អ្នកជំនួញឥណ្ឌាម្នាក់ ត្រូវបានតុលាការការកាត់ទោសឲ្យជាប់គុកមួយជីវិត ដោយសារតែគាត់បានលួចដាក់សំបុត្រគំរាមពីការប្លន់យន្តហោះក្លែងក្លាយ នៅក្នុងបង្គន់របស់យន្តហោះមួយគ្រឿង ដែលកំពុងធ្វើការហោះហើរពីទីក្រុង Delhi ទៅកាន់ទីក្រុង Mumbai ប្រទេសឥណ្ឌា។
លោក Birju Salla គឺជាមនុស្សទីមួយដែលត្រូវបានតុលាការកាត់ទោស ក្រោមច្បាប់ប្រឆាំងនឹងការប្លន់យន្តហោះ។ ច្បាប់នោះនឹងធ្វើការដាក់ទោសមួយជីវិតសម្រាប់ចោរប្លន់យន្តហោះ ហើយនឹងអាចប្រហារជីវិតចំពោះទោសធ្ងន់ ។
អ្នកជំនួញខាងលើបានធ្វើការសារភាពថា គាត់បានសរសេរ និងព្រីនសំបុត្រព្រមាននៃការប្លន់យន្តហោះ នៅការិយាល័យធ្វើការគាត់នៅទីក្រុង Mumbai មុនពេលឡើងជិះយន្តហោះកាលពីខែ តុលា ឆ្នាំ ២០១៧កន្លងទៅនេះ។
ក្នុងសំបុត្រព្រមាននោះដែលដាក់ក្នុងបង្គន់បាននិយាយថា នៅលើយន្តហោះមានចោរប្លន់ចំនួន ១២នាក់ និងគ្រឿងផ្ទុះមួយចំនួន និងបានធ្វើការទាមទារឲ្យជើងហោះហើរបែរទិសដៅទៅកាន់តំបន់ Kashmir។
លោកត្រូវបានគេចាប់ខ្លួន ក្រោយពេលយន្តហោះបានធ្វើការចុះចតជាបន្ទាន់នៅទីក្រុង Ahmedabad នៃរដ្ឋ Gujarat របស់ឥណ្ឌា ដែលមានចំងាយ ៧៧៨គីឡូម៉ែត្រពីគោលដៅដែលយន្តហោះ ត្រូវចុះ។
នៅពេលនោះដែរ បុរសខាងលើកំពុងមានទំនាក់ទំនងស្នេហាជាមួយនឹងស្ត្រីម្នាក់ដែលជានារីបំរើការលើយន្តហោះរបស់ក្រុមហ៊ុនអាកាសចរណ៍ Jet Airways។
លោកត្រូវបានគេរាយការណ៍ថា បានសុំឲ្យមិត្តស្រីរបស់លោកផ្លាស់មករស់នៅទីក្រុង Mumbai ជាមួយគ្នា ប៉ុន្តែត្រូវនាងបដិសេធ ដូច្នេះគាត់ទើបគាត់ធ្វើទង្វើបែបនោះ ដោយសង្ឃឹមថា នាងនឹងបាត់បង់ការងារ ដោយសារមានទំនាក់ទំនងជាមួយគាត់ ហើយនាងនឹងត្រូវបង្ខំចិត្តរើទៅនៅជាមួយគាត់។
ព្រះរាជអាជ្ញាបានថ្លែងប្រាប់ទីភ្នាក់ងារសារពត៌មាន AFP ថា លោក Birju Salla មិនបានធ្វើការប្លន់យន្តហោះនោះទេ ប៉ុន្តែដោយការដាក់សំបុត្រគំរាមពីការប្លន់ វានៅតែអាចចាត់ទុកថាជាការប៉ុនប៉ងប្លន់យន្តហោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
