ភ្នំពេញ ៖ សម្ដេចក្រឡាហោម ស ខេង បានដាក់បទបញ្ជាហាមដាច់ខាតមិនអនុញ្ញាត ឲ្យមានការយកកងកម្លាំងសមត្ថកិច្ច ទៅការពារនៅកន្លែងកម្សាន្ដ ជាពិសេសក្លឹបកម្សាន្ត ខារ៉ាអូខេ និងកាស៊ីណូ ជាដើម។
ក្នុងឱកាសអញ្ជើញជាអធិបតី ក្នុងពិធីប្រកាសឲ្យចូលកាន់តំណែង ក្រុមប្រឹក្សារាជធានីភ្នំពេញ អាណត្តិទី៣ នៅសាលារាជធានីភ្នំពេញ សម្ដេចក្រឡាហោម ស ខេង បានថ្លែងថា កម្លាំងសមត្ថកិច្ចរបស់យើង ជាមន្ដ្រីរាជការទាំងស៊ីវិល ទាំងកងទ័ព ទាំងនគរបាល ទាំងកងរាជអាវុធហត្ថ អ៊ីចឹងអ្នកគ្រប់គ្រងសុំឲ្យមើល កុំចាត់តាំងកម្លាំងរបស់ខ្លួនទៅយាមខារ៉ាអូខេ។ ការយកកងកម្លាំងទៅយាមការពារ គឺខុសនឹងច្បាប់ទាំងស្រុង ហើយអ្វីដែលកាន់តែខុសទៀតនោះ កន្លែងសប្បាយទាំងអស់នោះ មានបង្កប់ការប្រើប្រាស់ថ្នាំញៀន គឺកាន់តែមានកំហុសធ្ងន់ធ្ងរ។ ជាមួយគ្នានេះ សម្ដេចក្រឡាហោម ស ខេង ក៏បានឲ្យដឹងថា ក្រសួងមហាផ្ទៃ នឹងចេញសេចក្ដីណែនាំមួយ ដាច់ខាតមិនអនុញ្ញាតឲ្យមានរឿងនេះ កើតឡើងនោះឡើយ។ សម្ដេចបន្ថែមទៀតថា “អ្នកគ្រប់គ្រងកងកម្លាំងប្រដាប់អាវុធ ដូចជានគរបាលកងរាជអាវុធហត្ថ សូមឱ្យមើលកុំចាត់តាំងកម្លាំងរបស់ខ្លួន ទៅយាមខារ៉ាអូខេ ព្រោះបើយើងយកកម្លាំងទៅយើង គឺវាខុសច្បាប់និងមិនត្រឹមត្រូវ តាមបទបញ្ជា ការប្រើប្រាស់កម្លាំង។ ជាពិសេសទៅយាមកន្លែង ប្រើប្រាស់គ្រឿងញៀនតែម្ដង គឺកាន់តែខុសធ្ងន់ធ្ងរថែមទៀត ដូច្នេះខ្ញុំសូមអំពាវនាវ កុំឲ្យករណីនេះកើតមាន ។ ខ្ញុំនឹងចេញសេចក្តីណែនាំមួយកំពុងតែរៀបចំ ។ យើងត្រូវលើកកិត្តិយសជាតិ សេចក្រីថ្លៃថ្នូររបស់ជាតិ”។ សម្តេច បានបញ្ជាក់ថា “កម្លាំងរបស់យើងអត់ការងារធ្វើទៅយាមកាស៊ីណូ ។ ការយាមកាស៊ីណូ គឺត្រូវប្រើប្រាស់កម្លាំងសន្តិសុខឯកជន ដែលមានការបណ្តុះបណ្តាលត្រឹមត្រូវ មិនមែនយកកាំភ្លើងរបស់ជាតិ កម្លាំងរបស់ជាតិ ទៅយាមកាស៊ីណូនោះទេ ហើយបើយកកម្លាំងស៊ីប្រាក់ខែជាតិ ទៅយាមកន្លែងគ្រឿងញៀននោះ គឺអន្តរធានហើយ”។
សម្ដេចក្រឡាហោម ស ខេង បានថ្លែងថា បណ្ដាក្លឹបកម្សាន្ដ ខារ៉ាអូខេ ឬកន្លែងសប្បាយភាពទាំងអស់ គួរតែប្រើប្រាស់ភ្នាក់ងារសន្ដិសុខឯកជនឲ្យបានច្រើន ៕ ដោយ ៖ កូឡាប