើងសម្រេចមិនធ្វើការសាងសង់ឡើងវិញទៀតទេ ក្នុងឆ្នាំ២០១៩នេះ និងម្យ៉ាងពេលនេះ បានកៀករដូវទឹកទន្លេមេគង្គជន់ឡើងណាស់ហើយ។ ដូច្នេះសូមការអភ័យទោសពីសំណាក់ភ្ញៀវជាតិ និងអន្តរជាតិដែលនិយមដើរ ឬជិះកង់ឆ្លងកាត់លេងកម្សាន្តក្នុងមួយថ្ងៃប្រមាណជាង១០០ នាក់ គឺនៅរដូវកាលឆ្នាំក្រោយ២០២០ នឹងសាងសង់ឡើងវិញបម្រើជូនបន្តទៀត។ ប៉ុន្តែនៅខាងរមណីយដ្ឋានឆ្នេរខ្សាច់កោះប៉ែន នៅបើកដំណើរការដូចធម្មតា ដោយបងប្អូនអាចធ្វើដំណើរតាមស្ពានថ្មកោះប៉ែននោះ។
លោក ដារ៉ា បានបន្ថែមថា ឆ្នាំនេះស្ពានប្រដឹសឬស្សីកោះប៉ែន ដំណើរការអាជីវកម្ម បានច្រើនថ្ងៃជាងកាលពីឆ្នាំ ២០១៨ បានតែត្រឹមពាក់កណ្តាលខែឧសភា គឺជំនន់ទន្លេនេះបានជន់លិចអស់ហើយ។ ប៉ុន្តែឆ្នាំនេះបានដំណើរការដល់ថ្ងៃទី ៤ ខែមិថុនា ឆ្នាំ២០១៩ បានបិទការឆ្លងកាត់លើស្ពាននេះ៕ ដោយ៖បញ្ញាស័ក្តិ
