ខេត្តព្រះសីហនុ ៖ អភិបាល នៃគណៈអភិបាលខេត្តព្រះសីហនុ លោក យន្ត មីន មានប្រសាសន៍ថា នៅព្រឹថ្ងៃទី៩ ខែមិថុនា ឆ្នាំ២០១៩នេះ នៅទូទាំង ៤ក្រុង-ស្រុក និងគ្រប់ឃុំសង្កាត់ នាខេត្តព្រះសីហនុ គឺទាំងមន្ត្រីរាជការស៊ីវិល ស្ថាប័នកងកម្លាំងប្រដាប់អាវុធ និងប្រជាពលរដ្ឋ បានអញ្ជើញជួបជុំគ្នា នៅតាមមូលដ្ឋានរៀងៗខ្លួន ដើម្បីទទួលទាននំបញ្ចុកសាមគ្គី និងឯកភាពជាតិ ស្របតាមការអំពាវនាវ របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។
លោក យន្ត មីន ឲ្យដឹងដូច្នេះ ធ្វើឡើងនាឱកាស ចូលរួមជាអធិបតីភាព ក្នុងពីធីសម្ភោធដាក់ឲ្យប្រើប្រាស់សមិទ្ធិផលនានា ក្នុងវត្តព្រីងច័ន្ចបារមី ស្ថិតក្នុងភូមិទួលទទឹង១ ឃុំទួលទទឹង ស្រុកព្រៃនប់ ខេត្តព្រះសីហនុ ព្រឹកថ្ងៃអាទិត្យ ទី៩ ខែមិថុនា ឆ្នាំ២០១៩នេះ។
លោក យន្ត មីន បន្តថា នៅតាមមូលដ្ឋានឃុំ-សង្កាត់ ក្រុង-ស្រុក នៅទូទាំងខេត្តព្រះសីហនុ គឺអាជ្ញាធរ នៅតាមមូលដ្ឋាន ឬតាមស្ថាប័នអង្គភាពរៀងៗខ្លួន បានធ្វើពិធីជួបជុំទទួលទាននំបញ្ចុករួមគ្នា តាំងពីព្រឹកព្រលឹម ថ្ងៃអាទិត្យ ទី៩ ខែមិថុនា បន្តរហូតមកដល់អាហារថ្ងៃត្រង់ ស្ថិតក្នុងបរិយាកាសសប្បាយរីករាយ និងស្នឹទស្នាលបំផុត។
លោក យន្ត មីន បន្តថា ការជួបជុំខ្លះត្រូវបានរៀបចំឡើង នៅតាមទីស្នាក់ការ របស់គណបក្សប្រជាជនកម្ពុជា នៅតាមឃុំ- សង្កាត់ ក្រុង -ស្រុក និងការជួបជុំខ្លះទៀត បានរៀបចំឡើងនៅតាមវត្តអារាម, តាមសាលារៀន និងតាមមន្ទីរអង្គភាពរៀងៗខ្លួន។
លោក យន្ត មីន បន្ថែមថា ការជួបជុំទទួលទាននំបញ្ចុក នៅថ្ងៃទី៩ ខែមិថុនានេះ បានធ្វើឡើងតាមការអំពាវនាវ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានប្រកាសឲ្យប្រជាពលរដ្ឋខ្មែរនៅទូទាំងប្រទេស ទទួលទាននំបញ្ចុក ដែលជាអត្តសញ្ញាណជាតិខ្មែរ ជានំបញ្ចុកសាមគ្គីភាព និងឯកភាពជាតិ៕ ដែន សីមា
