កំពង់ស្ពឺ ៖ មុននេះបន្ដិច ! វេលាម៉ោង ០៦និង៣០ នាទីព្រឹកថ្ងៃទី១១ ខែមិថុនា ឆ្នាំ២០១៩ មានករណីគ្រោះថ្នាក់ចរាចរស្ថិតនៅចំណុចសេះស ផ្លូវជាតិលេខ៤១ ចន្លោះគីឡូម៉ែត្រលេខ៤០-៤១ ភូមិតាដែង ឃុំពោធិម្រាល ស្រុកបសេដ្ឋ បង្កឡេីងរវាងរថយន្ដសណ្ដោងរ៉ឺម៉ក ដឹកទំនិញសុីម៉ង់ត៍ បើកបរក្នុងទិសដៅបញ្ច្រាសគ្នាបុកជាមួយរថយន្តប្រភេទតូរីសដឹកកម្មករ កម្មការិនី (៣៥នាក់) ខណៈពេលនេះមិនមានជនរងគ្រោះបណ្ដាលអោយបាត់បង់អាយុជីវិតនោះទេ “របួសធ្ងន់ ស្រាល ១៦នាក់ ប្រុស១”។
លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានឲ្យដឹងថា ៖ ហេតុការណ៍នេះបណ្ដាលឲ្យរបួសកម្មករ-កម្មការិនី១៦នាក់ (ប្រុសម្នាក់ និងរបួសស្រាល០៦នាក់) ត្រូវបានរថយន្ដសង្គ្រោះដឹកទៅកាន់មន្ទីរបង្អែកខេត្តកំពង់ស្ពឺ២នាក់ និងខេត្តតាកែវ១៤នាក់។
លោកបញ្ចាក់ទៀតថា ៖ ហេតុការណ៍នេះបង្កឡើងដោយរថយន្ដដឹកស៊ីម៉ងតិ៍ ហើយអ្នកបើកបររថយន្ដដឹកស៊ីម៉ងត៍ បានរត់គេចខ្លួនពីកន្លែងកើតហេតុ ខណៈនគរបាលជំនាញកំពុងស្រាវជ្រាវ ដើម្បីកំណត់មុខសញ្ញាចាប់ខ្លួន យកមកផ្ដន្ទាទោសតាមច្បាប់៕ ដោយ៖កូឡាប
