ខេត្តព្រះសីហនុ ៖ ប្រជាពលរដ្ឋដែលធ្វើដំណើរមិនអាចធ្វើដំណើរឆ្លងកាត់ផ្លូវខាងក្រោយសណ្ឋាគារខ្សាច់ស ក្រុងព្រះសីហនុ បានរិះគន់រដ្ឋបាលក្រុង-ខេត្តព្រះសីហនុ លើករណីដឹកថ្ម ក្រួស និងខ្សាច់ នាំយកមកដាក់គរ នៅលើផ្លូវបេតុង (ផ្លូវម្តុំខាងក្រោយសណ្ឋាគារខ្សាច់ស) មុនអាចឲ្យមធ្យោបាយយានតន្តធ្វើដំណើរឆ្លងកាត់បាន។
ត្រង់ចំណុចនេះ ទាំងប្រជាពលរដ្ឋរស់នៅក្រុងព្រះសីហនុ និងសាធារណៈជននានា បានរិះគន់ថា រាល់ការដាក់សម្ភារៈសំណង់ខាងលើនេះ បានរំលោភបិទផ្លូវសាធារណៈ និងបង្កនាំការកកស្ទះចរាចរណ៍ធ្ងន់ធ្ងរថែមទៀតផង ។
ទាក់ទិនបញ្ហានេះ លោក ណុប ហេង ប្រធានមន្ទីរសាធារណការ និងដឹកជញ្ជូនខេត្តព្រះសីហនុ ថ្លែងពន្យល់តាមប្រព័ន្ធ Telegram នៅព្រឹកថ្ងៃទី១២ ខែមិថុនា ឆ្នាំ២០១៩នេះថា ករណីនេះមិនមែនជាការដាក់សម្ភារៈសំណង់រំលោភលើផ្លូវនោះទេ ប៉ុន្តែជាការដាក់បិទបណ្តោះអាសន្នត្រង់កន្លែងដែលទើបចាក់បេតុងថ្មីៗ ក្រោមគម្រោងឧបត្ថម្ភពីសប្បុរសជនតែប៉ុណ្ណោះ។
លោកបន្តថា ចំណុចដែលមានការរិះគន់នេះ គឺជាបេតុងដែលទើបចាក់ថ្មី(មិនទាន់រឹង) ដែលមិនទាន់អាចឲ្យរថយន្តបើកបរពីលើបាននៅឡើយទេ។ ហើយថា ប្រសិនបើមិននាំយកសម្ភារៈសំណង់ទាំងនោះ យកមកដាក់បិទបណ្តោះអាសន្នទេ វាអាចមានរថយន្តធំៗដូចជា៖ រថយន្តក្រឡុកសុីម៉ង់ត៍ជាដើម បានបើកកិនពីលើ នាំឲ្យខូចបេតុងផ្លូវដែលទើបចាក់ថ្មីខាងលើនេះ។
លោក ណុប ហេង ក៏បានស្នើសុំការយោគយល់ពីសំណាក់ប្រជាពលរដ្ឋ និងអ្នកធ្វើដំណើរទាំងអស់គ្នា ចំពោះការកកស្ទះចរាចរណ៍តាមផ្លូវនេះ។
លោកបន្រថា ក្រោយបេតុងដែលទើបចាក់ផ្លូវថ្មីខាងើនេះ រឹងគ្រប់កម្រិតហើយនោះ នឹងបើកឥ្តពលរដ្ឋធ្វើដំណើរជាធម្មតាទាំងសងខាងវិញហើយ៕ ដែន សីមា
