ប្រទេសមិចស៊ិចកូ បានដាក់ពង្រាយកងកម្លាំងចំនួន ៦.០០០នាក់នៅតាមព្រំដែនជាមួយនឹងប្រទេសហ្គាតេម៉ាឡាដើម្បីទប់ស្កាត់លំហូចូលជនអន្តោប្រវេសន៍ខុសច្បាប់ទៅកាន់ទឹកដីអាមេរិច។
ការចាត់វិធានការបែបនេះ កើតឡើងក្រោយពេលប្រធានាធិបតីអាមេរិច ដូណាល់ ត្រាំ ព្រមានយកពន្ធលើទំនិញនាំចូលពីប្រទេសមិចស៊ិចកូ បើប្រទេសនេះមិនព្រមដោះស្រាយ។
បច្ចុប្បន្ន រដ្ឋមន្ត្រីការបរទេសមិចស៊ិចកូ លោក Marcelo Ebrard កំពុងស្ថិតនៅទីក្រុងវ៉ាស៊ីនតោន ដើម្បីធ្វើការចរចារ ក៏ដូចជាការពារកុំឲ្យអាមេរិចយកពន្ធលើទំនិញខ្លួន ដោយសារបញ្ហាជនអន្តោប្រវេសន៍ខុសច្បាប់។
លោក ដូណាល់ ត្រាំ បានប្រកាសថានឹងយកពន្ធចំនួន ៥ភាគរយលើមុខទំនិញនាំចូលពីប្រទេសមិចស៊ិចកូ ប្រសិនជាគ្មានកិច្ចព្រមព្រៀងណាមួយកើតឡើង។
រដ្ឋមន្ត្រីការបរទេសមិចស៊ិចកូ បាននិយាយថា កងកម្លាំងនឹងធ្វើការដាក់មូលដ្ឋាននៅព្រំដែនភាគខាង
ត្បូងជាប់ប្រទេសហ្គាតាម៉ាឡា ដើម្បីរារាំងជនអន្តោប្រវេសន៍ចូលក្នុងទឹកដីអាមេរិច។
លោកថ្លែងថា “ពួកយើងបានពន្យល់ថា មានកងកម្លាំងចំនួន ៦.០០០នាក់ ហើយពួកគេនឹងត្រូវដាក់ពង្រាយនៅទីនោះ។” លោកបន្ថែមថា កិច្ចចរចារជាមួយអាមេរិចនឹងបន្តនៅថ្ងៃសុក្រ។
សូមបញ្ជាក់ថា លោកត្រាំបានព្រមានដំឡើងពន្ធចំនួន ៥ភាគរយជារៀងរាល់ខែ លើទំនិញនាំចូលពីប្រទេសមិចស៊ិចកូ រួមមានដូចជា ឡាន ស្រាបៀរ ផ្លែឈើ និងបន្លែជាដើម ហើយពន្ធនោះនឹងឡើងដល់ ២៥ភាគរយនៅខែតុលា ប្រសិនជាគ្មានដំណោះស្រាយ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC