ភ្នំពេញ ៖ ២នាក់ប្តីប្រពន្ធបានប្រាប់ក្រុមគ្រួសារថា ទៅដកលុយថ្លៃលក់ដីពីគណនីនៅធនាគារ ABA រួចមកក៏បាត់ដំណឹងសូន្យឈឹងមិនអាចទំនាក់ទំនងបានដោយគ្មានមូលហេតុមិនដឹងជាទៅណាស្លាប់ឬរស់នោះទេ ចាប់តាំងពីពីថ្ងៃទី ៣ ខែមិថុនា ឆ្នាំ២០១៩ រហូតដល់ថ្ងៃទី១១មិថុនានេះ។
នគរបាលបានឲ្យដឹងថា ប្តី ប្រពន្ធមួយគូដែលបាត់ខ្លួននេះ មានឈ្មោះ ហ៊ិន ភានិ ត ភេទប្រុស អាយុ ២៥ឆ្នាំ ជាប្តីប្រឡងជាប់ក្របខ័ណ្ឌមន្ត្រី នគរបាលជាតិ អង្គភាពនាយកដ្ឋានសរុបផែនការ មានទីលំនៅផ្ទះលេខ ១១៧ E3Z ផ្លូវលេខ១៣៦ ភូមិ២ សង្កាត់ផ្សារកណ្តាលទី២ ខណ្ឌដូនពេញ និងស្ត្រីជាប្រពន្ធឈ្មោះ លី ចន្ធូ អាយុ២៧ឆ្នាំ ស្នាក់នៅជាមួយគ្នា ។
តាមប្រភពពីក្រុមគ្រួសារបានប្រាប់សមត្ថកិច្ចថា មុនពេលកើតហេតុគឺនៅថ្ងៃទី៣ ខែមិថុនា ឆ្នាំ២០១៩ វេលាម៉ោង៨ ទាំងពីរនាក់ប្តីប្រពន្ធបានប្រាប់ថា ពួកគេទៅដកលុយនៅធនាគារ ABA សាខាទួលគោកលុយគេវេចូលកុងថ្លៃលក់ដី ។ ពេលនោះក្រុមគ្រួសារនៅទាក់ទងគ្នា តាមទូរស័ព្ទបានធម្មតារហូតដល់ម៉ោង១៤រសៀល ក៏ទាក់ទងតាមទូរស័ព្ទលែងបានតែម្តង ។
ប្រភពខាងលើបានបន្តថា ចាប់តាំងពីថ្ងៃបាត់ខ្លួន (០៣.០៦.២០១៩) រហូតមកដល់ពេលនេះគឺគ្មានព័ត៌មានពីពួកគេ ( ប្តីប្រពន្ធដែលបាត់ខ្លួន ) ទាំងពីរនាក់នេះទេ និងទូរស័ព្ទក៏មិនអាចទាក់ទងបានដែរ ៕ ដោយ៖កូឡាប