ខេត្តស្វាយរៀង ៖ បន្ទាប់ពីទទួលបានព័ត៌មានដ៏សែនរន្ធត់ និងក្រៀមក្រំនេះមក នារសៀលថ្ងៃទី ១០ ខែ មិថុនា ឆ្នាំ២០១៩នេះ លោកស្រី ដួង វណ្ណា អនុប្រធានកិត្តិយសសាខាកាកបាទក្រហមកម្ពុជាខេត្តស្វាយរៀង រួមដំណើរដោយលោកស្រី ពៅ សុភាព ហេរញ្ញឹកគណៈកម្មាធិការសាខានាំយកបច្ច័យ ទេយ្យទានទៅចូលរួមរំលែកទុក្ខ ដល់ក្រុមគ្រួសារសព ។
លោកស្រី ដួង វណ្ណា បានចូលរួមសម្តែងនូវក្តីរន្ធត់ក្រៀមក្រំឥតឧបមា លោកស្រីបានដឹកនាំ ក្រុមការងារសាខាយកថវិកា និងសម្ភារៈមួយចំនួន ជូនដល់គ្រួសារនៃសព លោកស្រីតំណាង គណៈកម្មាធិការសាខា សូមចូលរួមរំលែកទុក្ខដល់ក្រុមគ្រួសារនៃសព ហើយថវិកាដ៏តិចតួចស្តួចស្តើងទាំងនេះមិនអាចជួយទុក្ខលំបាកដល់បងប្អូនទាំងស្រុងនោះទេ គ្រាន់តែអាចជួយសម្រួលបានមួយគ្រាតែប៉ុណ្ណោះ និងសូមបួងសួង សូមវិញ្ញាណក្ខ័ន្ធអ្នកដែលបានស្លាប់ទៅកាន់សុគតិភពកុំបីឃ្លៀងឃ្លាតឡើយ ។
ជាការចូលរួមរំលែកទុក្ខនោះលោកស្រីបានប្រគល់ជូនដល់គ្រួសារសពនូវអង្ករ ១០០ គ.ក្រ ទៀន ២ គ.ក្រ ធូប ២ ដុំ ទេយ្យទាន ២ កញ្ចប់ ទឹកបរិសុទ្ធ ២ កេស ទឹកក្រូច ២ កេស និងថវិកាចូលបុណ្យ ៥០០,០០០ រៀល លោកស្រីឧបនាយករដ្ឋមន្ត្រី ម៉ែន សំអន ឧបត្ថម្ភថវិកាចូលបុណ្យតាមរយៈសាខាកាកបាទក្រហមកម្ពុជាខេត្ត ចំនួន ៥០០,០០០ រៀល ។
សូមជម្រាបជូនថា នៅវេលាម៉ោង ៩និង៣៥ នាទីព្រឹកមិញនេះ មានករណីផ្ទុះគ្រាប់បែកក្រសាំងដែលទុកចោលក្រោមជង្រុកស្រូវអស់រយៈពេលច្រើនឆ្នាំ ហើយបានរើសមកដំបំបែកដើម្បីទុកលក់អេដចាយក៍បណ្តាលឲ្យផ្ទុះស្លាប់មនុស្ស ២ នាក់យាយ ចៅ ១ ឈ្មោះ ផង់ សុភី ភេទស្រី អាយុ ៦៥ ឆ្នាំ ២ ឈ្មោះ ឃួន បញ្ញា ភេទប្រុស អាយុ ១០ ឆ្នាំ អ្នកទាំង ពីរមានទីលំនៅភូមិ សំបួរ ឃុំសំបួរ ស្រុកស្វាយទាប ខេត្តស្វាយរៀង ៕ ដោយ ៖ វ៉ៃកូ