ភ្នំពេញ ៖ បន្ទាប់សម្តេចតេជោ ហ៊ុន សែន បានប្រកាសថា ឧត្តមក្រុមប្រឹក្សាពិគ្រោះ និងផ្តល់យោបល់ នឹងមានត្រឹមតែអាណត្តិនេះប៉ុណ្ណោះនោះ ត្រូវបានលោកវីល្លាម សមាជិកឧត្តមក្រុមប្រឹក្សានិងពិគ្រោះយោបល់ បានសរសេរសារថា ពុំមានអ្វីគួរឲ្យភ្ញាក់ផ្អើលនោះទេ ព្រោះព្រះរាជក្រឹត្យបានចែងយ៉ាងច្បាស់ហើយថា ក្រុមប្រឹក្សាពិគ្រោះនិងផ្តល់យោបល់ ដល់ត្រូវបញ្ចប់ក្រោយអាណិត្តទី ៦។
លោកវីល្លាម សមាជិកឧត្តមក្រុមប្រឹក្សានិងពិគ្រោះយោបល់ បានសរសេរសារនៅរសៀលថ្ងៃទី៧ មិថុនាថា “ពុំមានអ្វីគួរភ្ញាក់ផ្អេីលទេ ចំពោះការបញ្ចប់អាណត្តិឧត្តមក្រុមប្រឹក្សានៅនិតីកាលទី៧ ព្រោះព្រះរាជក្រឹត្យស្ដីពីការរៀបចំនិងការប្រព្រឹត្តទៅរបស់ឧត្តមក្រុមប្រឹក្សាពិគ្រោះនិងផ្ដល់យោបល់ មាត្រា៣ វាក្យខ័ណ្ឌ២ បានបញ្ជាក់ច្បាស់តាំងពីដើមថា អាណត្តិរបស់ឧត្តមក្រុមប្រឹក្សានិងបញ្ចប់ទៅក្រោយអស់អាណត្តិរាជរដ្ឋាភិបាលនីតិកាលទី៦ “។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងកិច្ចប្រជុំគណៈរដ្ឋមន្ត្រី នាព្រឹកថ្ងៃទី៧ ខែមិថុនា ឆ្នាំ២០១៩ បានប្រកាសថា ”
ឧត្តមក្រុមប្រឹក្សាពិគ្រោះ និងផ្តល់យោបល់ ដែលមានសមាសភាពនានា មកពីគណបក្សនយោបាយក្រៅរដ្ឋសភា ដែលចូលរួមការបោះឆ្នោត នឹងមានត្រឹមតែអាណត្តិនេះប៉ុណ្ណោះ”។
ឧត្តមក្រុមប្រឹក្សាពិគ្រោះ និងផ្តល់យោបល់ត្រូវបានបង្កើតឡើង តាមព្រះរាជក្រឹត្យចុះថ្ងៃទី៦ ខែកញ្ញា ឆ្នាំ២០១៨ ដោយមានការស្នើសុំរបស់សម្តេចតេជោ ហ៊ុន សែន ក្រោយពេលបោះឆ្នោតជាតិអាណត្តិទី៦។ ឧត្តមក្រុមប្រឹក្សាពិគ្រោះ និងផ្តល់យោបល់មានសមាសភាពមកពីគណបក្សយោបាយចំនួន១៦ ក្នុងចំណោមគណបក្សនយោបាយចំនួន២០ ដែលបានចូលរួមការបោះឆ្នោត។
សមាជិកឧត្តមក្រុមប្រឹក្សាមកពីគណបក្សនយោបាយនីមួយៗ ត្រូវបានប្រគល់ឋានៈស្មើទេសរដ្ឋមន្ត្រីសម្រាប់ប្រធានប្រតិភូ និងស្មើរដ្ឋមន្ត្រីសម្រាប់អនុប្រធានប្រតិភូ។ ប្រធានប្រតិភូនៃគណបក្សនយោបាយនីមួយៗត្រូវបានប្រគល់តួនាទីជាទីប្រឹក្សារាជរដ្ឋាភិបាលថែមទៀតផង។
ឧត្តមក្រុមប្រឹក្សាពិគ្រោះ និងផ្តល់យោបល់ជាយន្តការពិគ្រោះ និងផ្តល់យោបល់របស់គណបក្សនយោបាយជូនរាជរដ្ឋាភិបាលក្រៅក្របខណ្ឌសភា ក្នុងគោលដៅលើកស្ទួយប្រសិទ្ធភាពការងារ ដើម្បីជាប្រយោជន៍ដល់ការបម្រើសេវាប្រជាជន និងការអភិវឌ្ឍសង្គមប្រកបដោយសក្តានុពល។
សមាជិកឧត្តមក្រុមប្រឹក្សពិគ្រោះ និងផ្តល់យោបល់ អាចចុះធ្វើសកម្មភាពពិនិត្យរាល់សកម្មភាពរបស់មន្ត្រីជាក្បាលម៉ាស៊ីនដឹកនាំរាជរដ្ឋាភិបាល និងអាជ្ញាធម៌ថ្នាក់ក្រោមជាតិ ហើយក៏អាចកោះហៅមកសួរនាំលើរឿងរ៉ាវផ្សេងៗ ពាក់ព័ន្ធនឹងសកម្មភាពបម្រើសង្គមជាតិ និងប្រជាជនផងដែរ៕ ដោយ ៖ កូឡាប