ភ្នំពេញ ៖ ប្រមុខរាជរដ្ឋាភិបាលកម្ពុជា គឺសម្ដេចហ៊ុន សែន បានចេញសារមួយ ដោយសម្ដែងការសោកស្ដាយយ៉ាងខ្លាំង ចំពោះនាយករដ្ឋមន្ត្រីសឹង្ហបុរី ដែលបានសរសេរសារ បង្ហោះលើហ្វេសប៊ុក នាពេលថ្មីៗនេះ ពាក់ព័ន្ធនឹង សន្តិភាពនៅកម្ពុជា ដោយនាយករដ្ឋមន្ត្រីសឹង្ហបុរី បានបញ្ជាក់ថា ក្នុងតំបន់អាស៊ានត្រូវបង្កើតឡើង មានចំនួន 5 ប្រទេស បានរួមគ្នាជួយដោះស្រាយវិបត្តិសង្គ្រាមរ៉ាំរ៉ៃនៅកម្ពុជា ហើយរួមគ្នាប្រឆាំងការឈ្លានពាន របស់វៀតណាម មកលើកម្ពុជា និងប្រឆាំងរដ្ឋាភិបាលកម្ពុជា ដែលបានជំនួសខ្មែរក្រហម។
ទៅលើប្រេងហ្វេសប៊ុកផ្លូវការ កាលពីថ្ងៃទី ៦ មិថុនាឆ្នាំ ២០១៩ សម្ដេចតេជោហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងសារថា “ខ្ញុំពិតជាមានការសោកស្តាយខ្លាំងណាស់ដែល ឯឧ នាយករដ្ឋមន្ត្រីសឹង្ហបុរី លី ស៊ានឡុង បានបង្ហោះតាមទំព័រ ហ្វេសប៊ុក កាលពីថ្ងៃទី ៣១ ខែឧសភាកន្លងទៅដោយលើកឡើងថា
” ពេលដែលគាត់ (ឧត្តមសេនីយ៍ ព្រេម) ធ្វើជានាយករដ្ឋមន្ត្រី (ថៃ) គាប់ជួននឹងពេលដែលសមាជិក ASEAN (កាលនោះគ្នា យើង 5 ប្រទេស) រួមគ្នាប្រឆាំងការឈ្លានពានរបស់វៀតណាម មកលើកម្ពុជា និងប្រឆាំងរដ្ឋាភិបាលកម្ពុជា ដែលបានជំនួសខ្មែរក្រហម។…”
ការលើកឡើងនេះបង្ហាញថា កាលនោះសឹង្ហបុរី បានគាំទ្ររបបប្រល័យពូជសាសន៍ និងចង់ឲ្យរបបប្រល័យពូជសាសន៍ វិលត្រឡប់មកកម្ពុជាវិញដែរ។
សម្តេចតេជោហ៊ុនសែនបានសរសេរទៀតថា “សឹង្ហបុរីបានធ្វើជាម្ចាស់ផ្ទះរៀបចំការប្រជុំ ដែលនាំដល់ការបង្កើតរដ្ឋាភិបាលចម្រុះត្រីភាគី កម្ពុជាប្រជាធិបតេយ្យ និងអូសបន្លាយសង្គ្រាមនៅកម្ពុជា និងទុក្ខវេទនា របស់ប្រជាជនកម្ពុជា ជាង១០ ឆ្នាំថែមទៀត ហើយដែលស្មើនឹងការប្រឆាំង នឹងការរស់ឡើងវិញ របស់ប្រជាជនកម្ពុជាផងដែរ”។
សម្ដេចនាយករដ្ឋមន្ត្រី បានមានប្រសាសន៍ថា “ការលើកឡើងនេះ ក៏ជាការប្រមាថ ដល់ពលិកម្មសាច់ស្រស់ឈាមស្រស់ របស់កងទ័ពស្ម័គ្រចិត្តវៀតណាម ដែលបានជួយរំដោះកម្ពុជា ឲ្យរួចផុតពីរបបប្រល័យពូជសាសន៍នោះ។
ការលើកឡើងរបស់ឯកឧត្តម លី ស៊ានឡុង នាពេលនេះ ក៏បានបង្ហាញប្រជាជនសាំងកាពួ និងពិភពលោកថា មេដឹកនាំសឹង្ហបុរីនាពេលនោះ បានរួមចំណែកសម្លាប់ប្រជាជនកម្ពុជា យ៉ាងពិតប្រាកដ។
ចុងក្រោយនេះ ខ្ញុំចង់សួរ ឯ.ឧ នាយករដ្ឋមន្ត្រី លី ស៊ានឡុង ថា តើគាត់ចាត់ទុកការកាត់ទោស មេដឹកនាំខ្មែរក្រហមកន្លងទៅនេះថា ជាការត្រឹមត្រូវដែរឬអត់ ?”។
តាមរយៈទំព័រហ្វេសប៊ុករបស់ខ្លួន នៅថ្ងៃទី ៣១ ខែឧសភា នាយករដ្ឋមន្ត្រី សិង្ហបុរី លោក លី សៀនឡុង បាន សរសេររំលែកមរណទុក្ខ និងបង្ហាញការស្ងើចសរសើរភាពជាអ្នកដឹកនាំរបស់លោក ព្រេម ទីនស៊ូឡានុនដា
អតីតនាយករដ្ឋមន្ត្រីថៃ ក្នុងទសវត្សរ៍ ១៩៨០ និងជាអតីតទីប្រឹក្សាផ្ទាល់របស់ ព្រះមហាក្សត្រថៃ ដែលទើបបាន ទទួលមរណភាពកាលពី ថ្ងៃទី ២៦ ខែឧសភា ។
ប៉ុន្តែលោក លី ក៏បាននិយាយព្រឹត្តការណ៍ប្រវត្តិសាស្ត្រ ដែលកើតឡើងនៅកម្ពុជា តែពាក់ព័ន្ធវៀតណាម «ក្នុងអំឡុង ពេលដែលលោក ព្រេម ទីនស៊ូឡានុនដា ធ្វើជានាយករដ្ឋមន្ត្រីថៃនោះ វាក៏ជាពេលដែលសមាជិកអាស៊ាន ទាំង ៥ នៅពេលនោះ បានប្រឆាំងនឹងការឈ្លានពានរបស់វៀតណាមមកលើកម្ពុជា និងរដ្ឋាភិបាលកម្ពុជា (ពេលនោះ ) ដែលមកជំនួស របបខ្មែរក្រហម ។
ប្រទេសថៃបានប្រឈមនឹងកងទ័ពវៀតណាម នៅតាមបណ្តោយព្រំដែនរបស់ខ្លួនជាមួយកម្ពុជា ។ លោកឧត្តម សេនីយ៍ ព្រេម បានសម្រេចចិត្តយ៉ាងមុតមាំដោយមិនទទួលយកអ្វីដែលកំពុងកើតឡើងនោះ ហើយបានធ្វការជាមួយដៃគូក្នុងអាស៊ានដើម្បី ប្រឆាំងវៀតណាមនៅតាមវេទិកាអន្តរជាតិនានា » ។
អ្នកនាំពាក្យ ក្រសួងការបរទេសវៀតណាម នៅថ្ងៃទី ៤ ខែមិថុនា បានបង្ហាញការសោកស្ដាយចំពោះការលើកឡើងរបស់មេដឹកនាំសិង្ហបុរី ដែលធ្វើឡើងអំឡុងពេលកិច្ចសន្ទនាសន្តិសុខ Shangri-La និងនៅលើបណ្ដាញ សង្គមហ្វេ សប៊ុករបស់លោក ។ វៀតណាមចាត់ទុកសម្ដីលោក លី ថា មិនបានឆ្លុះបញ្ចាំងការពិត ។
សំណេរខាងលើនេះបន្ថែមពីលើការនិយាយលើបញ្ហាដូចគ្នាអំឡុងពេលកិច្ចសន្ទនា Shangri-La កាលពីសប្ដាហ៍មុនធ្វើឲ្យវៀតណាមចេញមកប្រតិកម្ម ។
អ្នកស្រី Le Thi Thu hang អ្នកនាំពាក្យក្រសួងការបរទេសវៀតណា ម បានសរសេរលើបណ្ដាញសង្គម Twitter ថា ៖ « វៀតណាមមានការសោកស្ដាយចំពោះការលើកឡើងរបស់នាយករដ្ឋមន្ត្រីសិង្ហបុរី លី សៀនឡុង នាកិច្ចប្រជុំ Shangri-La និងនៅលើហ្វេសប៊ុក ដែលមិនបានឆ្លុះបញ្ចាំងពីការសច្ចភាពប្រវត្តិសាស្ត្រ ហើយបង្កឲ្យមានផលប៉ះពាល់អវិជ្ជមាន ក្នុងចំណោមសាធារណមតិ » ៕ ដោយ ៖ កូឡាប