កំពង់ស្ពឺ ៖ លោកសរ សុពុត្រា អភិបាលរងខេត្ដ ជាប្រធានលេខាធិការដ្ឋាន នៃគណៈកម្មការត្រួតពិនិត្យគ្រឿងញៀនខេត្តកំពង់ស្ពឺបានស្នេីសុំឲ្យស្ថាប័នច្បាប់ “ព្រះរាជអាជ្ញា,ចៅក្រម”មេត្តាពិនិត្យអំពីធាតុផ្សំនៃបទល្មេីសគ្រឿងញៀន ករណីមានចំណុចឆកល្វែងមេត្ដាផ្ដល់នូវកិច្ចកែតម្រូវជៀសវាងការរុញទូកបណ្ដោយទឹកនាំឲ្យរងនូវមតិរិះគន់ពីប្រជាពលរដ្ឋនិងមហាជនពិសេសធ្វើឲ្យបាក់ទឹកចិត្តពីសំណាក់មន្រ្តីអនុវត្តន៍តាមច្បាប់ ជះឥទ្ធិពលអាក្រក់ដល់ការអនុវត្ដន៍គោលនយោបាយភូមិ.ឃុំមានសុវត្ថិភាព ។
នាព្រឹកថៃ្ងទី១២ ខែមិថុនា ឆ្នាំ២០១៩នៅរដ្ឋបាលសាលាខេត្ដកំពង់ស្ពឺ អគារខាងជេីង មានរៀបចំកិច្ចប្រជុំកិច្ចប្រជុំផ្សព្វផ្សាយផែនការសកម្មភាព ស្ដីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លេីកទី ៤ ក្រោមអធិបតីភាពលោក សរ សុពុត្រា អភិបាលរងខេត្ត និងជាអនុប្រធានគណៈកម្មការត្រួតពិនិត្យគ្រឿងញៀនខេត្ដ លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ ជាអនុប្រធានគណៈកម្មការត្រួតពិនិត្យគ្រឿងញៀនខេត្ដ និងជាប្រធានអនុគណៈកម្មការអនុវត្ដន៍ច្បាប់ និងមានការអញ្ញេីញចូលរួមពីសំណាក់អនុប្រធានសាលាដំបូងខេត្ដកំពង់ស្ពឺ លោកស្រីព្រះរាជអាជ្ញា អយ្យការអមសាលាដំបូងខេត្ដកំពង់ស្ពឺ លោកប្រធានពន្ធនាគារខេត្ត លោកស្នងការរងខេត្ត មេបញ្ជាការរង កងរាជអាវុធហត្ថខេត្ដ មេបញ្ជាការរង ប្រតិបត្តិការសឹករងខេត្ដ អស់លោក លោកស្រីតំណាងស្ថាប័ន មន្ទីរ ជុំវិញរដ្ឋបាលខេត្ត អភិបាលក្រុង ស្រុក អធិការនគរបាលក្រុង ស្រុក ទាំង ៨ មន្ទីរជំនាញកងរាជអាវុធហត្ថខេត្ដ លោកមេឃុំ ចៅសង្កាត់ លោកនាយប៉ុស្ដិ៍នគរបាលរដ្ឋបាលទាំង ៨៧ និងមន្រ្ដី អ្នកសម្របសម្រួលជាច្រេីនរូបទៀត។
យោងតាមរបាយការណ៍គណៈកម្មការត្រួតពិនិត្យគ្រឿងញៀនខេត្ត ដែលបានធ្វេីការបូកសរុប លេីកឡេីងក្នុងកិច្ចប្រជុំផ្សព្វផ្សាយនេះ ដោយលោកឧត្ដមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ ជាប្រធានអនុគណៈកម្មការអនុវត្តន៍ច្បាប់ បានគូសបញ្ជាក់បង្ហាញអំពីលទ្ធផលដែលបង្រ្កាបបានក្នុងឆ្នាំកន្លងមក ចំណុចខ្លាំង ខ្សោយនិងបញ្ហាប្រឈមដែលត្រូវរួមគ្នាដោះស្រាយបញ្ចប់ដេីម្បីអោយគណៈកម្មការប្រយុទ្ធប្រឆាំងគ្រឿងញៀនថ្នាក់ខេត្ដទទួលបានលទ្ធផលល្អលុបបំបាត់បញ្ហាប្រេីប្រាស់ ជួយដូរសារធាតុញៀនទាំងស្រុង១០០ភាគរយ ។
បន្ទាប់មកលោកឧត្ដមសេនីយ៍ត្រី ម៉ាត់ ធុច ស្នងការរង ទទួលផែនប្រឆាំងគ្រឿងញៀននៃស្នងការដ្ឋាននគរបាលខេត្តបានឡេីងអានផែនការសកម្មភាព លេខ ១៤/១៩ ផ.ក ស្ដីពីយុទ្ធនាការ ប្រយុទ្ធប្រឆាំងគ្រឿងញៀនខុសច្បាប់លេីកទី ៤ រយៈពេល ១ឆ្នាំ ជូនសមាជិក សមាជិការអង្គប្រជុំជ្រាប។
លោកសរ សុពុត្រា ប្រធានលេខាធិការដ្ឋានក្នុងនាមឯកឧត្តមប្រធានគណៈកម្មការត្រួតពិនិត្យគ្រឿងញៀនខេត្ដ សូមធ្វើការគាំទ្រ និងកោតសរសេីរចំពោះកិច្ចខិតខំប្រឹងប្រែងរបស់ក្រុមការងារគណៈកម្មការត្រួតពិនិត្យគ្រឿងញៀនទាំងអស់ ដែលបានខិតខំប្រឹងប្រែងបំពេញភារកិច្ចបេសកកម្មទទួលបានលទ្ធផលល្អដូចរបាយការណ៍ដែលបានស្ដែងឡេីងក្នុងពេលនេះ ទន្ទឹមនឹងនោះក៏នៅមានចំណុចខ្វះខាតបញ្ហាប្រឈមមួយចំនួនដែលត្រូវរួមគ្នាធ្វេីការដោះស្រាយអោយបានដាច់ខាត រួមគ្នាលុបបំបាត់បញ្ហាគ្រឿងញៀនព្រោះគ្រឿងញៀនជាបញ្ហាសកលនាពេលបច្ចុប្បន្ននេះ មិនថាខេត្ដកំពង់ស្ពឺនោះទេ ត្រូវតែមានកិច្ចសហការដេីម្បីលុបបំបាត់ជាការសំណូមពរ លោកបានស្នេីសុំឲ្យស្ថាប័នច្បាប់ “ព្រះរាជអាជ្ញា,ចៅក្រម”មេត្តាពិនិត្យអំពីធាតុផ្សំនៃបទល្មេីសករណីមានចំណុចឆកល្វែងមេត្ដាផ្ដល់នូវកិច្ចកែតម្រូវជៀសវាងការរុញទូកបណ្ដោយទឹកនាំឲ្យរងនូវមតិរិះគន់ពីប្រជាពលរដ្ឋនិងមហាជនពិសេសធ្វើឲ្យបាក់ទឹកចិត្តពីសំណាក់មន្រ្តីអនុវត្តន៍តាមច្បាប់ ជះឥទ្ធិពលអាក្រក់ដល់ការអនុវត្ដន៍គោលនយោបាយភូមិ.ឃុំមានសុវត្ថិភាព របស់រាជរដ្ឋាភិបាលកម្ពុជាស្ដីពីស្ថិរភាពក្នុងតំបន់គ្មានគ្រឿងញៀន នាឱកាសនោះដែរក្នុងនាមឯកឧត្ដមប្រធានគណៈកម្មការត្រួតពិនិត្យគ្រឿងញៀនខេត្ត បានផ្ដល់លិខិតសរសេីរលេីកទឹកចិត្ដជូនដល់អង្គភាពដែលបានបំពញការងារល្អ មានស្នាដៃក្នុងការបង្រ្កាបគ្រឿងញៀនក្នុងមូលដ្ឋានគ្រប់គ្រងទទួលបានលទ្ធផលល្អប្រសើរ៕ ដោយ ៖ កូឡាប
