អនុប្រធានាធិបតីប្រេស៊ីល លោក Hamilton Mourao បានថ្លែងថា នឹងគ្មានការហាមឃាត់ក្រុមហ៊ុនបច្ចេកវិទ្យារបស់ចិន Huawei មិនឲ្យធ្វើប្រតិបត្តិការប្រព័ន្ធ 5G នៅក្នុងទឹកដីរបស់ប្រេស៊ីឡើយ។
លោកបានថ្លែងថា រដ្ឋាភិបាលរបស់លោកមិនដែលគិតអំពីការហាមប្រាម Huawei នៅប្រេស៊ីលសោះឡើយ។
លោកថ្លែងកាលពីថ្ងៃសុក្រកន្លងទៅថា “មិនមានការហាមឃាត់ទេ គ្មានទេ។ ប្រទេសពួកយើងត្រូវការសហមាហរ័ណកម្មឌីជីថល។ នៅពេលអ្នកធ្វើដំណើរឆ្ងាយចេញពីរដ្ឋធានី Brasilia ៥០គីឡូម៉ែត្រ វានឹងមិនមានសេវាទូរស័ព្ទនោះទេ”។
លោកបញ្ជាក់ថា ប្រធានាធិបតីប្រេស៊ីល លោក Jair Bolsonaro ត្រូវបានប្រធានាធិបតីអាមេរិច ដូណាល់ ត្រាំ ស្នើឲ្យធ្វើការបដិសេធបច្ចេកវិទ្យារបស់ចិន កំឡុងដំណើរទស្សនៈកិច្ចរបស់លោកទៅកាន់ សហរដ្ឋអាមេរិចកាលពីខែ មីនាកន្លងទៅនេះ។
សូមបញ្ជាក់ថា អាមេរិចបានបញ្ចុះបញ្ចូលសម្ព័ន្ធមិត្តរបស់ខ្លួនជាច្រើនមិនឲ្យទទួលយកបច្ចេកវិទ្យារបស់ចិន ដោយអះអាងអំពីបញ្ហាសន្តិសុខជាតិ ដោយចោទថា រដ្ឋាភិបាលចិនអាចនឹងប្រើប្រាស់ឧបករណ៍របស់ Huawei ដើម្បីធ្វើចារកម្ម ប៉ុន្តែត្រូវបានស្ថាបនិក Huawei ធ្វើការបដិសេធ និងបានលើកឡើងថា ក្រុមហ៊ុនលោកមិនមានទំនាក់ទំនងជាមួយនឹងរដ្ឋាភិបាលចិននោះទេ៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua
