រាជធានីភ្នំពេញ ៖ នៅ ថ្ងៃទី ៧ ខែមិថុនា ឆ្នាំ ២០១៩នេះ ធនាគារ PPCBank បានប្រកាសថា ខ្លួនបានចុះកិច្ចព្រមព្រៀងជាមួយនឹង IFC ដែលជាសមាជិកមួយរបស់ក្រុមធនាគារពិភពលោក ដើម្បីអនុវត្តកម្មវិធីចែករំលែកហានិភ័យ និងផ្តល់សេវាប្រឹក្សាយោបល់ដល់ធនាគារ PPCBank ដើម្បីពង្រីកការផ្តល់កម្ចីដល់សហគ្រាសធុនតូចបំផុត (VSE) សហគ្រាសធុនតូច និងមធ្យម (SME) រួមទាំងសហគ្រាសដឹកនាំដោយស្ត្រី (WSME) នៅកម្ពុជា ក្នុងគោលដៅជំរុញបរិយាបន្នហិរញ្ញវត្ថុ បង្កលក្ខណៈអំណោយផលសម្រាប់ការលូតលាស់សេដ្ឋកិច្ច និងបង្កើតការងារ។
កម្មវិធីចែករំលែកហានិភ័យនេះ នឹងផ្តល់លទ្ធភាពឱ្យធនាគារ PPCBank ផ្តល់សេវាកាន់តែប្រសើរថែមទៀតដល់អតិថិជនដែលមានស្រាប់ និងអតិថិជនថ្មីរបស់ខ្លួន ជាពិសេសសហគ្រាសធុនតូចបំផុត សហគ្រាសធុនតូច និងមធ្យម និងសហគ្រាសដែលដឹកនាំដោយស្ត្រីដើម្បីពង្រីកអាជីវកម្ម ក៏ដូចជាជំរុញកំណើន និងការអភិវឌ្ឍសេដ្ឋកិច្ចនៅកម្ពុជា។ សហគ្រាសធុនតូច និងមធ្យម គឺជាប្រភពដ៏សំខាន់នៃកំណើនការងារ និងនវានុវត្តន៍ក្នុងប្រទេស ហើយដើម្បីឱ្យសហគ្រាសទាំងនេះ ទទួលបានជោគជ័យ សហគ្រាសទាំងនេះចាំបាច់ត្រូវមានលទ្ធភាពទទួលបានហិរញ្ញប្បទាន និងប្រភពមូលនិធិឱ្យបានគ្រប់គ្រាន់។
កន្លងមក សហគ្រាសទាំងនេះពុំទាន់បានទទួលហិរញ្ញប្បទានគ្រប់គ្រាន់នៅឡើយ ដោយហេតុថាទិន្នន័យអំពីប្រវត្តិកម្ចីមានតិចតួច ជាហេតុប៉ះពាល់ដល់ការសម្រេចចិត្តក្នុងការផ្តល់កម្ចីប្រកបដោយការទទួលខុសត្រូវ។ នេះជាឧបសគ្គសម្រាប់សហគ្រាសទាំងនេះ ក្នុងការពង្រីកអាជីវកម្មបន្ថែមទៀត។ ធនាគារ PPCBankអាចប្រើប្រាស់កម្មវិធីនេះ ដើម្បីកាត់បន្ថយហានិភ័យលើកម្ចីដែលផ្តល់ដល់សហគ្រាសធុនតូចបំផុត សហគ្រាសធុនតូច និងមធ្យម និងសហគ្រាសដឹកនាំដោយស្ត្រីជាម្ចាស់កម្មសិទ្ធិ និងជួយឱ្យអាជីវកម្មរបស់ពួកគេមានការរីកចម្រើនបន្ថែមទៀត។ បន្ថែមលើកម្មវិធីចែករំលែកហានិភ័យនេះ IFC ក៏ផ្តល់សេវាប្រឹក្សាយោបល់ដល់ធនាគារPPCBank ដើម្បីពង្រីកសមត្ថភាពរបស់ខ្លួននិងបង្កើនទំនុកចិត្ត ក្នុងការផ្តល់កម្ចីដល់សហគ្រាសទាំងនោះ។
លោក Shin Chang Moo អគ្គនាយកធនាគារ PPCBank មានប្រសាសន៍ថា “សហគ្រាសទាំងនេះ មានសក្តានុពលពិតប្រាកដ ក្នុងការរួមចំណែកដល់កំណើនសេដ្ឋកិច្ចកម្ពុជា។ ធនាគារ PPCBank ប្តេជ្ញាផ្តល់ឱ្យសហគ្រាសទាំងនេះ នូវដំណោះស្រាយហិរញ្ញវត្ថុ និងកម្ចីសមស្របបំផុត ដើម្បីផ្តល់លទ្ធភាពឱ្យពួកគេអាចពង្រីកអាជីវកម្មរបស់ខ្លួន បង្កើតការងារ និងមានឱកាសចូលរួមកសាងសេដ្ឋកិច្ចប្រទេសកម្ពុជា។” លោកបានបន្ថែមទៀតថា “ការពង្រីកឱកាសបរិយាបន្នហិរញ្ញវត្ថុ និងការផ្តល់សេវាហិរញ្ញវត្ថុដោយចំហដល់សហគ្រាសធុនតូច ជាការជួយឱ្យប្រជាពលរដ្ឋកាន់តែមានការរីកចម្រើន និងមិនត្រឹមតែអាចពង្រីកអាជីវកម្មរបស់ពួកគេប៉ុណ្ណោះទេ ថែមទាំងអាចលើកស្ទួយជីវភាពប្រកបដោយនិរន្តរភាព និងស្ថេរភាពលើផ្នែកហិរញ្ញវត្ថុរបស់ខ្លួន និងគ្រួសាររបស់ពួកគេទៀតផង។ យើងមានមោទនភាពដែលមានឱកាសក្នុងការផ្តល់សេវាហិរញ្ញវត្ថុដល់សហគ្រាសទាំងនេះ និងមានភាពរីករាយដែលបានមើលឃើញការរីកចម្រើនរបស់ពួកគេ។”
Vivek Pathak នាយកប្រចាំតំបន់អាស៊ីបូព៌ា និងប៉ាស៊ីហ្វិករបស់ IFC បានមានប្រសាសន៍ក្នុងពិធីចុះហត្ថលេខាថា“សហគ្រាសធុនតូច និងមធ្យម ជួយជំរុញកំណើនសេដ្ឋកិច្ច និងបង្កើតការងារក្នុងបណ្តាប្រទេសដែលមានចំណូលទាប ប៉ុន្តែសហគ្រាសទាំងនេះជួបការលំបាកក្នុងការទទួលបានកម្ចី ព្រោះតែសហគ្រាសទាំងនេះមានទំហំតូច បទពិសោធន៍តិចតួច និងកត្តារួមផ្សំផ្សេងៗទៀត។ កម្មវិធីចែករំលែកហានិភ័យនេះ នឹងជួយឱ្យធនាគារ PPCBank បំពេញតម្រូវការរបស់សហគ្រាសទាំងនេះ ដែលកំពុងបំពេញតួនាទីយ៉ាងសំខាន់ ក្នុងសេដ្ឋកិច្ចរបស់ប្រទេសកម្ពុជា និងបង្ហាញឱ្យឃើញថា អតិថិជនប្រភេទនេះក៏មានលទ្ធភាពប្រើប្រាស់ “សេវាធនាគារ” ដូចគ្នានឹងសហគ្រាសផ្សេងៗទៀតដែរ។”
បង្កើតឡើងក្នុងឆ្នាំ ២០០៨ ធនាគារ PPCBank ត្រូវបានទទួលស្គាល់ថាជាធនាគារពាណិជ្ជ ដែលកំពុងរីកចម្រើនយ៉ាងឆាប់រហ័សជាងគេមួយនៅកម្ពុជា មិនត្រឹមតែគិតជាទំហំទ្រព្យសម្បត្តិប៉ុណ្ណោះទេ ថែមទាំងវិសាលភាពនៃបណ្តាញ និងកំណើនចំនួនអតិថិជនផងដែរ។ ក្នុងគោលបំណងធ្វើឱ្យបទពិសោធន៍ប្រើប្រាស់សេវាធនាគារនៅកម្ពុជាកាន់តែមានភាពល្អប្រសើរ និងឆ្លើយតបចំពោះតម្រូវការអតិថិជននីមួយៗ កាលពីពេលថ្មីៗនេះ ធនាគារ PPCBank បានប្រកាសផ្សព្វផ្សាយពីផលិតផល និងសេវាកម្មជាច្រើន ដូចជាកម្មវិធីតាមទូរសព្ទចល័ត (Mobile Banking) សេវាធនាគារសាជីវកម្មដែលបំពេញមុខងារពេញលេញ (smartBiz) និងប្រព័ន្ធសេវាធនាគារចល័តសម្រាប់ផ្តល់ប្រឹក្សានៅនឹងកន្លែង និងមជ្ឈមណ្ឌលសេវាអតិថិជនវៃឆ្លាត ដើម្បីជួយគាំទ្រដល់អតិថិជន ២៤ម៉ោង ក្នុងមួយថ្ងៃ។
បច្ចុប្បន្ននេះ ធនាគារPPCBank ដែលទទួលបានអាជ្ញាបណ្ណពេញលេញមួយនេះ កំពុងអនុវត្តគម្រោងធនាគារឌីជីថល ដោយផ្តោតលើការដាក់ឱ្យប្រើប្រាស់សេវាហិរញ្ញវត្ថុតាមទូរសព្ទចល័ត (Mobile Banking)ដែលកាន់តែមានភាពល្អប្រសើរជាងមុនបន្ថែមទៀត។ លើសពីនេះ ទំនាក់ទំនង franchise ជាមួយនឹងក្លឹប Diners Club International នឹងធ្វើឲសេវាកម្មមានភាពងាយស្រួលដល់អតិថិជន។
ក្នុងរយៈពេល ២ ទស្សវត្សរ៍ចុងក្រោយនេះ ប្រទេសកម្ពុជាសម្រេចបាននូវកំណើនសេដ្ឋកិច្ចខ្ពស់ ដែលនាំឱ្យកម្រិតចំណូលរបស់ប្រជាពលរដ្ឋមានកើនឡើងគួរឱ្យកត់សម្គាល់ ដែលធ្វើឱ្យពួកគេមានប្រាក់ចំណូលសម្រាប់ចាយវាយក្នុងចំនួនច្រើនជាងមុន។ ជាមួយនឹងកំណើនជាមធ្យម ៧,៧% ចន្លោះពីឆ្នាំ ១៩៩៥ ដល់ ២០១៨ ប្រទេសកម្ពុជា គឺសេដ្ឋកិច្ចដែលរីកចម្រើនយ៉ាងឆាប់រហ័សជាងគេទី ៦ ក្នុងពិភពលោក។ គេរំពឹងថា កំណើនសេដ្ឋកិច្ចនេះ នឹងបន្តមាននិរន្តរភាព ដោយធនាគារពិភពលោកព្យាករថា កំណើននឹងមានកម្រិត ៧% សម្រាប់ឆ្នាំ ២០១៩។
អំពី PPCBank
ចុះបញ្ជីក្នុងប្រទេសកម្ពុជា កាលពីខែ កញ្ញា ឆ្នាំ ២០០៨ បច្ចុប្បន្ននេះ PPCBank ប្រតិបត្តិការជាមួយនឹងសាខាចំនួន ១៩ និងម៉ាស៊ីន ATM ចំនួន ២៨ ក្នុងរាជធានីភ្នំពេញ និងតាមបណ្តាខេត្តធំៗ។ ជាមួយនឹងចក្ខុវិស័យ “ការបង្កើតនូវជោគជ័យដោយប្រើប្រាស់គំរូផ្តល់សេវាឆ្លើយតបទៅនឹងតម្រូវការអតិថិជនក្នុងស្រុក ដែលមានលក្ខណៈទំនើបនៅអាស៊ីអាគ្នេយ៍” ធនាគារPPCBank ប្តេជ្ញាផ្តល់បទពិសោធន៍តាមគ្រប់ច្រកទាំងអស់ដល់អតិថិជន។ ចាប់ពីសាខាដែលគិតពីប្រយោជន៍សង្គម ជាមួយនឹងហាងកាហ្វេដែលផ្តល់សេវាដោយអ្នកដែលមានតម្រូវការពិសេស កម្មវិធីធនាគារតាមទូរសព្ទចល័ត(Mobile Banking) ដែលផ្តល់នូវភាពងាយស្រួលដល់អតិថិជនម្នាក់ៗ រហូតដល់កម្មវិធី smartBiz ដែលជាប្រព័ន្ធគ្រប់គ្រងសាជីវកម្មសម្រាប់ប្រភេទអតិថិជនសាជីវកម្ម ក្នុងការគ្រប់គ្រងសេវាធនាគារ និងគ្រប់គ្រងសេវាប្រមូលបំណុល ឱ្យកាន់តែមានប្រសិទ្ធភាព ជាមួយនឹងគណនី Virtual Account។ ធនាគារ PPCBank ក៏ផ្តល់នូវសេវា Mobile Teller សម្រាប់ផ្តល់ប្រឹក្សានៅនឹងកន្លែងជាក់ស្តែង នៅក្នុង និងខាងក្រៅសាខាផងដែរ។ បន្ថែមពីលើសេវាទាំងនេះ ធនាគារPPCBankក៏ផ្តល់សេវាដល់អតិថិជន (High Net-Worth Individual- HNWI) ជាមួយនឹងសេវាបដិសណ្ឋារកិច្ចធនាគារកម្រិតខ្ពស់ប្រភេទ Gold Club។ ហើយសម្រាប់អតិថិជនដែលជាជនជាតិជប៉ុន ជនជាតិកូរ៉េ និងជនជាតិចិន ពួកគេក៏អាចទៅធនាគារ ដើម្បីទទួលបានសេវាពីតុផ្តល់សេវាពិសេសសម្រាប់ជនជាតិជប៉ុន កូរ៉េ និងចិន និងទទួលបានបទពិសោធន៍ជាមួយនឹងទស្សនទាន “Fun Bank” របស់ធនាគារ PPCBank ផងដែរ។ សម្រាប់ព័ត៌មានបន្ថែម សូមចូលមើលគេហទំព័រ www.ppcbank.com.kh
អំពី IFC
IFC ក្នុងនាមជាស្ថាប័នបងប្អូនរបស់ធនាគារពិភពលោក និងជាសមាជិកមួយរបស់ក្រុមធនាគារពិភពលោក គឺជាស្ថាប័នអភិវឌ្ឍន៍សកលធំជាងគេ ដែលផ្តោតសំខាន់លើវិស័យឯកជននៅតាមទីផ្សារដែលកំពុងមានការរីកចម្រើន។ យើងធ្វើការងារជាមួយនឹងសហគ្រាសជាង ២.០០០ ទូទាំងសកលលោក តាមរយៈការប្រើប្រាស់មូលធុន ជំនាញ និងឥទ្ធិពលរបស់យើង ដើម្បីបង្កើតទីផ្សារ និងកាលានុវត្តភាព សម្រាប់តំបន់ដែលជួបការលំបាកជាងគេក្នុងពិភពលោក។ ក្នុងឆ្នាំសារពើពន្ធ ២០១៨ យើងផ្តល់ហិរញ្ញប្បទានទឹកប្រាក់ជាង២៣ប៊ីលានដុល្លារ ដល់ប្រទេសកំពុងអភិវឌ្ឍ តាមរយៈការកៀរគរអានុភាពរបស់វិស័យឯកជន ដើម្បីជួយបញ្ចប់ភាពក្រីក្រ និងលើកកម្ពស់វិបុលភាពសម្រាប់ទាំងអស់គ្នា៕ ដោយ៖កូឡាប
សម្រាប់ព័ត៌មានបន្ថែម សូមចូលមើលគេហទំព័រwww.ifc.org