ភ្នំពេញ ៖ លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានអញ្ជើញជាអធិបតីក្នុងកិច្ចប្រជុំក្រុមការងារបច្ចេកទេសចម្រុះរាជរដ្ឋាភិបាល-ដៃគូអភិវឌ្ឍន៍លើវិស័យមីនដោយមានការចូលរួមពីតំណាងដៃគូអភិវឌ្ឍន៍ ប្រទេសផ្តល់ជំនួយក្រសួង-ស្ថាប័នពាក់ព័ន្ធ ប្រតិបត្តិករបោសសម្អាតមីនជាតិ និងអន្តរជាតិនៅព្រឹកថ្ងៃទី១១ ខែមិថុនា ឆ្នាំ២០១៩។
ជាកិច្ចចាប់ផ្តើម លោកទេសរដ្ឋមន្ត្រី បានមានប្រសាសន៍ ក្នុងនាមសម្តេចតេជោ នាយករដ្ឋមន្ត្រី និងជាប្រធានអាជ្ញាធរមីន សូមសម្ដែងនូវការដឹងគុណ និងអរគុណចំពោះការចូលរួមចំណែកពីគ្រប់ភាគីពាក់ព័ន្ធ គាំទ្រដល់វិស័យសកម្មភាពមីន នាពេលកន្លងមក។
បន្ទាប់មកលោក ព្រំ សុភមង្គល អគ្គលេខាធិការអាជ្ញាធរមីន បានបង្ហាញអំពីបច្ចុប្បន្នភាពវិស័យសកម្មភាពមីនជូនដល់អង្គប្រជុំ និងបានបន្តផ្តល់ជាវេទិកាសំណួរ ចំលើយជូនដល់ភាគីពាក់ព័ន្ធក្នុងការអនុវត្តវិស័យសកម្មភាពមីន។
លោកទេសរដ្ឋមន្ត្រី បានអំពាវនាវឲ្យដៃគូអភិវឌ្ឍន៍ ប្រទេសផ្តល់ជំនួយ និងវិស័យឯកជនបន្តជួយដល់វិស័យសកម្មភាពមីន ដើម្បីឈានទៅសម្រេចគោលដៅកម្ពុជាគ្មានមីននៅឆ្នាំ២០២៥៕ ដោយ៖កូឡាប
