ភ្នំពេញ ៖ ចុងបញ្ចប់ មុនតុលាការប្រកាសកាត់លោកផែង វណ្ណៈ សម្រេចសរសេរលិខិតសុំទោសសម្តេចនិងអ្នកលេងបណ្តាញសង្គមដល់លោក ។
លោកផែង វណ្ណៈ សន្យានឹងកែប្រែអត្តចរិកមិនល្អចោលទាំងអស់ ។ លោកផែងវណ្ណៈសង្ឃឹមថា សម្តេចនិងមហាជននឹងអភ័យទោសអោយលោកមិនខាន។
លោក ផែង វណ្ណៈ ទំនងជាភ្ញាក់ខ្លួនដឹងកំហុសខ្លួនឯង បានសរសេរលិខិតសុំអភ័យទោសពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នូវអ្វីដែលខ្លួនបានប្រព្រឹត្ត ។
លោក ផែង វណ្ណៈ បានរៀបរាប់ចេញពីមន្ទីរឃុំឃាំងថា “ទង្វើដ៏ឆ្គាំឆ្គងនេះកើតឡើងដោយសារ ខ្ញុំមានការភ្លេចខ្លួនមានអារម្មណ៍ឆេវឆាវ ខ្វះការពិចារណា ច្រឡោត ខឹងសម្បា ទៅលើអ្នកលេងហ្វេសប៊ុកមួយចំនួន ដោយមិនបានគិតវែងឆ្ងាយ ជាហេតុនាំឲ្យប៉ះពាល់ដល់កិត្តិយសសម្តេចតេជោ ហ៊ុន សែន ដែលជាប្រមុខដឹកនាំដ៏ល្អប្រពៃ នៃប្រជាជនកម្ពុជា ។ ទន្ទឹមនេះខ្ញុំបាទ ក៏សុំការអភ័យទោសផងដែរ ពីសំណាក់ថ្នាក់ដឹកនាំ និងបងប្អូនមួយចំនួននាពេលកន្លងមក ដែលខ្ញុំធ្លាប់បានរិះគន់ ដោយប្រើប្រាស់ពាក្យសម្តីមិនសមរម្យ ធ្វើឲ្យប៉ពាល់ដល់កិត្តិយសផ្ទាល់ខ្លួនរបស់ថ្នាក់ដឹកនាំ និងបងប្អូនមួយចំនួន។ ខ្ញុំបាទចងចាំនូវកំហុសឆ្គងកន្លងមកនេះ ដោយសន្យាថានឹងធ្វើការកែប្រែអត្តចរិត ពាក្យសម្តីរបស់ខ្លួន និងមិនឲ្យបញ្ហាទាំងនេះកើតឡើងជាថ្មីម្តងទៀត” ។
លោកពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះនិងផ្តល់យោបល់ នៅថ្ងៃទី១៣មិថុនា បានសរសេរលើហ្វេសប៊ុកថា “ការជេរប្រមាថមិនមែនជាការបញ្ចេញមតិនោះទេ ហើយអ្នកលេងហ្វេសបុកក៏គ្មានច្បាប់ណាការពារនោះដែរ..ក្នុងន័យនេះ សូមបងប្អូនអ្នកលេងហ្វេសបុកទាំងឡាយលេងហ្វេសបុក ដោយមានការប្រុងប្រយ័ត្នផងកុំឲ្យប៉ះពាល់ដល់សិទ្ធិអ្នកដទៃ…ដូច្នេះករណីរបស់បង ផែង វណ្ណៈ ក្នុងនាមរូបខ្ញុំផ្ទាល់ក៏ចង់ឃើញគាត់មានសេរីភាពឡើងវិញដែរពីព្រោះថាគាត់បានដឹងកំហុសខ្លួនហើយក៏ប៉ុន្តែការឲ្យគាត់មានសេរីភាពវិញនោះគឺអាស្រ័យទៅលើឆន្ទានុសិទ្ធិរបស់តុលាការ”។
នៅថ្ងៃទី១៤ ខែមិថុនា ស្អែកនេះ សាលាដំបូងរាជធានីភ្នំពេញ នឹងបេីកសវនាការជំនុំជម្រះសំណុំរឿងលោក ផែង វណ្ណៈ អ្នកលេងហ្វេសប៊ុកដ៏ល្បីល្បាញមួយរូប ពាក់ព័ន្ធបទល្មើសបរិហារកេរ្តិ៍ជាសាធារណៈនិងញុះញង់ឱ្យប្រព្រឹត្តបទឧក្រិដ្ឋជាអាទិ៍ តាមបណ្តឹងលោក គី តិច មេធាវីតំណាងដោយអាណត្តិរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។
ចន្លោះពេលនេះ លោក ផែង វណ្ណៈ ដែលបច្ចុប្បន្នជាប់ពន្ធនាគារជាង ៣ ខែមកហើយ បានធ្វើលិខិតជាសាធារណៈសុំទោសសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សុំបានចេញពីពន្ធនាគារទៅជួបជុំគ្រួសារ និងព្យាបាលជំងឺ ។
ទោះបីយ៉ាងណា ការសម្រេចបែបណានោះ ជាឆន្ទានុសិទ្ធិរបស់ចៅក្រមជំនុំជម្រះ ព្រោះតុលាការជាអំណាចឯករាជ្យមិនស្ថិតក្រោមឥទ្ធិពលស្ថាប័នណាមួយឡើយ ។
សូមបញ្ជាក់ថា មជ្ឈដ្ឋានជាច្រើន នៅចាំបានថា លោក ផែង វណ្ណៈ អ្នកលេងហ្វេសប៊ុកដ៏ល្បីល្បាញមួយរូប ត្រូវជាប់ពន្ធនាគាររហូតមកទល់បច្ចុប្បន្ននេះ មានរយៈពេលជាង៣ខែមកហើយ ដោយសារតែការលូកដៃចូលជួយករណីកញ្ញា យិន ឃុនម៉ី ហៅម៉ាណា កូនស្រីអ្នកមានស្តុកស្តម្ភមួយរូបនៅខេត្តសៀមរាប និងជាថៅកែលក់រថយន្តស៊េរីទំនើបដែលបើករថយន្តទាំងកម្រោល បុកនិស្សិតស្រី ឌុំ រីដា ស្លាប់។
ដំបូងឡើយ លោក ផែង វណ្ណៈ បានដើរតួនាទីជាអ្នកចរចាជំនួសឳពុកជនបង្ក ដោយយកបច្ច័យ៥០០០ដុល្លារចូលបុណ្យសពនិស្សិតស្រី ឌុំ រីដា រហូតមានការរិះគន់ជាបន្តបន្ទាប់ ហើយចុងក្រោយក្រុមគ្រួសារជនបង្ក ក៏ផ្តល់ថវិកាជាង៧ម៉ឺនដុល្លារ ដល់ម្តាយជនរងគ្រោះ ដើម្បីបញ្ចប់រឿង។
ដោយសារតែទប់សម្តីខ្លួនឯងមិនបានលោកផែង វណ្ណៈ បានសរសេរករណីចូលបុណ្យសពនិស្សិតស្រី ឌុំ រីដា ប្រៀបធៀបកាលដែលសម្តេចតេជោ ហ៊ុន សែន ចូលបុណ្យសពលោកបណ្ឌិត កែម ឡី ទើបកកើតជាបណ្តឹងព្រហ្មទណ្ឌ ដែលប្តឹងដោយ លោក គី តិច មេធាវីតំណាងដោយអាណត្តិរបស់សម្តេចតេជោ ហ៊ុន សែន តែម្តង ។
ទោះបីយ៉ាងណា កញ្ញា យិន ឃុនម៉ី ហៅម៉ាណា ត្រូវបានដោះលែងចេញពីពន្ធនាគារហើយ បន្ទាប់ពីតុលាការផ្តន្ទាទោសដាក់ពន្ធនាគារ១ឆ្នាំ តែអនុវត្តក្នុងពន្ធនាគារតែ២ខែប៉ុណ្ណោះ ហើយទោសដែលនៅសល់ត្រូវព្យួរ។
តុលាការ បានសម្រេចចោទប្រកាន់លោក ផែង វណ្ណៈ ចំនួន២បទល្មើស ដែលអាចប្រឈមមុខការជាប់ពន្ធនាគាររហូតដល់២ឆ្នាំ ។ ក្រោយពីតុលាការ បានពិនិត្យសំណុំរឿងនិងការសាកសួរចម្លើយលើឈ្មោះ ផែង វណ្ណៈ រួចមក តំណាងអយ្យការបានសម្រេចបើកការស៊ើបសួរដោយចោទប្រកាន់ពីបទ បរិហារកេរ្តិជាសាធារណៈនិងញុះញង់ឱ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៩៤ មាត្រា៤៩៥ និងមាត្រា៣០៥ នៃក្រមព្រហ្មទណ្ឌ ៕ ដោយ ៖ កូឡាប