ប្តីប្រពន្ធចិត្តអប្រិយ ជនជាតិជប៉ុន២រូប ត្រូវបានចាប់ខ្លួនក្រោយពីកូនស្រីវ័យ៣៣ឆ្នាំ របស់ពួកគេត្រូវបានរកឃើញថា ស្លាប់ដោយចាក់សោរក្នុងបន្ទប់ជិត។
តាមប៉ូលិស Osaka, ជប៉ុន សាកសពរបស់ Airi Kakimoto អាយុ៣៣ឆ្នាំ ត្រូវបានរកឃើញក្នុងស្ថានភាពដ៏ស្គមស្គាំងសល់ទម្ងន់តែ ១៩គីឡូក្រាមប៉ុណ្ណោះ។ ហេតុការណ៍ត្រូវបានទម្លាយចេញ ក្រោយពេលពេលឪពុកម្តាយរបស់ Airi រាយការណ៍ប្រាប់ប៉ូលិសថា កូនស្រីរបស់ខ្លួនបានស្លាប់នៅថ្ងៃទី ២៣/១២។
Yasutaka Kakimoto អាយុ ៥៥ឆ្នាំ និង Yukari Kakimoto អាយុ ៥៣ឆ្នាំ ជាឪពុកនិងម្តាយរបស់ Airi បានសារភាពថា ខ្លួនឲ្យនាងបរិភោគអាហារតែមួយថ្ងៃមួយដងប៉ុណ្ណោះ ហើយបានបង្ខាំងនាងទុកក្នុងបន្ទប់មួយមានទំហំ ៣ម៉ែត្រការ៉េ ប៉ូលិសបានដកសម្តីរបស់ឪពុកម្តាយពីរនាក់នេះ ឲ្យដឹងថា “កូនស្រីរបស់ពួកខ្ញុំបានកើតជំងឺវិកលចរិក។ ចាប់ពីវ័យ ១៦-១៧ឆ្នាំ វាកាន់តែមានអំពើហិង្សាខ្លាំងឡើង ហេតុនេះទើបពួកខ្ញុំបង្ខំចិត្តបង្ខាំងនាងទុកក្នុងបន្ទប់។
ប៉ូលិស Osaka ឲ្យដឹងបន្ថែមថា បន្ទប់របស់អាយរី មានភ្ជាប់នូវកាមេរ៉ាឃ្លាំមើលយ៉ាងច្រើន ហើយមានតែទ្វារមួយគត់ ប្រើសោរបើកពីខាងក្រៅ។ ក្នុងបន្ទប់មានបន្ទប់ទឹករៀបចំបែបបណ្តោះអាសន្នមួយប៉ុណ្ណោះ។
តាមការពិនិត្យនោះ Airi បានស្លាប់តាំងពីថ្ងៃទី ១៨/១២ ដោយខ្សោះបាក់កម្លាំង។ ឪពុកម្តាយ Airi ត្រូវបានប៉ូលិសចាប់ខ្លួន។
តាមសាធារណមតិនោះ ប្រហែលជាឪពុកម្តាយជនរងគ្រោះខ្លាចញញើត ពីការរើសអើងពីអ្នកផងទាំងពួង ឬអាចថា “ខ្លាចបាក់មុខបាក់មាត់” ទើបមានអំពើសាហាវបែបនេះ៕ សូយន
