ខេត្តព្រះសីហនុ ៖ ប្រធានមន្ទីរសុខាភិបាលខេត្តព្រះសីហនុ លោកស្រី លឹម សាមាន មានប្រសាន៍ថា តាមការចុះស្រាវជ្រាវពីមន្ត្រីជំនាញមន្ទីរសុខាភិបាលបានរកឃើញថា អត្រាប្រជាពលរដ្ឋកើតជំងឺគ្រុនឈាម ដែលមករកសេវាព្យាបាល គឺមានចំនួនកើនច្រើនគួរឲ្យព្រួយបារម្ភ និងទាមទារឲ្យអ្នកជាប់ពាក់ព័ន្ធចូលរួមសហការទប់ស្កាត់។
លោកស្រីបន្តថា អត្រាចំនួនអ្នកជំងឺគ្រុនឈាមកើតខ្ពស់នៅដើមឆ្នាំនេះ ស្របពេលកំណើន នៃការអភិវឌ្ឍនៅក្នុងមូលដ្ឋានខេត្តព្រះសីហនុ មានការរីកចំរើនកឿន ក្នុងប៉ុន្មានឆ្នាំចុងក្រោយនេះ។ ហើយទន្ទឹមគ្នានេះ កំណើនប្រជាពលរដ្ឋ ដែលចូលមករស់នៅ និងប្រកបមុខរបរផ្សេងៗ ក្នុងខេត្តព្រះសីហនុ ក៏មានចំនួនច្រើនផងដែរ។
លោកស្រី លឹម សាមាន បន្តថា តាមរយៈកំណើនមនុស្សចូលមករស់នៅខេត្តព្រះសីហនុច្រើននេះ មន្ត្រីមន្ទីរសុខាភិបាលខេត្ត ក៏បានរកឃើញអត្រាប្រជាពលរដ្ឋ កើត ឬមានជំងឺជំងឺគ្រុនឈាម ក៏មានចំនួនកើនច្រើនដែរ។
លោកស្រីបន្តថា កំណើនជំងឺគ្រុនឈាមនេះ គឺទាមទារឲ្យប្រជាពលរដ្ឋ និងផ្នែកពាក់ព័ន្ធ ត្រូវចូលរួមបង្ការទប់ស្កាត់ជំងឺគ្រុនឈាម ឲ្យបានទាំងអស់គ្នា។
ត្រង់ចំណុចនេះ លោកស្រី លឹម សាមាន បញ្ជាក់ថា ចាប់ពីថ្ងៃទី១០ ខែមិថុនា ឆ្នាំ២០១៩នេះតទៅ ខាងមន្ត្រីជំនាញមន្ទីរសុខាភិបាលខេត្តព្រះសីហនុ នឹងបើកយុទ្ធនាការចុះដាក់ថ្នាំអាបែត ចុះអប់រំសុខភាពប្រជាពលរដ្ឋនៅតាមផ្ទះ និងបាញ់ថ្នាំសម្លាប់សត្វមូសជាលើកទី២ នៅតាមមូលដ្ឋានមួយចំនួន ដែលមានប្រជាពលរដ្ឋកើតជំងឺគ្រុនឈានច្រើន។
លោកស្រី លឹម សាមាន បញ្ជាក់ថា យុទ្ធនាការលុបបំបាត់ជំងឺគ្រុនឈាមលើកទី២ ឆ្នាំ២០១៩នេះ ចាប់ផ្ដេីមពីតំបមជាយក្រុង នៃតំបន់អូរត្រេះ បន្តរហូតចូលមកក្នុងទីប្រជុំជនក្នុងក្រុង និងនៅតាមបណ្តាស្រុកមួយចំនួន នាខេត្តព្រះសីហនុ ដែលប្រជាពលរដ្ឋ កើតមានជំងឺគ្រុនឈាមច្រើន។
គួររំលឹកថា ថា យុទ្ធនាការចុះដាក់ថ្នាំអាបែត លុបបំបាត់មូសខ្លា បង្ការទប់ស្កាត់ជំងឺគ្រុនឈាមជាលើកទី១ ក្នុងឆ្នាំនេះ បានចាប់ផ្តើម កាលពីខែមករា ដល់ខែកុម្ភៈ ឆ្នាំ២០១៩។
ដើម្បីឲ្យយុទ្ធនាការខាងលើនេះទទួលជោគជ័យ លោកស្រី លឹម សាមាន ប្រធានមន្ទីរសុខាភិបាលខេត្តព្រះសីហនុ បានអំពាវនាវដល់ប្រជាពលរដ្ឋ រស់នៅតាមមូលដ្ឋាននានា ត្រូវចូលរួមសហការ ជាមួយមន្ត្រីជំនាញមន្ទីរសុខាភិបាល ដែលចុះដាក់ថ្នាំអាបែត ដើម្បីកំចាត់មូសខ្លាលុបបំបាត់ជំងឺគ្រុនឈាម ឲ្យបានទាំងគ្នា។
បន្ថែមលើនេះ លោកស្រី លឹម សាមាន ក៏បានរំលឹកដល់ប្រជាពលរដ្ឋ ត្រូវចូលរួមសម្អាតបរិស្ថាននៅជុំវិញលំនៅដ្ឋានរៀងៗខ្លួន ឲ្យមានអនាម័យល្អ ដើម្បីលុបបំបាត់ជម្រកមូសខ្លាពងកូន ដែលជាប្រភពចម្លងជំងឺគ្រុនឈាម ឲ្យអស់ជាស្ថាពរនៅតាមមូលដ្ឋាននីមួយៗ។
ជាងនេះទៀត លោកស្រីប្រធានមន្ទីរ ក៏បានក្រើនរំលឹកដល់អាណាព្យាបាលគ្រប់ៗរូប ត្រូវស្លៀកសម្លៀកបំពាក់ គឺត្រូវពាក់អាវដៃវែង និងខោជេីងវែង កូនៗរបស់ខ្លួនឲ្យបានគ្រប់គ្នា..។
ចំណុចនេះ លោកស្រី លឹម សាមាន បញ្ជាក់ថា ដើម្បីឲ្យយុទ្ធនាការបង្ការទប់ស្កាត់ និងលុបបំបាត់ជំងឺគ្រុនឈាម អនុវត្តមានប្រសិទ្ធភាព ស្នើឲ្យប្រជាពលរដ្ឋ និងផ្នែកពាក់ព័ន្ធ គឺទាំងវិស័យឯកជន និងស្ថាប័នរដ្ឋ ត្រូវចូលរួមសហការគាំទ្រឲ្យបានទាំងអស់គ្នា ទេីបយុទ្ធនាការខាងលើនេះអនុវត្តបានជោគជ័យ និងមានប្រសិទ្ធភាពខ្ពស់៕ ដែន សីមា