ក្រចេះ ៖ ខេត្តក្រចេះដែលនៅភូមិភាគឦសាន ដែលសិស្សនិស្សិតភាគច្រើន ជាជនជាតិភាគតិចនោះ បានបើកសិក្ខាសាលា ស្ដីពីមេរៀនជីវិត សម្រាប់យុវជនលេីកទី១២ “យុវជន និងការវិនិយោគ ដេីម្បីអនាគត” ក្នុងគោលបំណង បង្កេីតឱកាសឱ្យ ក្មួយសិស្ស និស្សិត និងយុវជនខេត្តក្រចេះ យេីងទទួលនូវចំណេះដឹង និងដំបូន្មានល្អៗពីសំណាក់ឥស្សរជន និងរៀមច្បង ដែលទទួលបានជោគជ័យក្នុងការសិក្សា និងអាជីវកម្មការងារ ដេីម្បីចែករំលែកមេរៀនជីវិត បទពិសោធន៍ការសិក្សា អាជីពការងារ និងជីវិតជូនដល់និស្សិត និងសិស្សានុសិស្សនៃវិទ្យាល័យទាំង១១ ក្នុងខេត្តក្រចេះ ក្រក្រោមអធិបតីភាពលោក ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានកិត្តិយសសមាគមនិស្សិតសិស្សខេត្តក្រចេះ និងលោក ជាក់ ម៉េងហ៊ាង អភិបាលរងខេត្តក្រចេះ នៅថ្ងៃទី៨ ខែមិថុនា ឆ្នាំ២០១៩នេះ នាខេត្តក្រចេះ។
លោក ជាក់ ម៉េងហ៊ាង អភិបាលរងខេត្ត បានមានប្រសាសន៍ថា ស្ទេីរតែមិនអាចជឿបានថាខេត្តដ៏ឆ្ងាយ ដាច់ស្រយាលនៅភូមិភាគឦសាន នៃប្រទេសកម្ពុជាយើង អាចបង្កើតបាននូវសមាគមដ៏មានតម្លៃ និងកិត្តិយសដ៏ធំធេងសម្រាប់ខេត្ត និងសង្គមជាតិយើងទាំងមូល ដែលកាលពីមុនអ្នកទីក្រុងយល់ថា អ្នកខេត្តក្រចេះជាជនជាតិព្នង ឬជនជាតិគួយជាដេីម។ លោក បានបន្តទៀតថា ក្មួយៗពិតជាមានសំណាងណាស់ ដែលមានថ្នាក់ដឹកនាំ ប្រកបដោយគតិបណ្ឌិត របស់សម្ដេចអគ្គមហាសេនាបតីតេជោ ហ៊ុន សែន បានធ្វើឱ្យតំបន់ទីស្ងាត់ជ្រងំ ក្លាយជាទីជួបជុំបណ្ដុំទៅដោយទីផ្សារ ទីឆ្ងាយដាច់ស្រយាលក្នុងពីរាជធានីភ្នំពេញ ក៏បង្រួញទីមកជិតបង្កេីយជាដេីម។ តួយ៉ាងខេត្តក្រចេះសព្វថ្ងៃ បានក្លាយជាខេត្តដ៏ស្រស់ត្រកាល ជាទីទេសចរណ៍ សម្រាប់ភ្ញៀវជាតិ និងអន្តរជាតិ និងមានផ្លូវធ្វើដំណើរ ចំណាយពេលត្រឹមតែ៤ ទៅ៥ម៉ោង ប៉ុណ្ណោះពីទីក្រុងភ្នំពេញខុស ពីសម័យមុនដែលចំណាយពេល២ថ្ងៃនោះ ដោយសារបណ្ដាញហេដ្ឋារចនាសម្ព័ន្ធ ស្ពាន ថ្នល់ត្រូវបានសាងសង់ឡេីង ស្ទេីរគ្រប់ទិសទី។ ជាក់ស្តែងខេត្តក្រចេះយើង មានសកលវិទ្យាល័យរដ្ឋមួយកន្លែង ដែលបង្កើតឡើងដោយប្រមុខដឹកនាំរដ្ឋាភិបាល រួមថ្នាក់ដឹកនាំគ្រប់លំដាប់ ស្របតាមអនុសាសន៍ ខេត្ត១ មានសកលវិទ្យាល័យរដ្ឋមួយ ក្នុងគោលបំណង កាត់បន្ថយគម្លាតនៃការបន្តការសិក្សា និងបំពេញនូវតម្រូវការសិក្សានៅប៉ែកឦសាន្ត។
លោក ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានកិត្តិយសសមាគមនិស្សិតសិស្សខេត្តក្រចេះ មានប្រសាសន៍ថា សិក្ខាសាលាដែលបានរៀបចំ នាពេលនេះ គឺជាវេទិកាដ៏មានសារសំខាន់ណាស់ សម្រាប់និស្សិត និងសិស្សានុសិស្ស ក្នុងការទទួលបានព័ត៌មាន មេរៀនជីវិត និងបទពិសោធន៍ថ្មីបន្ថែមទៀត តាមរយៈការចែករំលែក របស់វាគ្មិនដែលមានវត្តមាននៅទីនេះ ចំពោះបេសកកម្មរបស់សមាគមគឺ ជួយដោះស្រាយ និងសម្រាលដល់ការលំបាក និងកង្វះនៃព័ត៌មានសិក្សា សម្ភារសិក្សា និងការផ្ដល់ប្រឹក្សានានាពាក់ព័ន្ធនឹង ការសម្រេចចិត្តជ្រើសរើសជំនាញសិក្សា ដេីម្បីឈោងចាប់យកមុខរបរឬ ការងារមួយយ៉ាងសមរម្យ សម្រាប់ខ្លួនឯង ក៏ដូចជាសម្រាប់ជួយដល់គ្រួសារ និងប្រទេសជាតិ។
ឆ្លៀតក្នុងឱកាសនោះ លោក ងី តាយី បានផ្ដាំផ្ញើដល់ សិស្សានុសិស្ស និស្សិត និងយុវជនទាំងអស់ ដើម្បីអភិវឌ្ឍខ្លួន ឱ្យបានល្អប្រសើរបំផុត និងក្លាយខ្លួនជាទំពាំងដ៏ល្អ សម្រាប់ស្នងនូវឬស្សី ពោលគឺជាសសរទ្រដ៏រឹងមាំជួយទ្រទ្រង់ និងកសាងជាតិយើង ទៅអនាគតជាបន្តទៀត។ លោក បានអំពាវនាវដល់ ឯកឧត្តម លោកឧកញ៉ា លោកជំទាវ លោក លោកស្រី អ្នកនាងកញ្ញា មិនថាតែអ្នកក្រចេះនោះទេ គឺពីគ្រប់សំណាក់មជ្ឈដ្ឋានជាតិ និងអន្តរជាតិ មេត្តាបន្តការចូលរួមចំណែក ជាមួយសមាគម ដេីម្បីឲ្យសមាគមនេះ ក្លាយទៅជាទ្រនំ ដ៏សុខសាន្ត ជាអ្នកប្រឹក្សា និងអាណាព្យាបាលដ៏កក់ក្តៅ ឬជាម្ដាយតែមួយរបស់សិស្ស និស្សិត ពីទីជនបទ មកសិក្សានៅរាជធានីភ្នំពេញ៕ ដោយ៖កូឡាប