ភ្នំពេញ ៖ អ្នកនាំពាក្យក្រសួងការពារជាតិ បានលើកឡើងថា ការលើកឡើងរបស់ លោក នាយករដ្ឋមន្ត្រីសិង្ហបុរី បានស្តែងឱ្យឃើញថា សិង្ហបុរីពេលនោះ បានគាំទ្ររបបប្រល័យពូជសាសន៍ ដែលបានកាប់សម្លាប់ប្រជាជនកម្ពុជារាប់លាននាក់ និងចង់ឲ្យរបបប្រល័យពូជសាសន៍ វិលត្រឡប់មកវិញ ។
លោកឈុំ សុជាត អ្នកនាំពាក្យក្រសួងការពារជាតិ នៅថ្ងៃទី៧មិថុនានេះ បានសរសេរលើហ្វេសប៊ុកផ្លូវការថា “ខ្ញុំពិតជា មានការសោកស្តាយជាខ្លាំងដែល ឯកឧត្តម លី ស៊ានឡុង នាយករដ្ឋមន្ត្រីសិង្ហបុរី ភាន់ច្រឡំចំពោះប្រវត្តិសាស្ត្រ រហូតដល់និយាយថា «វៀតណាមបានឈ្លានពានកម្ពុជា» គ្រាដែលវៀតណាម បានធ្វើពលិកម្ម រួមកម្លាំងជាមួយកងទ័ពប្រជាជនកម្ពុជា រំដោះប្រជាពលរដ្ឋខ្មែរ ចេញពីរបបប្រល័យពូជសាសន៍ ប៉ុល ពត ដែលពិភពលោកស្អប់ខ្ពើម”។
លោកបន្តថា “ការលើកឡើងរបស់ឯកឧត្តម នាយករដ្ឋមន្ត្រីសិង្ហបុរី បានស្តែងឱ្យឃើញថា សិង្ហបុរីពេលនោះ បានគាំទ្ររបបប្រល័យពូជសាសន៍ ដែលបានកាប់សម្លាប់ប្រជាជនកម្ពុជារាប់លាននាក់ និងចង់ឲ្យរបបប្រល័យពូជសាសន៍វិលត្រឡប់មកវិញដែរ។ ការលើកឡើងនេះ ក៏ជាការប្រមាថដល់ពលិកម្មសាច់ស្រស់ឈាមស្រស់របស់កងទ័ពស្ម័គ្រចិត្តវៀតណាម ដែលបានជួយរំដោះកម្ពុជា ឱ្យរួចផុតពីរបបប្រល័យពូជសាសន៍នោះ”។
រាជរដ្ឋាភិបាលកម្ពុជា យុទ្ធជនកម្ពុជា និងពលរដ្ឋកម្ពុជា ចេះទទួលស្គាល់ការពិត នៃការធ្វើពលិកម្មរបស់កងទ័ពស្ម័គ្រចិត្តវៀតណាម។ បើគ្មានការចូលរួមពីកងទ័ពវៀតណាម ក្នុងការវាយផ្តួលរំលំរបបប៉ុលពតទេ ម្ល៉េះពេលនោះ ប្រជាជនកម្ពុជាត្រូវពួកប៉ុល ពត សម្លាប់យ៉ាងអយុត្តិធម៌ ហើយគ្មានបរទេសណា ជួយរកយុត្តិធម៌ឱ្យទេ។
លោកឈុំ សុជាត បានបញ្ជាក់ថា “ខ្ញុំធ្លាប់ជាប់ក្នុងគុករបស់ ប៉ុល ពត ដោយរង់ចាំតែថ្ងៃស្លាប់ទេ ពេលនោះគឺរស់បានមួយថ្ងៃសម្រាប់តែមួយថ្ងៃ។ រាល់ដង្ហើមចេញចូល បានបន់ស្រន់អស់ហើយ ឱ្យតែមានអ្នកណាមកសង្គ្រោះជីវិត។ ប្រជាជនកម្ពុជាក្នុងរបប ប៉ុល ពត មិនអាចបំភ្លេចគុណ កងទ័ពស្ម័គ្រចិត្តវៀតណាម និងកងទ័ពរណសិរ្យសាមគ្គីសង្រោះជាតិបានទេ។
ខ្ញុំសូមគាំទ្រជានិច្ចចំពោះជំហររាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន និងសម្តេចពិជ័យសេនា ទៀ បាញ់ រួមទាំងក្រសួងការបរទេស និងសហប្រតិបត្តិការកម្ពុជា ដែលប្រតិកម្មចំពោះការភាន់ច្រឡំប្រវត្តិសាស្ត្ររបស់ ឯកឧត្តម នាយករដ្ឋមន្ត្រីសិង្ហបុរី”។
លោកអ្នកមកពាក្យ បានបន្ថែមថា ឯកឧត្តម នាយករដ្ឋមន្ត្រីសិង្ហបុរី មិនមែនជាប្រជាពលរដ្ឋខ្មែរដែលធ្លាប់រស់នៅក្នុងសម័យប៉ុលពត និងរងឥទ្ធិពលដោយរបបឃោរឃៅនេះ គឺពិតជាមិនបានដឹងអំពីទុក្ខវេទនារបស់ប្រជាជនកម្ពុជា ដែលត្រូវការអ្នកជួយសង្គ្រោះជីវិត ក្នុងពេលដែលខ្លួនកំពុងតែរងគ្រោះដោយរបបយង់ឃ្នង ពេលនោះឡើយ។ រឿងនេះ ឯកឧត្តម នាយករដ្ឋមន្ត្រីសិង្ហបុរី គួរតែកែតម្រូវចំពោះ ការលើកឡើងដោយភាន់ច្រឡំប្រវត្តិសាស្ត្រ ខ្វះសច្ចភាព ដែលអាចបង្កឱ្យមានការយល់ច្រឡំចំពោះ កិច្ចសហប្រតិបត្តិការរវាងកងទ័ពស្ម័គ្រចិត្តវៀតណាម ជាមួយកងទ័ពរណសិរ្យសាមគ្គីសង្គ្រោះជាតិ ក្នុងការផ្តួលរំលំរបបប្រល័យពូជសាសន៍ ប៉ុល ពត”៕ ដោយ៖កូឡាប