ភ្នំពេញ ៖ រដ្ឋមន្ត្រីកសិកម្ម បានស្នើមន្ត្រីដែលនឹងចូលកាន់តំណែងថ្មី អនុវត្តឲ្យបានជាប្រចាំ និងប្រកបដោយប្រសិទ្ធភាព នូវក្រមសីលធម៌ មន្ត្រីរាជការ និងត្រូវយកចិត្តទុកដាក់ក្នុងការត្រួតពិនិត្យ និងចាត់វិធានការសមស្រប ដើម្បីពង្រឹងការគ្រប់គ្រងវត្តមាន និងត្រូវធ្វើបញ្ជីសម្រង់វត្តមានឱ្យបានហ្មត់ចត់។ ទន្ទឹមនឹងនេះ ត្រូវទទួលខុសត្រូវផ្ទាល់ចំពោះមន្ត្រីក្រោមឱវាទដែលមិនបានមកបំពេញការងារ ឬមកបំពេញការងារមិនទៀងទាត់ ឬ អវត្តមានដោយគ្មានមូលហេតុ។
លោករដ្ឋមន្ត្រី វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងបែបនេះ នៅទីស្តីការក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃពុធ ១០កើត ខែជេស្ឋ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១២ ខែមិថុនា ឆ្នាំ២០១៩ក្នុងពិធីប្រកាសចូលកាន់តំណែងមន្ត្រីរាជការ និងប្រគល់វិញ្ញាបនបត្របញ្ជាក់ការសិក្សាស្តីពី “ការគ្រប់គ្រង និងភាពជាអ្នកដឹកនាំ” ជូនមន្ត្រីរាជការ ក្រសួងកសិកម្ម ។
ពាក់ព័ន្ធការងារកសិកម្ម លោករដ្ឋន្ត្រីបានថ្លែងពីការវិវឌ្ឍន៍រីកចម្រើន បញ្ញាប្រឈម និងយន្តការដោះស្រាយជាបន្តបន្ទាប់។ល។ លោកបានក្រើនរំលឹកឲ្យថ្នាក់ដឹកនាំគ្រប់ជាន់ថ្នាក់ មន្ត្រីជំនាញត្រូវយកចិត្តទុកដាក់បង្កើនសមត្ថភាពគ្រប់គ្រង ចំណេះជំនាញ បទពិសោធន៍និងត្រូវលើកកម្ពស់ភាពទទួលខុសត្រូវ ជាពិសេសមន្ត្រីដែលនឹងចូលកាន់តំណែងថ្មីនាថ្ងៃនេះ។
ដើម្បីទទួលបាននូវពុទ្ធិថ្មី៑ និងធាតុចូលសំខាន់ៗសម្រាប់យកទៅធ្វើជាគន្លឹះទាំងក្នងការដឹកនាំ និងអនុវត្តភារកិច្ចឲ្យទទួលបានជោគជ័យតាមអនុវិស័យនីមួយៗថែមទៀត លោករដ្ឋមន្ត្រីបានជូនជាអនុសាសន៍មួយចំនួនបន្ថែមទៀតដែលមានខ្លឹមសារសំខាន់ៗដោយសង្ខេប ជាបន្តបន្ទាប់ដូចខាងក្រោម ៖
ទី១- ត្រូវអនុវត្តឲ្យបានជាប្រចាំ និងប្រកបដោយប្រសិទ្ធភាព នូវក្រមសីលធម៌ មន្ត្រីរាជការក្នុងការ គ្រប់គ្រងដឹកនាំ ការបំពេញភារកិច្ចដូចមានចែងក្នុងជំពូកទី៥ មាត្រា៣៣ ដល់មាត្រា៣៨ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល និងត្រូវគោរពតាមឋានានុក្រមការងារជាចាំបាច់តាមគោល ការណ៍ “សមូហ-ភាពដឹកនាំ បុគ្គលទទួលខុសត្រូវ”។
ទី២- ត្រូវយកអស់ស្មារតីទទួលខុសត្រូវ លះបង់គ្រប់បែបយ៉ាងដើម្បីចូលរួមអភិវឌ្ឍវិស័យកសិកម្ម ទាំងក្នុងពេលបច្ចុប្បន្ន និងអនាគតឲ្យសមស្របតាមបរិបទនៃកំណើនសេដ្ឋកិច្ច និងការវិវឌ្ឍន៍រីក ចម្រើនរបស់ប្រទេសជាតិ និងជាពិសេសដើម្បីឈានទៅសម្រេចគោលនយោបាយអភិវឌ្ឍវិស័កសិកម្ម២០១៩-២០២៣ និងចក្ខុវិស័យរបស់រាជរដ្ឋាភិបាលនាឆ្នាំ២០៣០ និង២០៥០។
ទី៣- ត្រូវចេះផ្តល់ទំនុកចិត្តដល់អ្នកនៅក្រោមបង្គាប់ ធ្វើការអភិវឌ្ឍធនធានមនុស្សក្នុងអង្គភាព ធ្វើវិមជ្ឈការការសម្រេចចិត្តដល់ថ្នាក់ក្រោម និងត្រូវចាត់ទុកសមិទ្ធផលដែលទទួលបានជាការខិតខំប្រឹងប្រែងរួមគ្នា និងមានលក្ខណៈប្រទាក់ក្រឡាគ្នាជាមួយអង្គភាពផ្សេងៗទៀតក្រោមឱវាទ។
ទី៤- ត្រូវប្រកាន់ខ្ជាប់នូវវប្បធម៌របស់មេ ៦យ៉ាងគឺ ៖ ១-អត់ធ្មត់ ២-នឹករលឹក ឲ្យបានសព្វគ្រប់ ៣-ព្យាយាមប្រឹងប្រែង ៤-ចែករំលែកគ្នា ៥-ចិត្តទន់ភ្លន់ ៦-ពិចារណាឲ្យបានគ្រប់ជ្រុងជ្រោយ។
ទី៥- ត្រូវយកចិត្តទុកដាក់ខ្ពស់ក្នុងការត្រួតពិនិត្យ និងចាត់វិធានការសមស្រប ដើម្បីពង្រឹងការគ្រប់គ្រងវត្តមានមន្ត្រីរាជការស៊ីវិលនិងមន្ត្រីជាប់កិច្ចសន្យា និងត្រូវធ្វើបញ្ជីសម្រង់វត្តមានឱ្យបានហ្មត់ចត់។ ទន្ទឹមនឹងនេះ ត្រូវទទួលខុសត្រូវផ្ទាល់ចំពោះមន្ត្រីក្រោមឱវាទដែលមិនបានមកបំពេញការងារ ឬមកបំពេញការងារមិនទៀងទាត់ ឬ អវត្តមានដោយគ្មានមូលហេតុ ។
ទី៦- ដោយឡែកអគ្គនាយកដ្ឋានកសិកម្ម អគ្គនាយកដ្ឋានផលិតកម្មសត្វ និងសុខភាពសត្វ រដ្ឋ បាលព្រៃឈើ រដ្ឋបាលជលផល អគ្គនាយកដ្ឋានកៅស៊ូ សាលាជាតិកសិកម្មក្រោមឱវាទក្រសួងទាំង០៣ និងមន្ទីរទាំងអស់ត្រូវពង្រឹង និងលើកកម្ពស់ការទទួលខុសត្រូវលើភារកិច្ចរបស់ខ្លួនយក ចិត្តទុកដាក់លើការអនុវត្តគោនយោបាយរបស់រាជរដ្ឋាភិបាល និងរបស់ក្រសួងដើម្បីធានាបាននូវយន្តការអភិវឌ្ឍវិស័យកសិកម្មប្រកបដោយចីរភាព និងនិរន្តរភាព៕ ដោយ៖កូឡាប