ភ្នំពេញ ៖ យុវសិស្សម្នាក់បានលង់ទឹកស្រះក្នុងវត្តស្លាប់ ទោះជាប្រជាពលរដ្ឋ សមត្ថកិច្ច ក្រុមគ្រួសារ ព្យាយាមចុះរាវយក ស្រង់បានមកវិញភ្លាម យ៉ាងណាក៏មិនអាចសង្គ្រោះអាយុជីវិតបានដែរបន្ទាប់ពីយុវសិស្សរងគ្រោះ រួមជាមួយមិត្តភក្តិ៦នាក់ ឆ្លៀតម៉ោងទំនេរនាំគ្នាទិញផ្លែឈេី គ្រឿងម្ជូរ ទៅហូបនៅមាត់ស្រះទឹក ក្នុងវត្តឧត្តរាវត្តី ភូមិមិត្តភាព សង្កាត់ឫស្សីកែវ ខណ្ឌឫស្សីកែវ កាលពីម៉ោង២និង៤០នាទីរសៀល ថ្ងៃទី១២ ខែមិថុនា ឆ្នាំ២០១៩ ។
យុវសិស្សរងគ្រោះឈ្មោះ អៀត សំរិទ្ធបញ្ញា អាយុ១៤ឆ្នាំ ជាសិស្សរៀនថ្នាក់ទី៧ EDនៃអនុវិទ្យាល័យឫស្សីកែវ មានទីលំនៅភូមិសាមគ្គី សង្កាត់ឫស្សីកែវ ខណ្ឌឫស្សីកែវ ។
តាមប្រភពនៅកន្លែងកើតហេតុបានឲ្យដឹងថា មុនកើតហេតុ យុវសិស្សរងគ្រោះ និងមិត្តរួមថ្នាក់សរុបមានគ្នា៦នាក់ឆ្លៀតម៉ោងទំនេរ ព្រោះសាលាក៏នៅជាប់ទីរបងវត្ត ក៏បាននាំគ្នាទិញគ្រឿងម្ជូរ ទៅអង្គុយហូបនៅមាត់ស្រះក្នុងបរិវេណវត្ត កន្លែងកើតហេតុហូបបណ្តើរជជែកគ្នាលេងបណ្តើរ មិនទាន់ទាំងអស់ផង ជនរងគ្រោះដោះអាវស្រាតខោជើងវែង លោតចុះងូតទឹកស្រះតែម្នាក់ឯង ស្រាប់តែលង់លិចបាត់តែម្តង រកតែជួយមិនទាន់ផងទើបបង្កឲ្យផ្អើលឆោឡោ ប្រជាពលរដ្ឋសមត្ថកិច្ច ក្រុមគ្រួសារនាំគ្នាចុះរាវ ស្រង់ឡើងគោកវិញដើម្បីសង្គ្រោះលើករលាក់ យ៉ាងណាក្តី ក៏មិនអាចដឹងខ្លួនឡើងវិញបានដែរ ហើយក្រុមគ្រួសារបានត្រឹមបង្ហូរទឹកភ្នែកទាំងក្តីអាណិត ។
តាមលោកតាអាចារ្យម្នាក់បានឲ្យដឹងថា ស្រះទឹកមុខព្រះវិហារខាងលើ មានជម្រៅរហូតដល់ទៅ៣ម៉ែត្រ ។
ជនរងគ្រោះក្រោយកើតហេតុ ត្រូវបានស្រង់សង្គ្រោះបឋមរួចបានបញ្ជូនទៅមន្ទីពេទ្យកាល់ម៉ែត ហេីយត្រូវគ្រូពេទ្យប្រាប់ថាស្លាប់បាត់ទៅហេីយរួចសមត្ថកិច្ចមកពិនិត្យ កោសល្យវិច័យជាក់ស្តែងឃើញថា ស្លាប់ដោយសារ លង់ទឹកពិតមែន ៕ ដោយ៖កូឡាប