អ្នកតវ៉ារាប់ពាន់នាក់បានត្រៀមខ្លួនរួចរាល់ហើយ ក្នុងទីក្រុងហុងកុងនៅថ្ងៃព្រហស្បតិ៍នេះ ដើម្បីប្រឈម និងប៉ះទង្គិចជាមួយប៉ូលីសជុំវិញច្បាប់ធ្វើបត្យាប័នដ៏ចម្រូងចម្រាស់។ ការត្រៀមខ្លួនរបស់បាតុការនេះកើតឡើងតែមួយថ្ងៃប៉ុណ្ណោះ ក្រោយពេលមានការប៉ះទង្គិចគ្នាម្សិលមិញ ដែលប៉ូលីសបានការបាញ់ឧស្ម័នបង្ហូរទឹកភ្នែក និងគ្រាប់កាំភ្លើងជ័រដាក់លើក្រុមអ្នកតវ៉ា។
សិស្សសាលាជាច្រើនបានចូលរួមក្នុងបាតុកម្មដែលបង្កើតឲ្យកាន់តែមានមនុស្សច្រើន។
អ្នកតវ៉ាម្នាក់ឈ្មោះ Natalie Wong បានថ្លែងថា “ពួកយើងបានត្រៀមខ្លួនរួចរាល់ហើយក្នុងការមានសង្គ្រាមជាមួយនឹងរដ្ឋាភិបាល។ ខ្ញុំនៅក្មេង ហេតុដូច្នេះហើយទើបខ្ញុំត្រូវប្រយុទ្ធដើម្បីទីក្រុងហុងកុង”។
សូមបញ្ជាក់ថា ការតវ៉ាទូទាំងហុងកុងបានផ្ទុះឡើង ក្រោយពេលក្រុមប្រឹក្សាច្បាប់ដែលគាំទ្ររដ្ឋាភិបាលក្រុងប៉េកាំងគ្រោងប្រកាស និងអនុម័តសេចក្តីព្រាងច្បាប់ ដែលអនុញ្ញាតឲ្យមានការធ្វើបត្យាប័នអ្នកទោសពីទីក្រុងហុងកុងទៅកាន់ប្រទេសចិន។
សេចក្តីព្រាងច្បាប់នោះបានធ្វើឲ្យមានការព្រួយបារម្ភថា វាអាចគំរាមកំហែងដល់នីតិរដ្ឋដែលគាំទ្រ លក្ខខណ្ឌហិរញ្ញវត្ថុអន្តរជាតិរបស់ទីក្រុងហុងកុង។
កាលពីថ្ងៃពុធម្សិលម៉ិញ ក្រុមប្រឹក្សាច្បាប់បានប្រកាសថា ការជួបជុំដើម្បីពិភាក្សាលើសេចក្តីព្រាងច្បាប់ដែលគ្រោងធ្វើនៅថ្ងៃពុធ ត្រូវដូរពេលទៅថ្ងៃក្រោយវិញ។
បើទោះបីជាមានការតវ៉ាទូទាំងហុងកុង រដ្ឋាភិបាលបាននិយាយថា ខ្លួននឹងនៅតែបន្តជំរុញឲ្យមានច្បាប់ធ្វើបត្យាប័ននោះ។
ប្រព័ន្ធផ្សព្វផ្សាយហុងកុងបាននិយាយថា ការបោះឆ្នោតចុងក្រោយអាចនឹងត្រូវធ្វើនៅថ្ងៃទី ២០ ខែមិថុនានេះ ហើយក្រុមប្រឹក្សាច្បាប់ត្រូវគេរំពឹងថានឹងធ្វើការអនុម័តច្បាប់នោះ។
បើច្បាប់នោះត្រូវបានអនុម័ត វានឹងមានការអនុញ្ញាតឲ្យបញ្ជូនជនសង្ស័យនៅទីក្រុងហុងកុង ទៅកាន់ប្រទេសចិនដើម្បីធ្វើការកាត់ទោស៕
អត្ថបទប្រែសម្រួលដោយ៖ សុភ័ក្រ
ប្រភព៖ channelnewsasia