នៅរសៀលថ្ងៃទី ១២ ខែមិថុនា ឆ្នាំ ២០១៩នេះ លោកវិល្លាម សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ មកពីគណបក្សខ្មែរក្រោកបានឲ្យដឹងថា សម្ដេចតេជោបានឯកភាពតបតាមការស្នេីសុំរបស់លោកហើយ ក្នុងការអញ្ជេីញ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងប្រតិភូក្រសួងសុខាភិបាល ចូលប្រជុំជាមួយឧត្តមក្រុមប្រឹក្សាពិគ្រោះនិងផ្ដល់យោបល់ ។
កិច្ចប្រជុំជាមួយនឹងប្រតិភូក្រសួងសុខាភិបាល នឹងចាប់ផ្ដេីមនៅថ្ងៃទី១៩ ខែ មិថុនា ឆ្នាំ ២០១៩ ខាងមុខនេះ ។
ជាមួយគ្នានេះដែរ លោកវិល្លាម បានឲ្យដឹងទៀតថា ក្នុងកិច្ចប្រជុំនេះ សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ពីគណបក្សខ្មែរក្រោក នឹងតាមដានការអនុវត្តន៍ច្បាប់ ដោយសុំការបំភ្លឺនានាទាក់ទិននឹងភាពមិនប្រក្រតីក្នុងវិស័យសុខាភិបាល ដូចជា ៖ ក្រមសីលធម៌គ្រូពេទ្យ , ការគ្រប់គ្រងធូររលុងលេីគ្លីនិកឯកជន , ការខ្វះទំនួលខុសត្រូវចំពោះការព្យាបាលអ្នកជំងឺរបស់គ្លីនិកឯកជន , ការលំហូរចូលនូវឱសថក្លែងក្លាយដែលប៉ះពាល់សុខភាព , ដែលសុទ្ធសឹងជាហេតុនាំឲ្យពលរដ្ឋដែលជាអ្នកទទួលយកសេវាធារណៈ សេវាឯកជនពីវិស័យសុខាភិបាលកេីតក្ដីមិនពេញចិត្ត និងរិះគន់ជាដេីម ។
សូមជម្រាបជូនថា កាលពីថ្ងៃទី ១៩ ខែមេសា កន្លងទៅថ្មីៗនេះ ឯកឧត្តមវិល្លាម បានដាក់លិខិតស្នេីសុំទៅសម្ដេចតេជោ ដេីម្បីសុំការឯកភាពពីសម្ដេច ក្នុងការអញ្ជេីញរដ្ឋមន្ត្រី២រូប មកចូលរួមបំភ្លឺក្នុងកិច្ចប្រជុំរបស់ឧត្តមក្រុមប្រឹក្សាពិគ្រោះ និងផ្ដល់យោបល់ ដែលក្នុងនោះរួមមាន វិស័យការពារជាតិ/យោធា និងវិស័យសុខាភិបាល៕ ដោយ៖បញ្ញាស័ក្តិ
