ព្រៃវែង ៖ មន្ត្រីរាជការនៅក្នុងមន្ទីរសុខាភិបាលខេត្តព្រៃវែង បានអំពាវនាវឲ្យលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ចាត់វិធានការទប់ស្កាត់អំពើពុករលួយ និងគ្រួសារនិយម របស់លោក សេង បញ្ញាប្ញទ្ធិ ប្រធានមន្ទីរសុខាភិបាលខេត្តព្រៃវែង ។
មន្ត្រីក្នុងមន្ទីរសុខាភិបាលខេត្តព្រៃវែង ក៏បានលើកឡើងពីរឿងអាស្រូវពុករលួយ បក្ខពួកនិយម គ្រួសារនិយម របស់លោក សេង បញ្ញាប្ញទ្ធិ ជាសាធារណៈដើម្បីឲ្យលោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានជ្រួតជ្រាបផងដែរ។ ជាពិសេសករណីលោក សេង បញ្ញាប្ញទ្ធិ អាងអំណាចជាប្រធានមន្ទីរ ហើយប្រើពាក្យសំដីអសុរោះប្រមាថមើលងាយមន្ត្រីក្រោមឱវាទ គឺជារឿងមិនអាចបិទបាំងតទៅទៀតបានទេ បើទោះបីលោក សេង បញ្ញាប្ញទ្ធិ អាងមានខ្នងបង្អែករឹងមាំយ៉ាងណាក៏ដោយ។
ប្រភពស្និទ្ធនឹងលោក សេង បញ្ញាប្ញទ្ធិ បានឲ្យដឹងថា ក្នុងអំណាចជាប្រធានមន្ទីរសុខាភិបាលខេត្តព្រៃវែង គឺលោក សេង បញ្ញាប្ញទ្ធិ ប្រព្រឹត្តអំពើពុករលួយតាមច្រើនរូបភាពដោយគ្មានញញើតអ្វីទាំងអស់ ហើយយកឈ្មោះមន្ត្រីជាន់ខ្ពស់ក្នុងក្រសួងសុខាភិបាល ទៅការពារទង្វើរបស់ខ្លួនយ៉ាងក្រអឺតក្រទមបំផុត។ ទន្ទឹមនឹងនេះលោក សេង បញ្ញាប្ញទ្ធិ ពង្រឹងអំណាចបក្ខពួកនិយម គ្រួសារនិយម ក្នុងមន្ទីរសុខាភិបាលខេត្តព្រៃវែង យ៉ាងគឃ្លើនដូចជា អ្នកស្រីទន្តបណ្ដិត ហ៊ន់ សុធារី ជាភរិយា របស់លោក សេង បញ្ញាប្ញទ្ធិ ទទូលបានតួនាទីជាប្រធានការិយាល័យប្រតិបត្តិស្រុកព្រៃវែង ហើយលោក ហ៊ន់ រិទ្ធិ ជាប្អូនថ្លៃរបស់លោក សេង បញ្ញាប្ញទ្ធិ ទទួលបានតួនាទីជាអនុប្រធានមន្ទីរសុខាភិបាលខេត្តព្រៃវែង។ លោកស្រី ទន់ មករា ជាប្អូនថ្លៃជីដូនមួយរបស់លោក សេង បញ្ញាប្ញទ្ធិ ទទួលបានតួនាទីជាប្រធានគណនេយ្យមន្ទីរសុខាភិបាលខេត្តព្រៃវែង ហើយជាអ្នកក្ដោបក្ដាប់ចំណូលចំណាយក្នុងមន្ទីរយ៉ាងណែនក្នុងកណ្ដាប់ដៃតែម្តង។ គ្រូពេទ្យឈ្មោះ សេង លីអាន ដែលជាបងប្រុសរបស់លោក សេង បញ្ញាប្ញទ្ធិ ទទួលបានតួនាទីជាប្រធានការិយាល័យប្រតិបត្តិស្រុកពាមជរ និងមានសាច់ញាតិបងប្អូនរបស់លោក សេង បញ្ញាប្ញទ្ធិ ច្រើននាក់ទៀតសុទ្ធតែមានតំណែងសំខាន់ៗនៅក្នុងមន្ទីរសុខាភិបាលខេត្តព្រៃវែង។ នៅពេលពង្រឹងអំណាចរឹងមាំនៅក្នុងមន្ទីរសុខាភិបាលខេត្តព្រៃវែង បែបនេះហើយទើបលោក សេង បញ្ញាប្ញទ្ធិ ហ៊ានប្រើតួនាទីនិងអំណាចរបស់ខ្លួនធ្វើអ្វីៗស្រេចតែអំពើចិត្ត ហើយបង្ហាញនូវភាពក្រអឺតក្រទមយ៉ាងខ្លាំងជាមួយមន្ត្រីក្រោមឱវាទដែលមិនមែនជាសាច់ញាតិរបស់ខ្លួន។
ជាមួយករណីខាងលើនេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានកោះហៅលោក សេង បញ្ញាប្ញទ្ធិ ប្រធានមន្ទីរសុខាភិបាលខេត្តព្រៃវែង ឲ្យឡើងមកកាន់ទីស្តីការក្រសួងសុខាភិបាល ដើម្បីដុះក្អែល។
រឿងអាស្រូវរបស់លោក សេង បញ្ញាប្ញទ្ធិ ត្រូវបានលាតត្រដាងច្បាស់ៗរួចទៅហើយ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានប្រាប់សារព័ត៌មានក្នុងស្រុកថា ករណី ឯកឧត្តម ឧកញ៉ា បណ្ឌិត សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង ជេរប្រមាថកូនចៅនៅក្នុងអង្គប្រជុំ ត្រូវ ឯកឧត្តម រដ្ឋមន្ត្រី បញ្ជាឲ្យ មន្ត្រីទទួល បន្ទុកចុះទៅស្រាវជ្រាវ និងដោះស្រាយ ដោយមានការសហការជាមួយថ្នាក់ដឹកនាំខេត្តផងដែរ។
សូមបញ្ជាក់ថា កាលថ្ងៃទី០១ ខែមិថុនា ឆ្នាំ២០១៩កន្លងទៅ លោកគ្រូពេទ្យ ហ៊ូ ដា ប្រធានការិយាល័យប្រតិបត្តិ (OD) ស្រុកស្វាយអន្ទរ បានផ្តល់បទសម្ភាសដល់ក្រុមអ្នកកាសែត ពាក់ព័ន្ធនឹងរឿងលោកឧកញ៉ា បណ្ឌិត សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង ជេរប្រមាថរូបលោកនៅក្នុងកិច្ចប្រជុំមួយកាលពីថ្ងៃទី២៨ និងថ្ងៃទី៣០ ខែឧសភា ឆ្នាំ២០១៩។
លោកគ្រូពេទ្យ ហ៊ូ ដា បានថ្លែងប្រាប់អ្នកកាសែតថា « ឯកឧត្តម ប្រធានមន្ទីរសុខាភិបាល បានជេរប្រមាថខ្ញុំ ថា អាក្រពើ, អារមិលគុណ, អាព្រាត់ប្រាសគ្រួសារ, អាបើកឡានក្រឡាប់ ។ គាត់ជេរខ្ញុំ ហើយ គាត់ប្រាប់ ខ្ញុំថា គាត់ឲ្យឱកាស ៧ថ្ងៃ ដើម្បីទៅសុំទោសគាត់ទើបរួចខ្លួន»។
លោកគ្រូពេទ្យ ហ៊ូ ដា បានបន្តថា «ដោយសារគោរពគាត់ជាមេ ខ្ញុំបានទៅសុំទោសគាត់ និងធ្វើកិច្ចសន្យាជូនគាត់ទៀត ប៉ុន្តែទីបំផុតខ្ញុំត្រូវគាត់ដកខ្ញុំចេញពីគ្រុបការងារអស់រលីង ដែលហាក់កាត់ដៃជើងរបស់ខ្ញុំពីការងារអស់ហើយ»។
លោកគ្រូពេទ្យ ហ៊ូ ដា ប្រធានការិយាល័យប្រតិបត្តិ (OD) ស្រុកស្វាយអន្ទរ បានរៀបរាប់អំពីភាពមិនប្រក្រតីក្នុងការអនុវត្តការងាររបស់ ឯកឧត្តម ឧកញ៉ា បណ្ឌិត សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង ជាច្រើនដែលធ្វើឲ្យប៉ះពាល់ដល់ទឹកចិត្តរបស់មន្ត្រីក្រោមឱវាទ។
យោងតាមប្រភពពីមន្ត្រីសុខាភិបាលខេត្តព្រៃវែង មិនមែនតែលោកគ្រូពេទ្យ ហ៊ូ ដា ម្នាក់ទេដែលឈឺចាប់ចំពោះទង្វើរបស់ ឯកឧត្តមឧកញ៉ា បណ្ឌិត សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង ប៉ុន្តែពួកគាត់មិនហ៊ានតវ៉ា ឬទម្លាយនោះទេ ព្រោះខ្លាចអំណាចរបស់មេ។
ទាក់ទិន ការចោទប្រកាន់នេះលោក សេង បញ្ញាឫទ្ធិ ប្រធានមន្ទីរសុខាភិបាល ខេត្តព្រៃវែង បានបញ្ជាក់ប្រាប់កាសែតក្នងស្រុកនៅ ថ្ងៃទី៧មិថុនានេះថា រឿងនេះ គឺបង្កើតឡើងដោយមន្ត្រីមន្ទីសុខាភិបាលខេត្ត ដែលមិន ពេញចិត្តចំពោះការដឹកនាំរបស់លោក ។ លោកអះអាងថា ករណីនេះ បានដោះស្រាយចប់សព្វគ្រប់ហើយ តែបើមន្ត្រីណា នៅតែមិនពេញចិត្តនឹងលោក គឺជារឿងរបស់គេ ព្រោះឥឡូវការងារបានដំណើរជាធម្មតាវិញហើយ ៕ ដោយ៖កូឡាប
