សៀមរាប ៖ លោកខៀវ កាញារីទ្ធ រដ្ឋមន្ត្រីក្រសួងព័ត៌មាន មានប្រសាសន៍ថា វាគឺជាកិត្តិយសនិងសេចក្តីរីករាយដ៏អស្ចារ្យមួយសម្រាប់ព្រះរាជាណាចក្រកម្ពុជា ជាពិសេសក្រសួងព័ត៌មានដែលទទួលធ្វើជាម្ចាស់ផ្ទះនៃកិច្ចប្រជុំកំពូលសារព័ត៌មានអាស៊ីលើកទី១៦ (AMS) នៅសៀមរាប ពីថ្ងៃទី១២-១៣ ខែមិថុនា ឆ្នាំ២០១៩ និងសិក្ខាសាលាមុនកិច្ចប្រជុំកំពូលនេះ នៅថ្ងៃទី១០ និងទី១១ ខែមិថុនា ក្នុងភាពជាដៃគូជាមួយវិទ្យាស្ថានអាស៊ីប៉ាស៊ីហ្វិចសម្រាប់ការផ្សព្វផ្សាយ(AIBD) ដែលជាស្ថាប័នគួរឲ្យទុកចិត្តនិងមានបទពិសោធន៍ខ្ពស់ ។
ថ្លែងតាមរយៈសារដែលបានបង្ហោះក្នុងគេហទំព័រ AIBD លោករដ្ឋមន្ត្រី បានបញ្ជាក់ថា សន្និសីទសារព័ត៌មានអាស៊ីគឺជាព្រឹត្តិការណ៍នៃការផ្សព្វផ្សាយអន្តរជាតិដែលឈានមុខគេដែល ផ្តល់ឱកាសដល់អ្នកផ្សាយអ្នកអនុវត្តប្រព័ន្ធផ្សព្វផ្សាយអ្នកដឹកនាំឧស្សាហកម្មអ្នក សិក្សាស្រាវ ជ្រាវអ្នកជំនាញនិងអ្នកបង្កើតគោលនយោបាយប្រព័ន្ធផ្សព្វផ្សាយនៅទូទាំងពិភពលោកបានជួបនិងពិភាក្សាអំពីរបៀប អភិវឌ្ឍន៍ គុណភាពប្រព័ន្ធផ្សព្វផ្សាយក្នុងអំឡុងពេល នៃការប្រកួតប្រជែងដ៏ខ្លាំងក្លាបដិវត្តន៍បច្ចេកវិទ្យាជំនាន់ទី៤។
សន្និសីទកំពូលសារព័ត៌មានអាស៊ី លើកទី១៦ ដែលបាននឹងកំពុងធ្វើនៅលើទឹកដីអង្គរដ៏បវរ នាខេត្តសៀមរាបនេះ ផ្តោតលើ ប្រធានបទ«ប្រព័ន្ធផ្សព្វផ្សាយឌីជីថល-អភិវឌ្ឍន៍ទីផ្សារ»ដោយ មាន គណៈ ប្រតិភូជាថ្នាក់ដឹកនាំ និងតំណាងស្ថាប័នរដ្ឋាភិបាល ព្រមទាំងអ្នកសារព័ត៌មានជាតិ និងអន្ត រជាតិចូលរួមប្រមាណ៥០០នាក់ មកពីបណ្ដា ប្រទេសជាង៤០ នៅក្នុងតំបន់និងពិភព លោកមានដូចជា៖ ថៃ ឡាវមីយ៉ាន់ម៉ា ឥណ្ឌូនេស៊ី កូរ៉េខាងត្បូង សាម៉ៅ ជាដើម។
លោក ខៀវ កាញារីទ្ធ មានប្រសាសន៍ថា ប្រធានបទនៃកិច្ចប្រជុំកំពូលនេះ គឺមាន ភាពល្អប្រសើរ ដែលអាចផ្តល់ឲ្យវឌ្ឍនភាពថ្មីនៃការអនុម័ត បច្ចេកវិទ្យាក្នុងឧស្សា ហកម្មប្រព័ន្ធ ផ្សព្វផ្សាយ នៅ អាស៊ីប៉ាស៊ីហ្វិក។
សន្និសីទកំពូលសារព័ត៌មានអាស៊ី លើកទី១៦ នឹងបើកជាផ្លូវការក្រោម អធិបតីភាពដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែននាយក រដ្ឋមន្ត្រីនៃព្រះរាជាណាចក្រ កម្ពុជានៅថ្ងៃទី ១២ ខែមិថុនា ផ្តោតលើបញ្ហាសំខាន់ៗដូចជា ៖ ផលប៉ះ ពាល់នៃវិស័យសារព័ត៌មានក្រោមឥទ្ធិពលបដិវត្តន៍ឧស្សាហកម្មជំនាន់ទី៤ ការប្រយុទ្ធប្រឆាំងព័ត៌មានក្លែងក្លាយ ការបង្កើតកម្មវិធីដ៏មានប្រសិទ្ធភាពក្នុងយុគសម័យឌីជីថល និន្នាការនៃបច្ចេកវិទ្យា 4K ជាដើម។
មន្ត្រី AIBD ថ្លែងដោយសរសើរថា សន្និសីទកំពូលដែលធ្វើឡើង នៅកម្ពុជានេះត្រូវបានរៀប ចំឡើងយ៉ាងល្អប្រសើរ។
សូមបញ្ជាក់ថា ក្នុងអំឡុងពេលចូលរួមសន្និសីទកំពូលនេះ គណៈប្រតិភូជាថ្នាក់ដឹកនាំ និង អ្នកសារព័ត៌មាននឹងត្រូវបានអញ្ជើញឲ្យទៅទស្សនា សារមន្ទីរ សន្តិភាពនៃសម្មភាពកម្ចាត់ មីន របស់ ស៊ីម៉ាក់ និងប្រាសាទ អង្គរវត្ត ដើម្បីស្វែងយល់ពីកិច្ចខិតខំរប ស់កម្ពុជាក្នុងការបោស សំអាត គ្រាប់ មីន និងយុទ្ធភណ្ឌមិនទាន់ផ្ទុះដែលបន្សល់ពីសង្គ្រាម សម្រាប់ បម្រើដល់វិស័យទេសចរណ៍របស់កម្ពុជានាពេលបច្ចុប្បន្ន ៕ ដោយ ៖ កូឡាប
