ភ្នំពេញ ៖ លោកគង់ គាំ ប្រធានកិត្តិយសគណបក្សឆន្ទៈខ្មែរ នៅថ្ងៃទី១២មិថុនា នេះ បានសរសេរលើផេកហ្វេសប៊ុកថា នំបញ្ចុក អាហារពេញនិយមរបស់ខេមរៈជាតិ គឺអាចទទួលទានប្រចាំថ្ងៃជាធម្មតា និងប្រើប្រាស់នៅគ្រប់ពិធីតូចធំជាទូទៅជាប្រពៃណីគ្រប់ជំនាន់។
លោកបានបន្តទៀតថា នំបញ្ចុកនយោបាយដែលកំណត់ថ្ងៃហូបក្នុងពេលតែមួយដ៏ទូលំទូលាយ (ផ្តួចផ្តើមដោយមេដឹកនាំ និងក្រុមនយោបាយជាប់ទោស ជាប់បម្រាម ពិសេសដោយបណ្តាញសម្រាប់រៀបចំការជូន និងទទួលទណ្ឌិត សម រង្ស៊ី វិលចូលមកកម្ពុជាវិញ) ហើយត្រូវអំណាច ហ៊ុន សែន ក្រុមអ្នកនយោបាយដឹកនាំប្រទេសបានចាក់បណ្តោយប្រកាសអោយមានការហូបនំបញ្ចុកដ៏ទូលំទូលាយទូទាំងប្រទេសទន្ទឹមគ្នា និងត្រៀមហូបអ្វីៗ (ក្រៅពីដុំថ្ម)ស្របគ្នាជាហូរហែរតទៅ ដែលមិនមែនជាការឆ្ពោះទៅរកការចចារនោះ) បានផ្ទុះឡើងនូវភាពប្រេះស្រាំរបស់ជាតិជាប្រវត្តិសាស្ត្រតែប៉ុណ្ណោះ។
លោកគង់ គាំ បានថ្លែងថា តាំងពីឆ្នាំ ២០១៥ មេដឹកនាំខ្មែរ (បក្សប្រឆាំង)ដែលបានអះអាងថាមានថ្នាក់ដឹកនាំសំខាន់ក្នុងរាជរដ្ឋាភិបាល និងឯកអគ្គរដ្ឋទូតសហរដ្ឋអាមេរិកនៅកម្ពុជាជូនព័ត៌មាន និងយោបល់ចំពោះខ្លួនថា (បើចេញពីកូរ៉េខាងត្បូងចូលកម្ពុជា ពេលនោះការចាប់ខ្លួនប្រាកដជាត្រូវអនុវត្ត)។ មេដឹកនាំខ្មែរ (បក្សប្រឆាំង) ដែលក្រុមគេថាមហាអង់អាច មហាឈ្លាសវៃ គ្មានជម្រើសអ្វីផ្សេងក្រៅពីដើរតាមក្បួន (មេត្រូវតែរួចខ្លួន ការស្លាប់ និងការជាប់គុក គឺពិតជាឥតប្រយោជន៍)។
នៅឆ្នាំ ២០១៨ និងឆ្នាំ២០១៩ យុទ្ធសាស្ត្រតូចក៏រលំ យុទ្ធសាស្ត្រធំក៏រលាយ គឺសេចក្តីសង្ឃឹម និងការរង់ចាំការវិលចូលកម្ពុជារបស់មេដឹកនាំដែលខ្លួនផ្ញើរសេចក្តីទុកចិត្ត ពីពេលមួយទៅពេលមួយចេះតែថមថយ ហេវហត់ អស់ភាពអត់ធ្មត់ អស់ការជឿជាក់ជាបន្តបន្ទាប់។
សហភាពអឺរ៉ុប ដែលពិចារណាដក EBA ពីកម្ពុជាកន្លងមក ហើយនៅដើមខែប្រាំមួយឆ្នាំ២០១៩នេះ បានបញ្ចប់ការស៊ើបអង្កេតនៅកម្ពុជាផ្ទាល់ជាលើកចុងក្រោយ ហើយបើអាចមានការសម្រេចដក EBA ពីកម្ពុជានោះ ពេលវេលាអនុវត្តត្រូវចាំប្រាំមួយខែក្រោយ គឺរហូតដល់ដំណាច់ឆ្នាំ២០១៩។ បញ្ហាដូចខាងលើនេះ ការប្តូរផ្តាច់វិលចូលកម្ពុជារបស់ សម រង្ស៊ី នៅឆ្នាំ២០១៩អោយខាងតែបាន នឹងត្រូវបរាជ័យជាថ្មីទៀត។ ក្រុមឆោតបន្តជឿថាបីខែទៀត សម រង្ស៊ី ចូលមកកម្ពុជា តែក្រុមឆោតកំពុងគិតថាតើបីខែទៀត គេមានអ្វីថ្មីដើម្បីភូតបន្ត។
ក្នុងដំណាក់កាលសង្គ្រាមពាណិជ្ជកម្មរវាងមហាប្រទេស និងបញ្ហាដាក់ពន្ធដកពន្ធរបស់ប្រទេសនានាទៅវិញទៅមក គឺត្រូវពឹងទៅលើការដកដង្ហើមដោយខ្លួនឯង មិនពឹងដង្ហើមអ្នកដ៏ទៃដើម្បីរស់នោះទេ។ កម្ពុជា ដែលងាកមកនាំចេញនាំចូលដោយបង់ពន្ធគឺត្រូវរត់អោយរួច រស់ដោយសមត្ថភាព និងដោយថ្លៃថ្នូរ។
តាមការសន្ទនាកន្លងមករវាងតំណាង EU ប្រចាំកម្ពុជា និងគណៈប្រតិភូគណបក្ស ឆន្ទៈខ្មែរ យើងសង្ឃឹមថាគណបក្ស ឆន្ទៈខ្មែរ ដែលជាប៉ូលនយោបាយថ្មី មានក្រុមអ្នកនយោបាយវ័យក្មេង និងក្រុមអតីតសមាជិកគណបក្សសង្គ្រោះជាតិជាច្រើនជាស្ថាបនិក ព្រមទាំងមានការចូលរួម និងគាំទ្រគួរអោយកត់សម្គាល់ពីមជ្ឈដ្ឋានរបស់ប្រជាពលរដ្ឋខ្មែរដែលចង់អោយមានការផ្លាស់ប្តូរនៅកម្ពុជា ធ្វើអោយ EU ចាប់អារម្មណ៍ថាលំហប្រជាធិបតេយ្យ សិទ្ធិនយោបាយ សេរីភាពសម្តែងមតិ និងយន្តការក្រៅសភា និងក្រៅរដ្ឋាភិបាល (ឧត្តមក្រុមប្រឹក្សាពិគ្រោះ និងផ្តល់យោបល់) ដែលគណបក្ស ឆន្ទៈខ្មែរ បានចូលរួមពិតជាបានរួមចំណែកអោយរបបដឹកនាំពហុបក្សនៅថ្នាក់ជាតិ និងថ្នាក់ក្រោមជាតិ (ក្នុងដំណាក់កាលអន្តរកាល) ឆ្ពោះទៅការបោះឆ្នោតពីប្រជាពលរដ្ឋទាំងអស់គ្នា ក្រោយឆ្នាំ២០២២ ជាមធ្យោបាយតែមួយគត់ ដើម្បីស្តារ និងអភិវឌ្ឍស្ថានភាពប្រជាធិបតេយ្យ សេរីពហុបក្ស ការគោរពសិទ្ធិមនុស្ស និងការអភិវឌ្ឍដែលមជ្ឈដ្ឋាននានាចង់ឃើញ និងចង់បាន៕ ដោយ ៖ កូឡាប