នាវាចម្បាំងអាមេរិច និងរុស្សីបានធ្វើដំណើរមកគៀកគ្នាខ្លាំងប៊ិះនឹងបុកគ្នា នៅក្នុងមហាសមុទ្រប៉ាស៊ីភិចភាគខាងលិច ហើយភាគីទាំងពីរស្តីបន្ទោសគ្នាទៅវិញទៅមក លើហេតុការណ៍នោះ។
កងនាវាជើងទឹករុស្សី បាននិយាយថានាវាចំបាំងអាមេរិច USS Chancellorsville បានធ្វើដំណើរមកកាត់មុខនាវាពិឃាតរុស្ស៊ី Admiral Vinogradov ចំងាយត្រឹមតែ ៥០ម៉ែត្រប៉ុណ្ណោះ ហើយនាវារុស្សីបានធ្វើការបើកគេច ដើម្បីកុំអោយបុកនាវាអាមេរិច។
ទោះយ៉ាងណា កងកម្លាំងរបស់អាមេរិចបានស្តីបន្ទោសភាគីរុស្សីថា ជាអ្នកធ្វើឲ្យមានហេតុការណ៍នោះកើតឡើង។
មេបញ្ជាការកងនាវាអាមេរិច លោក Clayton Doss បានហៅកងនាវារុស្សីថា មិនមានជំនាញ និងប្រតិបត្តិការគ្មានសុវត្ថិភាព ដោយអះអាងថា នាវាពិឃាតរបស់ពួកគេធ្វើការបើកដោយមិនមានសុវត្ថិភាពដាក់នាវាអាមេរិច។ គាត់ក៏បានច្រានចោលការចោទប្រកាន់រុស្សីផងដែរ។
អាមេរិចបញ្ជាក់ថា នាវាពិឃាតរុស្សីបើកមកជិតនាវាអាមេរិច ចំងាយចន្លោះពី ១៥ ទៅ ៣០ម៉ែត្រប៉ុណ្ណោះនៅសមុទ្រភីលីពីន។
ជាមួយគ្នានេះដែរ កងកម្លាំងប្រចាំតំបន់ប៉ាស៊ីភិចរុស្សី បាននិយាយថា ហេតុការណ៍ប៊ិះបុកគ្នានោះ កើតឡើងនៅភាគអាគ្នេយ៍នៃសមុទ្រចិនខាងកើត។ ពួកគេបានបញ្ជាក់ថា ពួកគេបានបញ្ជូនសារតវ៉ា ទៅកាន់មេបញ្ជាការនៃនាវាអាមេរិចហើយ។
នៅក្នុងសារ រុស្សីបានថ្លែងថា នាវាចំបាំងអាមេរិចបានផ្លាស់ប្តូរទិសដៅភ្លាមៗ និងបើកកាត់មុខនាវាចំបាំងរុស្សីត្រឹមចម្ងាយ ៥០ម៉ែត្រប៉ុណ្ណោះ ដែលការបើកនោះបានបង្ខំអោយកងកម្លាំងរុស្សីត្រូវធ្វើប្រតិបត្តិការបញ្ជៀស៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
